قايرات نۇرتاس: قازاقستاندا تۇرىپ مەن نەگە باسقا تىلدە سويلەۋىم كەرەك؟
اقساۋلە: قايرات، بۇل سۇحباتتىڭ باستى ماقساتى - قازاق تىلىندە ويلايتىن قوعامنىڭ كوشباسشىلارىنىڭ شىنايى بولمىسىن كورسەتۋ. كوپ ۋاقىتتان بەرى قازاقستاندا ەكى ءتىل قاتار دامىپ كەلەدى جانە وسى ەكى تىلدە سويلەيتىن ادامداردىڭ اراسىندا تۇسىنىسپەۋشىلىكتەر كوپ بولادى. ءسىز ادەتتە سۇحباتتى تەك قازاق تىلىندە بەرەسىز. بۇل قالاي بولعانى؟ ءسىز وسىلايشا «قازاق حالقىنا جاقىن» يميدج قالىپتاستىرعىڭىز كەلە مە؟
قايرات: جوق، بۇل يميدج قالىپتاستىرۋ ءۇشىن جاسالىپ جاتقان دۇنيە ەمەس، بۇل - مەنىڭ ازاماتتىق ۇستانىمىم. وسىلايشا ءوزىڭنىڭ كەز كەلگەن ىسكە يكەمىڭ بولسا، كەز كەلگەن تىلدە سويلەيتىن ورتانىڭ سۇرانىسىنا يە بولاتىندىعىڭدى دالەلدەگىم كەلەدى. ەشكىمنىڭ نامىسىنا تيمەيمىن، بار بولعانى قازاقستاندا قازاق تىلىندە سويلەگىم كەلەدى. مىسالى، قىتايدا بولعان كەزىمدە قىتاي تىلىندە سويلەۋگە تىرىسامىن. رەسەيدە ورىس تىلىندە. كوپشىلىك مەنى ورىس ءتىلىن بىلمەيدى دەپ ويلايدى. ءتىپتى دە ولاي ەمەس!
مەن الماتىدا 18 جىل تۇردىم، ال مۇنىڭ وزىندىك اسەرى بار ەكەنى انىق. استانادا شامامەن ون جىل ۋاقىت تۇرىپ كەلەمىن. بۇل قالالاردا قازاق ءتىلىنىڭ تارالۋى بىردەي دەسەك تە بولادى. مەنىڭ ورىس ءتىلدى دوستارىم بولعان جانە ولار قازىر دە بار. مەن ورىس ءتىلىن بىلەمىن، ءبىراق ولار مەنىمەن قازاق تىلىندە سويلەسۋگە تىرىسادى.
تاعى دا قايتالايمىن، مەن شەتەلگە ءجيى شىعامىن. ول جاقتا اعىلشىن تىلىندە سويلەيمىن. ياعني شاما-شارقىم كەلگەنشە سويلەۋگە تىرىسامىن. مەن نيۋ-يورك قالاسىنا بارىپ الىپ وزگەلەردىڭ مەنىمەن قازاق تىلىندە سويلەسكەنىن تالاپ ەتە المايمىن. قازاقستاندا تۇرىپ مەن نەگە باسقا تىلدە سويلەۋىم كەرەك؟ مەن جۇرتتىڭ انا تىلىندە سويلەيتىن ادامدارعا تاڭ قالاتىنىنا قايران قالامىن.
اقساۋلە: ءسىز اعىلشىن جانە قىتاي تىلدەرىن بىلەسىز بە؟
قايرات: قىتاي تىلىندە ايتقىم كەلگەن دۇنيەنى شامالاپ تۇسىندىرە الامىن. مەن ول جاقتا ايلاپ ءجۇرىپ كونسەرت قويىپ، گاسترولدىك ساپارلارعا باراتىن كەزىم بولادى. ءسوزىم جەتپەسە، ىم-يشارا تىلىمەن تۇسىندىرەمىن. (كۇلدى.)
اقساۋلە: مەن ءۇشىن ءسىزدىڭ قىتاي ءتىلىن بىلەتىندىگىڭىز جاڭالىق بولىپ تۇر.
قايرات: ءوز ەلىمدە انا تىلىمدە سويلەگىم كەلەدى. ماعان ورىس ءتىلدى ب ا ق وكىلدەرى سۇراقتارىن ورىس تىلىندە قويىپ جاتادى. مەن ءوز كەزەگىمدە قازاق تىلىندە جاۋاپ بەرەمىن. بۇل تىلدەسۋىمىزگە اسا كەدەرگى كەلتىرەدى دەپ ايتا المايمىن.
اقساۋلە: ... ءسىز گەي-كلۋبتار جايلى ايتىپ قالدىڭىز. قازاقستان جاھاندانۋدى اينالىپ وتە المايدى، ءبىز - وسى الەمنىڭ كىشكەنە عانا بولشەگىمىز. ولاردىڭ بار ەكەنىن مويىنداساق تا، قالىپتان تىس جىگىتتەردىڭ قۇقىعىن شەكتەيتىنىمىز انىق.
قايرات: مەن ەشكىمگە شەكتەۋ قويمايمىن. الايدا قازاقستاندا وسى ءۇردىستىڭ دامىپ كەلە جاتقانىنىڭ ءوزىن ەستىگەندە جانىم اۋىرادى. بۇل تۋرالى ويلاعان كەزدە، ءتىپتى كوزىمە ەرىكسىز جاس كەلەدى. قالايشا؟ ەركەك، جىگىت گەي بولۋى مۇمكىن؟
اقساۋلە: شەتەلدىك انشىلەرگە ەلىكتەيتىندەر تۋرالى ايتقان كەزدە بىردەن Ninety One توبى ەسىمە تۇسەدى. جاس جىگىتتەر وزدەرىن K-pop ءستيلىنىڭ وكىلى رەتىندە تانىستىرىپ ءجۇر. كيىنۋ مانەرلەرى دە قازاق ەستراداسىنا ءسال كەلىڭكىرەمەيدى. شاشتارىن ءتۇرلى تۇسكە بوياپ، سىرعا تاعادى. ارينە، مۇنىڭ بارلىعى ءوز كەزەگىندە ءداستۇرلى ونەردى جاقتاۋشىلاردىڭ اشۋىن كەلتىردى. ولار توپ جىگىتتەرىنىڭ كيىمدەرىن اۋىستىرىپ بەرگىلەرى كەلدى. قۇدايعا شۇكىر، جىگىتتەر ەشكىمگە قۇلاق اسپاي، ءوز جولدارىمەن ءجۇرىپ بارادى. ال ءسىز كىمدى جاقتايسىز؟
قايرات: مەن ولاردىڭ سىرت كەلبەتىن ۇناتپايتىن اعا-اپكەلەرىمدى تۇسىنەمىن. ءبىر جاعىنان Ninety One توبىن دا تۇسىنەمىن. ولاردى شىنايى ومىردە كورگەنمىن، قازاقتىڭ قاراپايىم جىگىتتەرى، وتە تارتىمدى ءارى ۇلكەندەرگە دەگەن سىي-قۇرمەتتەرى شەكسىز. ولاردى سىناي المايمىن. ولار سۇيىكتى ىستەرى ارقىلى ناندارىن تاۋىپ ءجۇر، بالكىم اتا-انالارىنا دا كومەكتەسىپ جاتقان بولار. ەگەر مەنەن كەڭەس سۇراسا، كومەگىمدى ايامايتىن ەدىم. جانكۇيەرلەرى ولاردى تابيعي شاش تۇسىمەن جاقسى كورەتىن ەدى. (كۇلدى.)
