كوكشەتاۋدا «اق ورامال» اكسياسى ءوتتى - كەسكىن
اكسيا بارىسىندا باستارىنا اق ورامال تاققان انالار اباي كوشەسىنىڭ بويىمەن ءجۇرىپ ءوتىپ، تاۋەلسىزدىك الاڭىنا جينالدى. وندا وبلىستىق باسقارمالار مەن كوكشەتاۋ قالالىق اكىمدىگىنىڭ قىزمەتكەرلەرى، قازاقستان حالقى اقمولا اسسامبلەياسىنىڭ جانىنداعى انالار كەڭەسى، اقمولا وبلىسى ىسكەر ايەلدەر قاۋىمداستىعىنىڭ مۇشەلەرى الەمدەگى يادرولىق سىناقتاردىڭ قۇرباندارىن ءبىر مينۋت ۇنسىزدىكپەن ەسكە الدى.
ءىس- شارادا قازاقستان حالقى اقمولا اسسامبلەياسى حاتشىلىعىنىڭ مەڭگەرۋشىسى مارال جاقىپوۆا، قوعام قايراتكەرى، اقىن، كوكشەتاۋ قالاسىنىڭ قۇرمەتتى ازاماتى ءشامشيا ايتجانوۆا، «باري» ارميان مادەني ورتالىعىنىڭ بەلسەندى وكىلى استگيك تورويان، پولياك قوعامدىق بىرلەستىگىنىڭ ۇيلەستىرۋشىسى ليۋدميلا سۋحوۆەتسكايالار الەمدىك ءقاۋىپ- قاتەرلەر مەن بەيبىتشىلىككە باستار جول جايىندا ءوز ويلارىن ورتاعا سالدى.
تاۋەلسىزدىك الاڭىنداعى جيىننان كەيىن اق جاۋلىقتى انالار التى توپقا ءبولىنىپ، قالاداعى ەسكەرتكىشتەرگە اق ورامال مەن گۇل شوقتارىن قويدى. انالار ۇلى وتان سوعىسىندا قازا تاپقان جەرلەس جاۋىنگەرلەر قۇرمەتىنە ارنالعان داڭق وبەليسكىسىنە، كەڭەس وداعىنىڭ ەكى دۇركىن باتىرى تالعات بيگەلدينوۆتىڭ، كەڭەس وداعىنىڭ باتىرى مالىك ءعابدۋلليننىڭ، اۋعانستاندا قازا تاپقان جاۋىنگەرلەردىڭ، چەرنوبىل اتوم ەلەكتر ستانساسىنداعى اپاتتى جويۋعا قاتىسقان اقمولالىقتاردىڭ ەسكەرتكىشتەرى مەن ساپارجايدا ورنالاسقان «انانىڭ اق تىلەگى» ەسكەرتكىشىنە بارىپ تاعزىم ەتتى.
اتالعان شارا كەشكىسىن وبلىستىق جاستار ساياساتى ماسەلەلەرى جونىندەگى باسقارماسىنىڭ ۇيىمداستىرۋىمەن «قازاقستاننىڭ بولاشاعى ءبىزدىڭ قولىمىزدا» اتتى جاستار اكسياعا ۇلاسادى دەپ جوسپارلانعان.
اۆتور: اسلان وسپانوۆ
