نۇرسۇلتان نازاربايەۆ: الەمدەگى ءاربىر ءدىن ءبىزدى ىنتىماققا، ىزگىلىككە، ءبىر-ءبىرىمىزدى قۇرمەتتەۋگە شاقىرادى

استانا. قازاقپارات - مەملەكەت باسشىسى نۇرسۇلتان نازاربايەۆ «ازىرەت سۇلتان» مەشىتىندە بولدى، دەپ حابارلادى اقوردانىڭ باسپا ءسوز قىزمەتى.

مەملەكەت باسشىسى كوپشىلىك الدىندا سويلەگەن سوزىندە بارشا قازاقستاندىقتاردى قۇربان ايت مەيرامىمەن قۇتتىقتادى، سونداي-اق جينالعان جاماعاتپەن اڭگىمەلەستى.

- بۇگىن كۇللى الەمنىڭ جانە قازاقستاننىڭ مۇسىلماندارى جارقىن مەرەكە - قۇربان ايتتى مەرەكەلەپ جاتىر. بارشاڭىز بىلەسىزدەر، 10 جىلدان بەرى قۇربان ايت پەن روجدەستۆو دەمالىس كۇندەرى بولىپ سانالادى. بۇل - يسلام دىنىنە دە، حريستيان دىنىنە دە مەملەكەت قامقورلىعىنىڭ كورىنىسى، - دەدى قازاقستان پرەزيدەنتى.

سونداي-اق، نۇرسۇلتان نازاربايەۆ تاۋەلسىزدىك جىلدارىندا قول جەتكەن تابىستىڭ ءبارى ەلىمىزدەگى بىرلىك پەن تىنىشتىقتىڭ ارقاسى ەكەنىن اتاپ ءوتتى.

- الەمدەگى ءاربىر ءدىن ءبىزدى ىنتىماققا، ىزگىلىككە، ءبىر-ءبىرىمىزدى قۇرمەتتەۋگە شاقىرادى. قۇراندا ءوزىڭ توق بولىپ، كورشىڭ اش وتىرسا، سەن مۇسىلمان بولىپ سانالمايسىڭ دەلىنگەن. وندا مۇسىلمانداردىڭ اعىمعا، جىككە بولىنبەيتىنى دە ايتىلعان. ناعىز مۇسىلمان - ەل-جۇرتقا، قوعامعا، وتانىنا كومەكتەسەتىن، بارلىق ءدىندى بىردەي كورەتىن ادام، - دەدى مەملەكەت باسشىسى.

سوڭىندا قازاقستان پرەزيدەنتى بارشانى تاعى دا مەرەكەمەن قۇتتىقتاپ، باق-بەرەكە جانە تابىس تىلەدى.