قىتاي حالقى قازاقستاننىڭ ەسەكتەرىنە كوز ءسۇزىپ وتىر

استانا. قازاقپارات - قىتايعا ءالى ەت ەكسپورتىن ۇيىمداستىرىپ بىتپەگەن اۋىل شارۋاشىلىعى مينيسترلىگى، كورشىلەرگە ەسەك ەتى مەن تەرىسىن دە تاسىمالدايمىز دەپ وتىر.

ايتۋلارىنشا، قىتاي ەلى قازىر ەسەكتىڭ ەتىنە اسا قىزىعىپ وتىرعان كورىنەدى دەپ حابارلايدى 31- ارنا.

ەت تاسىمالى نەگىزىنەن قىتايدىڭ باتىسىنا، ياعني مۇسىلماندار: قازاق پەن ۇيعىر، دۇنگەندەر شوعىرلانعان جەرىنە جىبەرىلسە، ەسەك ەتى مەن تەرىسى ورتالىق قىتايعا دەيىن بارماق.

«قازىر قىتاي تاراپىنان ەسەكتىڭ ەتى مەن تەرىسىنە سۇرانىس ارتىپ وتىر. وسىنى ەسكەرىپ قازاقستاننىڭ وڭتۇستىك ايماقتارىندا ارنايى شارۋاشىلىقتار اشپاقپىز. ول جەرلەردە ارنايى قىتايعا ەكسپورتتالاتىن ەسەكتەر وسىرىلەدى»، - دەيدى اۋىل شارۋاشىلىعى ۆيتسە-ءمينيسترى گۇلميرا يسايەۆا.

ال قازاقستاندىق شارۋالار تاعاتسىزدانا كۇتكەن جىلقى، سيىر ەتىنىڭ قىتايعا ەكسپورتى جىل سوڭىندا باستالادى. قىركۇيەكتىڭ اياعىندا قىتاي ينسپەكتسياسىنان تەكسەرۋشىلەردىڭ سوڭعى لەگى كەلىپ، شارۋاشىلىقتاردى شولىپ شىقپاق. ازىرگە قىتايعا ەت شىعارۋعا ءازىر دەپ تاڭدالعان كاسىپورىنداردى كورشى ەل ماقۇلداسا، جىل سوڭىنا دەيىن ولار تاسىمالدى باستايدى.