ا ق ش پەن قازاقستان ۇكىمەتتەرى يادرولىق قاۋىپسىزدىك سالاسىندا تابىستى ىنتىماقتاستىقتىڭ جەمىسىن كورۋدە - دەينا رورابەيكەر

استانا. قازاقپارات - ا ق ش پالاتاسىنىڭ ەۋروپا، ەۋرازيا جانە جاڭا قاۋىپتەر جونىندەگى كوميتەتىنىڭ ءتوراعاسى، رەسپۋبليكالىق كونگرەسمەن دەينا رورابەيكەر قازاقستاندا وتكەن «يادرولىق قارۋسىز الەم قۇرۋ» كونفەرەنتسياسىنا قاتىستى مالىمدەمە جاسادى، دەپ جازادى «ەگەمەن قازاقستان» گازەتى.

«بۇكىل الەمنەن تەحنيكا ماماندارى مەن ساياسي باسشىلار «يادرولىق قارۋسىز الەم قۇرۋ» ماقساتىندا استاناداعى حالىقارالىق كونفەرەنتسيادا باس قوستى. سوڭعى 25 جىلدا ا ق ش پەن قازاقستان ۇكىمەتتەرى يادرولىق ماتەريال قاۋىپسىزدىگى مەن قىرعي-قاباق سوعىس زامانىنىڭ يادرولىق بەلسەندىلىگىنىڭ سالدارىن ازايتۋ ىسىندەگى تابىستى ىنتىماقتاستىقتىڭ جەمىسىن كورۋدە. مەملەكەتتەرىمىزدىڭ بىرلەسكەن جۇمىسى وڭىرلىك تۇراقتىلىق پەن حالىقارالىق قاۋىپسىزدىكتى ارتتىرۋ ىسىنە ءوز ۇلەسىن قوستى.

كونفەرەنتسيانىڭ وتكىزىلۋ كۇنى ب ۇ ۇ- نىڭ يادرولىق سىناقتارعا قارسى ءىس-قيمىلدىڭ حالىقارالىق كۇنىمەن سايكەس كەلەتىنى زاڭدى. مەن قازاقستان حالقىنىڭ يادرولىق قارۋسىزدانۋعا دەگەن بۇلجىماس سەنىمدىلىگىن جانە ەل ۇكىمەتىنىڭ بۇل سالاداعى دايەكتى ءىس-قيمىلىن جوعارى باعالايمىن. مەن كونفەرەنتسياعا ساتتىلىك تىلەيمىن»، دەگەن دەينا رورابەيكەر.