گۇلشارات جۇبايەۆا: جۇرت «قازاق ۇلتىن ۇياتقا قالدىردىڭ» دەپ قازىرگە دەيىن جەردەن الىپ، جەرگە سالادى

استانا. قازاقپارات - «كەلىن» فيلمى ارقىلى تانىلعان تالانتتى اكتريسا گۇلشارات جۇبايەۆا كينو ونەرىمەن قاتار تىگىنشىلىك قابىلەتىن دە ۇنەمى شىڭداپ، جاڭا تۋىندىلار جاساۋدا.
None
None

سونداي- اق، «ىڭكار جۇرەك» كوپسەريالى مەلودراماسىنا دا ءتۇسىپ جاتىر.

بۇل تۋرالى el.kz حابارلايدى.

«ونداي كينولارعا شاقىرتۋلار ءالى دە كەلەدى. جۇرت «قازاق ۇلتىن ۇياتقا قالدىردىڭ» دەپ قازىرگە دەيىن جەردەن الىپ، جەرگە سالىپ جاتادى. ءيا، مۇمكىن ۇياتقا قالدىرسام، قالدىرعان دا شىعارمىن. ءبىراق، بۇل اتى دارداي «قازاقفيلم» كينوستۋدياسىنىڭ جۇمىسى، مەن تەك وبرازدى سومداۋشى اكتريسامىن. فيلمنىڭ ورتاسىنا كەلگەندە جىلاپ، ارى قاراي تۇسكىم دە كەلمەدى. سوندا جاۋاپتى تۇلعالار «بۇل - قازاق ونەرى. كينو مەملەكەتتىڭ قارجىسىنا ءتۇسىرىلىپ وتىر. كىمدى ويىنشىق قىلعىڭ كەلەدى؟!» دەپ ۇرىستى. وسىدان سوڭ «مۇمكىن قازاق كينو ونەرىنە راسىمەن ۇلەس قوساتىن بولارمىن» دەپ ويلاعانىم راس. الۋان ءتۇرلى كوزقاراس بار، اركىمگە بىردەي ۇناي المايسىڭ.

«كەلىن» فيلمىن ءساتسىز تۋىندى دەپ ايتا المايمىن، وزىندىك ءتىلى بار جانرلىق فيلم. سول جىلدارى اكەم وزبەكستاندا قالىپ، شەشەم اتىراۋدا بولدى. سوندا الماتىدا قارا باسىمنىڭ قامىمەن جۇرگەن، جاناشىرى جوق مەن ءۇشىن «كەلىن» فيلمى بىردەن- ءبىر مۇمكىندىگىم بولار دەگەن ويدا بولدىم. ول جەردە بىلدەي رەجيسسەر مەن ستسەناريستەر وتىر. سوندىقتان، جامانات پەن قارعىستى جالعىز ءوزىم ارقالاۋىم ادىلەتسىزدىك دەپ ويلايمىن. بۇدان كەيىن دە «ءسىز كىمسىز، كا مىرزا؟»، «م- اگەنت»، «اكە سەرتى» سياقتى بىرنەشە فيلمدەردە وينادىم. مىسالى، ە. راقىشيەۆتىڭ «م- اگەنت» فيلمىنىڭ كاسىبي تۇرعىدا كەمشىلىگى بولسا دا، ايتار ويى، ماعىناسى تەرەڭ. جۋرناليستەر قاۋىمى سونى نەگە ايتپايدى؟ جوق، ون جىل بۇرىنعى سول تاقىرىپتى قايتالاپ ايتا بەرەدى، قازا بەرەدى. ىزدەگەن ادامعا اۋىز تولتىرىپ ايتارلىقتاي جۇمىستارىم بارشىلىق»، - اكتريسا.

اكتريسا اركەز ەڭبەك ەتۋ كەرەك ەكەنىن، ءسال وتىرىپ قالسا كۇيزەلىسكە ۇشىرايتىنىن دا ايتتى.

«تىنىش وتىرىپ قالسام، دەپرەسسياعا تۇسەمىن. قازىر ونسىز دا بولمايدى. ءومىر ءوتىپ بارا جاتىر. جاستار جۇمىسقا قۇلشىنىسسىز كەلەدى، ىنتا جوق، ولارعا قاراپ تۇرىپ، ءىشىڭ پىسادى. ءبىراق، وزدەرى جۇمىستى قوپارىپ تاستاعانداي جۇرەدى. اركىم ءوز شاماسىنا قاراپ قيمىلداۋ كەرەك. بالا- شاعا ءوسىپ كەلە جاتىر. اباي اتامىز دا ايتادى عوي، «ەڭبەك ەتسەڭ ەرىنبەي، تويادى قارنىڭ تىلەنبەي» دەپ. ءوزىم قاراپايىم وتباسىنىڭ قىزىمىن. ورالمانمىن، جەر اۋىستىرىپ، ورتاعا ءسىڭىسۋ وڭاي بولعان جوق. كوشەدە قاڭعىپ، پودەزدەرگە تۇنەگەن كەزدەرىمىز بولدى. سونداي كەزەڭدەردى باستان وتكەرگەن سوڭ، قازىرگى كۇنىمە شۇكىرشىلىك قىلامىن. ونەر ادامى ءوز ىسىنە كوڭىلى تولىپ، قاناعات تانىتاتىن بولسا - كورەرمەنگە اينالعانى. سوندىقتان، جاڭا زاتتارعا، جاڭالىققا قۇمار بولىپ، ۇنەمى ىزدەنىستە جۇرەمىن»، - دەدى ول.

ونى كوپشىلىك رەسەيدەن كەلگەن قازاق دەپ ويلايدى ەكەن. ال شىن مانىندە اكتريسا وزبەكستاننىڭ نۇكىس قالاسىندا تۋعان.

«شەتتەتۋ قاي جەردە دە بولادى. قالىڭ وزبەكتىڭ ورتاسىندا جۇرگەندە «قازاق، قازاق» دەپ ءبولىپ تاستادى. ەندى مىنا جاققا كەلگەندە «قاراقالپاق» دەگەندى دە كوردىك. مەن ءۇشىن بۇل قالىپتى جاعداي، وعان رەنجىمەيمىن. ءوز ءومىرىمدى ءوزىم قۇرىپ كەلەمىن، تالماي ەڭبەكتەنىپ كەلەمىن، ناتيجە جوق ەمەس. ال باسقاسىنىڭ ءبارى بەكەر. قايدان كوشىپ كەلسەم دە، ماڭداي اقى، تابان تەرىممەن ەڭبەكتەنىپ ءجۇرمىن. بىرەۋگە بىردەڭەنى دالەلدەۋ ءۇشىن جۇرگەن جوقپىن، ءوزىم ءۇشىن ءومىر سۇرەمىن. ايتسا ايتا بەرسىن، ماعان ءبارىبىر. شىنتۋايتىندا، قاسىمداعى جاقىندارىم مەنىڭ كىم ەكەنىمدى بىلەدى، تۇسىنەدى، جاقسى كورەدى»، - دەدى گۇلشارات جۇبايەۆا.

 

سوڭعى جاڭالىقتار