ريو وليمپياداسىندا العاش رەت التىن العان ەلدەر - فوتو

مۇنى تاۋەلسىز قازاق ەلىنىڭ سپورتىنداعى زور جەتىستىك دەپ باعالاۋعا بولادى. ال ريو وليمپياداسىنا دەيىن ءوز تاريحىندا وليمپيادا چەمپيونى شىقپاعان ەلدەر دە جەتەرلىك ەدى...
برازيليادا وتكەن ХХХІ جازعى وليمپيادا ويىندارىندا ءبىرشاما ەلدەر ءوز تاريحىنداعى العاشقى التىن جۇلدەلەرىنە قول جەتكىزدى. بۇل التىن جۇلدەنى جارتى عاسىردان استام ۋاقىت كۇتكەن ەلدەر دە بولدى. ولاي بولسا ريودا ءوز ەلىنە تاريحي جەڭىس سىيلاعان سپورتشىلاردى تانىستىرا وتىرايىق.
دجوزەف سكۋلينگ (سينگاپۋر)
سينگاپۋر ەلى وليمپيادا ويىندارىنا 68-جىلدان بەرى قاتىسىپ كەلە جاتقانمەن، بىردە-ءبىر سپورتشى وليمپ شىڭىنان كورىنبەگەن. 2012-جىلى ەلدىڭ باسشىلىعى چەمپيون اتانعان سپورتشىعا ەڭ قوماقتى قارجى بەرۋگە شەشىم قابىلدادى. الايدا لوندوندا سينگاپۋر سپورتشىلارىنا التىن جۇلدە بۇيىرعان جوق.
سينگاپۋرعا التىن مەدال ريودا بۇيىردى. 100 مەترگە باتتەرفلياي ادىسىمەن جۇزۋدە دجوزەف سكۋلينگ ايگىلى مايكل فەلپستى باسىپ وزىپ، الەم رەكوردىن جاڭارتتى. 2008-جىلى بەيجىڭدەگى وليمپيادا ويىندارى الدىندا امەريكالىق سپورتشىنى كۋميرى ساناپ سۋرەتكە تۇسسە، اراعا 8 جىل سالا ەلىكتەگەن تۇلعاسىنان ۇزدىك شىقتى. سونداي-اق دجوزەف سكۋلينگ - وليمپيادادا جۇلدە العان العاشقى سينگاپۋرلىق سپورتشى دا. وسىعان دەيىن وسى ەلدىڭ اتىنان سىنعا ءتۇسىپ، جۇلدە العان سپورتشىلاردىڭ بارلىعى قىتايدان كەلگەن لەگيونەرلەر ەكەن.
سينگاپۋر ەلىنىڭ بيلىگى ءوز تاريحىندا العاش رەت چەمپيون اتانعان دجوزەف سكۋلينگكە قوماقتى سىياقى تابىستاماق.
مونيكا پۋيگ (پۋەرتو-ريكا)
پۋەرتو-ريكا - ا ق ش- قا «ءوز ەركىمەن قوسىلعان» جانە ءوزىن-ءوزى باسقارۋعا قۇقىلى مەملەكەت. جوعارعى بيلىگى ا ق ش كونگرەسىنىڭ قولىندا. وليمپيادا ويىندارىنا 1948-جىلدان بەرى قاتىسىپ كەلەدى. 68 جىل ىشىندە ەل سپورتشىلارىنا بىردە-ءبىر التىن مەدال بۇيىرماعان. ريودا بۇل جەتىستىكتى ءبىرىنشى بولىپ تەننيسشى مونيكا پۋيگ باعىندىردى.
مونيكا پۋيگ WTA رەيتينگىندە 34-ورىندا تۇرعان تەننيسشى. سپورتتىق مانسابىندا ءىرى جەتىستىكتەرگە كوپ قول جەتكىزبەگەن. دەسە دە ريوداعى وليمپيادا ويىندارىندا گابرينە مۋگۋرۋسا، پەترا كۆيتوۆا جانە انگەليك كەربەر سەكىلدى تاجىريبەلى تەننيسشىلەردى جەڭىپ، جەڭىمپاز اتاندى. ەلىنىڭ ابىرويىن اسىردى.
حوانگ سۋان ۆين (ۆەتنام)
نىسانا كوزدەۋ - وليمپيادا ويىندارىنداعى بولجاپ بولمايتىن سپورت ءتۇرىنىڭ ءبىرى. كوبىنە سپورتشىلاردىڭ جارىس كۇنگى كوڭىل-كۇيىنە دە بايلانىستى بولىپ جاتادى. ماسەلەن ۆەتنامدىق حوانگ سۋان ۆين حالىقارالىق جارىستاردا ءساتتى ونەر كورسەتكەنمەن، وليمپيادادا جولى بولماي كەلگەن ەدى. 2012-جىلى لوندوندا 0,1 ۇپاي ناتيجەسى جەتىسپەي قولادان قاعىلعان-دى. ريوداعى وليمپيادادا مەرگەن بار شەبەرلىگىن سالدى. سوندا دا سوڭعى مۇمكىندىگىن عانا ءساتتى پايدالانىپ، وليمپيادا چەمپيونى اتاندى. ۆەتنام ەلىنىڭ سپورتشىلارى 64 جىل بويى جەڭبەگەن التىن مەدالدى جەڭدى.
فيدجي
فيدجي ارالدىق ەلى دە وليمپياداداعى 60 جىلدىق تاريحىندا العاش رەت التىن مەدالدارىنا قول جەتكىزدى. برازيليادا رەگبيدەن ەرلەر قۇراماسى فينالدا ۇلى بريتانيانى 43:7 ەسەبىمەن ۇتىپ، چەمپيوندىق اتاققا قول جەتكىزدى. ەل باسشىلىعى سپورتشىلاردىڭ تاريحي جەڭىسىنە ەرەكشە قۇرمەت كورسەتىپ، ەلدە مەرەكەلىك دەمالىس جاريالادى.
شەيك سيسسە (كوت- د'يۆۋار)
كوت- د'يۆۋار ەلىنىڭ سپورتشىلارى 1984-جىلدان بەرى وليمپيادا جۇلدەسىنە قول جەتكىزبەگەن. ريودا بۇل ەلدىڭ سپورتشىلارى ەكى بىردەي مەدال جەڭىپ الدى. ونىڭ ءبىرى - التىن. تحەكۆوندودان 80 كەلىگە دەيىنگى سالماقتا شەيك سيسسە فينالدا بريتاندىق لۋتاللا مۋحاممادتى 8:6 ەسەبىمەن ۇتىپ، وليمپيادا چەمپيونى اتاندى. قارا قۇرلىقتاعى ەلدىڭ العاشقى تاريحي جەڭىسىن الىپ كەلدى. قولانى دا تاەكۆوندودان رۋت گباگبي يەلەندى.
احماد ابۋگاۋش (يوردانيا)
يوردانيادا ۇرىس- توبەلەس سپورتىنىڭ تۇرلەرى دامىعان. ەلدە تحەكۆوندومەن اينالىساتىن سپورتشىلار جەتەرلىك. 36 جىلدان بەرى وليمپيادا ويىندارىندا بۇل ەلدىڭ سپورتشىلارىنا التىن جۇلدە بۇيىرماعان. ناتيجەسىندە العاش بولىپ تحەكۆوندو سپورتىنان چەمپيون شىقتى. 68 كەلىگە دەيىنگى سالماقتا احماد ابۋگاۋش فينالدا رەسەيلىك الەكسەي دەنيسەنكو ۇتىپ، وليمپ شىڭىنان كورىندى. 20 جاستاعى سپورتشى يوردانياعا پالەستينادان كەلگەن بوسقىننىڭ ۇلى ەكەن.
تحەكۆوندو - وليمپيادا ويىندارىنا 2000-جىلى ەندى. بالكىم، ودان ەرتە كىرگەندە يوردانيالىقتار 36 جىل بويى وليمپيادا چەمپيونىنىن كۇتپەس پە ەدى؟ كىم ءبىلسىن؟!
رۋت دجەبەت (باحرەين)
باحرەين ەلى 1984-جىلدان (لوس- اندجەلەس) بەرى وليمپيادا ويىندارىنا قاتىسىپ كەلەدى. 2008-جىلى بەيجىڭدە ەلدىڭ ماروككولىق لەگيونەرى راشيد رامزي 1500 مەترگە جۇگىرۋدە جەڭىمپاز اتاندى. كەيىننەن سپورتشىنىڭ دوپينگ قولدانعانى دالەلدەنىپ، جۇلدەسى كەرى قايتارىلدى. ناتيجەسىندە ريودا باحرەين قۇراماسىنىڭ تاريحىندا العاشقى التىندى رۋت دجەبەت يەلەندى. ول دا راشيد رامزي سەكىلدى لەگيونەر سپورتشى. تەگى كەنيالىق رۋت دجابەت 3000 مەترگە كەدەرگىلەر ارقىلى جۇگىرۋدە الدىنا جان سالعان جوق.
ديلشود نازاروۆ (تاجىكستان)
تاجىكستان قۇراماسى دا قازاقستان سەكىلدى 1996-جىلدان بەرى وليمپيادا ويىندارىنا قاتىسا باستادى. كەڭەس ۇكىمەتى كەزىندە بۇل ەلدەن تالاي اتاقتى سپورتشىلار شىققانمەن، تاۋەلسىزدىك جىلدارىنداعى العاشقى التىن جۇلدەسى 20 جىل كۇتتىردى. ريودا تاجىكستان ەلىنىڭ نامىسىن قورعاعان ديلشود نازاروۆ شاربالعا لاقتىرۋدان وليمپيادا چەمپيونى اتاندى.
مايليندا كەلمەندي (كوسوۆو)
كوسوۆو ХХХІ جازعى وليمپيادا ويىندارىنا تۇڭعىش رەت تاۋەلسىز ەل رەتىندە قاتىستى. ريوعا بۇل ەلدىڭ نامىسىن قورعاۋعا 8 سپورتشى باردى. 7- تامىز كۇنى كوسوۆونىڭ وليمپيادا ويىندارىنداعى العاشقى چەمپيونى شىقتى. دزيۋدودان 52 كەلىگە دەيىنگى سالماقتا مايليندا كەلمەندي جەڭىمپاز اتاندى.
مايليندا كەلمەندي وسىدان ءتورت جىل بۇرىن لوندوندا البانيا قۇراماسىنىڭ نامىسىن قورعاپ، جۇلدەلى ورىننان كورىنە الماعان ەدى. كەيىننەن كوسوۆو ەلىنىڭ اتىنان شىعىپ، ەكى رەت الەم چەمپيوناتىندا توپ جاردى. سوندىقتان دا وليمپياداداعى جەتىستىگىن كەزدەيسوقتىق دەپ باعالاۋعا كەلمەيدى.
ريو-دە-جانەيرودا اياقتالعان جازعى وليمپيادا ويىندارىندا كۋۆەيت ەلىنەن العاشقى وليمپيادا چەمپيونى شىقتى. وكىنىشكە وراي، مۇنايعا باي ەل حوك تاراپىنان ەسكەرتۋ الىپ، رەسمي تۇردە دوداعا قاتىسقان جوق. ناتيجەسىندە كۋۆەيتتىك مەرگەن فەحايد ال-ديحاني ح و ك تۋىنىڭ استىندا باق سىناپ، چەمپيون اتاندى. ال كۋۆەيتتىكتەر ءوز ەلىنەن شىققان چەمپيونىن قوشەمەتپەن قارسى الدى.
ايتا كەتەيىك، ريوداعى وليمپيادا ويىندارىندا قازاقستان قۇراماسى 3 التىن 5 كۇمىس 9 قولا مەدال ەنشىلەپ، جالپىكوماندالىق ەسەپتە 22-ورىن العان ەدى.
Massaget.kz