19:05, 16 - قىركۇيەك 2016 | GMT +5
بىشكەكتە ت م د مەملەكەت باسشىلارىنىڭ مەرەيتويلىق ءسامميتى باستالدى
بىشكەك. قازاقپارات - بىشكەكتە الا-ارچا مەملەكەتتىك رەزيدەنتسياسىندا تاۋەلسىز مەملەكەتتەر دوستاستىعىنا مۇشە-ەلدەر پرەزيدەنتتەرىنىڭ مەرەيتويلىق ءسامميتى باستالدى.
قول الىسۋ جانە بىرلەسىپ سۋرەتكە ءتۇسۋ راسىمىنەن كەيىن شاعىن زالدا مەملەكەت باسشىلارىنىڭ تار اۋقىمداعى وتىرىسى باستالدى. شاعىن فورماتتاعى كەزدەسۋدىڭ كۇن تارتىبىندە تۇرعان سۇراقتار: ت م د- نىڭ 25 جىلدىعىنا وراي تاۋەلسىز مەملەكەتتەر دوستاستىعىنا مۇشە-ەلدەر پرەزيدەنتتەرىنىڭ مالىمدەمەلەرى؛ تاۋەلسىز مەملەكەتتەر دوستاستىعىنىڭ زاماناۋي جاعدايلارعا بەيىمدەلۋى؛ ت م د- عا ءتوراعالىق ەتۋ؛ ت م د مەملەكەت باسشىلارى كەڭەسىنىڭ كەزەكتى وتىرىسىن وتكىزۋ.
ودان ءارى كەڭەيتىلگەن قۇرامدا كەزدەسۋ ءوتىپ، قۇجاتتارعا قول قويۋ جانە ب ا ق وكىلدەرىنە مالىمدەمە جاساۋ راسىمدەرى كوزدەلگەن.
