جامبىل وبلىسىنداعى تۋريستىك نىسان - اقىرتاسقا بارۋ اقىلى بولادى - فوتو
«2015 -جىلى ق ر مادەنيەت جانە سپورت مينيسترىگىنىڭ بۇيرىعىمەن ق ر «مەملەكەتتىك مۇلىك تۋرالى» 15 بابى، 13 بولىمىنە سايكەس، رەسپۋبليكالىق مەملەكەتتىك كاسىپورىنداردىڭ اقىلى قىزمەتىن وزەكتى ەتۋ ءۇشىن، اقىلى قىزمەت كورسەتۋ تۇرلەرىنىڭ ەرەجەلەرى بەكىتىلدى، - دەدى مەملەكەتتىك «ەجەلگى تاراز ەسكەرتكىشتەرى» تاريحي- مادەني قورىق- مۇراجايىنىڭ ديرەكتورى تاكەن مولداقىنوۆ «قازاقپارات» ح ا ا تىلشىسىنە بەرگەن سۇحباتتا.
- ەندى ءبىزدىڭ ۇيىم مەملەكەتتىك قازىناشىلىق كاسىپورىن (م ق ك) مارتبەسىن يەلەنگەن سوڭ، ءوزىن- ءوزى قارجىلاندىرىپ، ءوز بەتىمەن قاراجات تابۋى ءتيىس. ول ءۇشىن جامبىل وبلىسىنداعى بىرنەشە تۋريستىك نىساندارعا بارۋدى اقىلى ەتۋ جوسپارلاندى. ولار ت. رىسقۇلوۆ اۋدانىنداعى اقىرتاس قالاشىعى، جامبىل اۋدانىنداعى ايشا ءبيبى كەسەنەلەرى جانە تاراز قالاسىنداعى قاراحان كەسەنەسى».
الايدا، جامبىل وبلىسى اكىمىنىڭ ورىنباسارى ەرقانات ءمانجۋوۆ قاسيەتتى ورىندارعا زيارات ەتۋشىلەردىڭ مۇددەلەرى ەسكەرىلگەنىن ايتتى.
«تەك قانا اقىرتاسقا رۇقسات ەتىلدى، سول نىسان عانا اقىلى، قالعان نىساندارعا تەگىن بارۋعا بولادى»، - دەپ ءمالىم ەتتى ە. ءمانجۋوۆ.
تاكەن مولداقىنوۆتىڭ ايتۋىنشا، «ەجەلگى تاراز ەسكەرتكىشتەرى» قورىق- مۇراجايى جەتكىلىكتى تۇردە قارجىلاندىرىلمايدى. «وبلىسىمىزداعى ارحەولوگيالىق جۇمىستار مەن نىسانداردى جوندەۋگە بولىنەتىن قاراجات قازبا جۇمىستارىمەن اينالىساتىن ۇيىمدارعا جىبەرىلەدى. بۇل قارجىنى ءبىز كورمەيمىز دە. ەكسكۋرسيا جەتەكشىلەرى، جۇرگىزۋشىلەر، تەحنيكالىق جۇمىسشىلاردان قۇرالعان كىشىگىرىم شتاتىمىزدا 15 ادام بار. جامبىل وبلىسىنىڭ كوپتەگەن تاريحي ەسكەرتكىشتەرى ءبىزدىڭ باقىلاۋىمىزدا. بۇل جاعدايدا بىزگە ەسكەرتكىشتەرى ساقتاپ قالۋ ەمەس، تۇرعىن ءۇي- كوممۋنالدى قىزمەتتەر اقىسى مەن قىزمەتكەرلەر ەڭبەكاقىسىن قالاي تولەيمىز دەپ باس قاتىرۋعا تۋرا كەلەدى»، - دەدى «ەجەلگى تاراز ەسكەرتكىشتەرى» تاريحي- مادەني قورىق- مۇراجايىنىڭ ديرەكتورى.
اقىرتاس - جامبىل وبلىسىنداعى ادام كوپ كەلەتىن تۋريستىك نىسانداردىڭ ءبىرى. ۇلكەن قىزىل تاستاردان سالىنعان بۇل بىرەگەي تاريحي نىسان ءوزىنىڭ تىلسىم قۇپياسىمەن قازاقستاندىق جانە شەتەلدىك عالىمداردىڭ قىزىعۋشىلىعىن تۋعىزۋدا. «ەجەلگى تاراز ەسكەرتكىشتەرى» تاريحي- مادەني قورىق- مۇراجايىنىڭ قامقورلىعىمەن جولدان جىراق، سۋسىز، قۇمدى اۋماقتا ورنالاسقان بۇل تاريحي كەشەن رەتكە كەلتىرىلدى. مۇندا ارحەولوگتارعا ارنالعان كونفەرەنس- زالى، كىشىگىرىم قوناق ءۇيى جانە جۇمىس كابينەتتەرى بار عىلىمي اقپاراتتىق- ساراپتامالىق ورتالىق عيماراتى سالىندى.
اقىرتاس تۋرالى العاش رەت 1222 -جىلى قىتايدان سايرام ارقىلى سامارقاندقا، شىڭعىسحان قوسىنىنا بارعان داوسس تاحۋاسى چاڭ چۋننىڭ كۇندەلىگىندە ايتىلادى.
