المازبەك اتامبايەۆ جۇرەك سىرقاتىنا بايلانىستى ب ۇ ۇ باس اسسامبلەياسى سەسسياسىنا قاتىسپايتىن بولدى
بۇل تۋرالى حابارلاما مەملەكەت باسشىسىنىڭ رەسمي سايتىندا جاريالاندى.
بىشكەكتەن نيۋ- يورككە بەت العان جولدا قىرعىز رەسپۋبليكاسىنىڭ پرەزيدەنتى المازبەك اتامبايەۆ ءوزىن جايسىز سەزىنىپ، وعان العاشقى مەديتسينالىق كومەك كورسەتىلدى. قىرعىزستان دەلەگاتسياسى جولدا اتاتۇرىك اۋەجايىندا باسقا ۇشاققا اۋىسىپ ءمىنۋى ءتيىس بولعان.
دارىگەرلەر كەۋدە تۇسى اۋىرىپ، كومەككە جۇگىنگەن مەملەكەت باسشىسى تەز ارادا مۇقيات مەديتسينالىق تەكسەرۋدەن ءوتۋى كەرەكتىگىن مالىمدەدى. اق حالاتتىلاردىڭ الدىن الا قويعان مەديتسينالىق قورىتىندىسى بويىنشا، جۇرەك سىرقاتىنىڭ بەلگىلەرى بايقالعان.
وسى وقيعاعا بايلانىستى پرەزيدەنت المازبەك اتامبايەۆ دەرەۋ مەديتسينالىق تەكسەرۋدەن ءوتىپ، ءبىراز ۋاقىت دارىگەرلەر قاراۋىندا بولادى.
مەملەكەت باسشىسى نيۋ- يوركتە وتەتىن ب ۇ ۇ باس اسسامبلەياسىنىڭ 71- سەسسياسىنا بارا جاتقان قىرعىز رەسپۋبليكاسىنىڭ دەلەگاتسياسىن سىرتقى ىستەر ءمينيسترى ەرلان ابدىلدايەۆ باسقاراتىنى جايلى شەشىم شىعاردى.
