ءور تورعاي - ەرلىك مەكەنى ەكسپەديتسياسى «تاتىر» شايقاسى بولعان جەرگە باردى
«ءور تورعاي ەرلىك مەكەنى» اتتى ەكسپەديتسيا امانگەلدى جانە جانگەلدين اۋداندارىنىڭ ارالىعىندا ورنالاسقان تاتىر كولىنىڭ جاعاسىندا وتكەن 1916 -جىلعى كوتەرىلىستىڭ ەڭ العاشقى ءىرى شايقاستارىنىڭ ءبىرى - «تاتىر» شايقاسى بولعان جەرگە باردى. ەكسپەديتسيا مۇشەلەرىن تاتىر كولىنىڭ جاعاسىندا جانگەلدين اۋدانى ءتاۋىش اۋىلىنىڭ تۇرعىندارى وزدەرى دايىنداعان اسەرلى تەاتر قويىلىمىمەن قارسى الدى. ولار كەلۋشىلەرگە تاتىر كولىنىڭ جاعاسىندا امانگەلدى يمانوۆ جايلى شاعىن قويىلىم ۇسىندى.
«وسى جەر بىلمەگەن ادامعا قاراپايىم عانا اۋىل بولىپ كورىنەتىن شىعار، ءبىراق تاريحقا تەرەڭ ۇڭىلەتىن بولساق، بۇل اۋىل بابالارىمىزدىڭ قانى توگىلگەن جەر. العاش ادىلەتسىزدىككە، جاۋىزدىققا، قازاق حالقىنىڭ تاعدىرىنا بالتا شاپقان ۇستەمدىككە قارسى اتقا قونعان قاسيەتتى ورىن. تاتىر شايقاسى- ۇلت نامىسىن تۋ ەتكەن باتىر بابالارىمىزدىڭ اسكەر سانى كوپ، قارۋ- جاراعى مىقتى، كۇشتى جاۋمەن بەتپە- بەت كەلگەن العاشقى ءىرى شايقاسى. ەرلىك ءىس ەشقاشان ۇمىتىلمايدى. وتكەن تاريحتى جاڭعىرتۋ، حالىقتىڭ تاعدىرىن ەسكە سالۋ بۇگىنگى ءىس- شارانىڭ باستى ماقساتى بولۋى كەرەك» ، - دەدى ەكسپەديتسيا مۇشەسى، تاريح عىلىمدارىنىڭ كانديداتى قۇرمانعالي داركەنوۆ اۋىل تۇرعىندارىمەن كەزدەسۋدە.
سونداي- اق، ەكسپەديتسيا 16- قىركۇيەك كۇنى جانگەلدين اۋدانىنىڭ ورتالىعى تورعايدا ورنالاسقان باتىر بابا شاقشاق جانىبەك، «دالا قوڭىراۋى» اتانعان ى. التىنسارين، ارىستارىمىز احمەت بايتۇرسىنوۆ پەن ءمىرجاقىپ دۋلاتوۆ، ساياسي قايراتكەر ءا. جانگەلدين، ايتۋلى اقىن ن. احمەتبەكوۆ اتىنداعى تاريحي- مەموريالدىق مۇراجايلارىن ارالادى. ەكسپەديتسياعا قاتىسۋشىلار كەشكە قاراي قوستاناي وبلىسى امانگەلدى اۋدانىندا بولىپ، امانگەلدى يمانوۆتىڭ اتىنداعى مۇراجايدى ارالادى جانە وسى ارادا كەزدەسۋ ۇيىمداستىردى.
ەستەرىڭىزگە سالا كەتەيىك,11- قىركۇيەك كۇنى ارقالىق قالاسىنان باستاۋ العان «ءور تورعاي ەرلىك مەكەنى» اتتى ەكسپەديتسيانىڭ ءبىر اپتاعا مەجەلەگەن ساپارى بارىسىندا ەكى مىڭ شاقىرىم جولدى باسىپ ءوتىپ، تاريحي ماڭىزى زور وتىزدان استام نىسانعا بارۋ جوسپارلانعان. ەكسپەديتسيا قۇرامىندا عالىمدار، ولكەتانۋشىلار، قوعام بەلسەندىلەرى، جۋرناليستەر مەن بلوگەرلەر بار.
باقىتجول كاكەش
