دجەك ما: نازاربايەۆ ءبىزدىڭ ۇرپاقتىڭ كۋميرى ءارى اسا كورنەكتى كوشباسشى

استانا. قازاقپارات - قازاقستان پرەزيدەنتى نۇرسۇلتان نازاربايەۆ ءبىزدىڭ ۇرپاقتىڭ كۋميرى ءارى اسا كورنەكتى كوشباسشى.

بۇل تۋرالى قازاقستان جۋرناليستەرىنە سۇحبات بەرگەن Alibaba Group  قىتاي ينتەرنەت-كومپانياسىنىڭ نەگىزىن قالاۋشى ءارى ديرەكتورلار كەڭەسىنىڭ ءتوراعاسى دجەك ما ايتتى.

«پرەزيدەنتتىڭ G20 اياسىنداعى تىعىز كەستەسىنە قاراماستان بىزبەن كەزدەسۋ ءۇشىن ۋاقىت بولگەنىنە تاڭ-تاماشا بولدىم. مەنىڭشە، بۇل قازاقستاننىڭ شاعىن جانە ورتا بيزنەسى، جاستارى جانە تولىقتاي العاندا سىزدەردىڭ ەلدەرىڭىزدىڭ ەكونوميكاسى ءۇشىن قىزىقتى ءارى ماڭىزدى بولماق. ءبىز لوگيستيكا سالاسىنداعى، سونىمەن بىرگە شاعىن جانە ورتا بيزنەس، جاستار ءۇشىن قارجىلىق جاعدايدى جەتىلدىرۋ بويىنشا ىنتىماقتاستىق الەۋەتىن تالقىلادىق»، - دەدى ول قازاقستان پرەزيدەنتى نۇرسۇلتان نازاربايەۆپەن كەزدەسۋىنەن كەيىن.

«سىزدەردىڭ پرەزيدەنتتەرىڭىز، - دەپ جالعادى ءسوزىن ول، ءوز ەلىن بىرنەشە جىل العا قاراي ىلگەرىلەتىپ، مەملەكەتتى جاڭعىرتۋمەن قاتار جاقسى ومىرگە جەتەلەپ كەلە جاتقان اسا كورنەكتى كوشباسشى».

«قازاقستانداعى كونفەرەنتسياعا قاتىسقان كەزىمدە ەشتەڭە جوق جەردەن جاڭا استانا سالۋعا نەبارى 17 جىل ۋاقىت كەتكەنىن ەستىگەندە زور تاڭدانىستا بولدىم. ول سۇلۋ دا زاماناۋي قالا. مەن ءتىپتى الەمنىڭ قانداي دا ءبىر بولىگىندە نەبارى 17 جىلدىڭ ىشىندە وسىنداي قالا سالۋعا بولادى دەگەندى كوز الدىما ەلەستەتە دە الماس ەدىم. Alibaba كومپانياسىنا دا قۇرىلعانىنان وسى ۋاقىتقا دەيىن 17 جىل ءوتتى. مەنىڭ ويىمشا، كومپانيا قۇرۋ وڭاي ءىس ەمەس. ءبىراق، مۇنداي قالا سالىپ، ەلدى گۇلدەندىرۋ ودان دا قيىن ەكەندىگى ءسوزسىز»، - دەپ اتاپ ءوتتى دجەك ما.

سونىمەن قاتار قىتايلىق كاسىپكەر ءوز تابىسىنىڭ قۇپياسىمەن دە ءبولىستى.

«ەگەر سەن تابىستى بولعىڭ كەلسە، وندا ءوزىڭنىڭ جانە وزگەلەردىڭ بولاشاعىنا جاۋاپكەرشىلىكپەن قارا. ساعان كوپ جۇمىس ىستەۋ قاجەت، وزگەلەردى ءتۇسىنىپ، ولاردى قۋاتتاندىرىپ وتىرۋعا ءتيىسسىڭ. مەن قازاقستان باسشىسىنىڭ ىجداھاتتى جۇمىسىنا تاڭ قالدىم. قازاقستان پرەمەر- مينيسترىمەن دە جاقسى قارىم-قاتىناستامىن. ال بۇگىن پرەزيدەنتپەن كەزدەسۋ مارتەبەسى بۇيىردى. مەن قازاقستان ءۇشىن ءبىر نارسە جۇزەگە اسىرۋ مۇمكىنشىلىگىن العانىما ريزامىن. ءبىز قازاقستاندىق جاستاردىڭ باسىم بولىگىمەن جۇمىس ىستەي الاتىن بولامىز دەپ ۇمىتتەنەمىن»، - دەپ اتاپ ءوتتى ول.

اۆتور: مارلان جيەمباي