ۆاسيلي ليەۆيت ەۆگەني تيشەنكومەن قارىمتا جەكپە-جەك جايلى پىكىرىن ءبىلدىردى

استانا. قازاقپارات - ريو وليمپياداسىنىڭ كۇمىس جۇلدەگەرى ۆاسيلي ليەۆيت تاياۋ ۋاقىتتا رەسەيلىك ەۆگەني تيشەنكومەن قارىمتا جەكپە-جەكتىڭ بولۋ-بولماۋى جايىندا پىكىر ءبىلدىردى.
None
None

«مەن كەز كەلگەن بوكسشىمەن، كەز كەلگەن ەلدىڭ وكىلىمەن شارشى الاڭدا كەزدەسەمىن. تەك ەۆگەني تيشەنكومەن عانا جۇدىرىقتاسامىن دەگەن ويىمدا جوق. ول رەسەيلىك بولسا، رەسەيلىكپەن، امەريكالىق بولسا رينگتە وعان دا قارسى شىعامىن. ەڭ باستىسى، قارسىلاسىڭنىڭ قىزىقتى بولعانى»، - دەدى ول جۋرناليستەرگە بەرگەن سۇحباتىندا.

سونىمەن قاتار ۆاسيلي اۋەسقوي بوكستى تاستاپ، ءبىرجولا كاسىبي بوكسقا اۋىسۋ ازىرشە ويىندا جوق ەكەندىگىن اتاپ ءوتتى.

«ەڭ الدىمەن ءوزىمنىڭ باسشىلىعىممەن، وتباسىممەن اقىلداسىپ الۋىم قاجەت. ودان كەيىن بارىپ كاسىبي بوكسقا اۋىسۋ-اۋىسپاۋدى ويلاستىراتىن بولامىن»، - دەدى ول.

ەستەرىڭىزگە سالا كەتەيىك، وليمپيادا ويىندارىنىڭ اقتىق سىنىندا رەسەيلىك ەۆگەني تيشەنكومەن شارشى الاڭدا كەزدەسكەن ۆاسيلي ليەۆيت تورەشىلەردىڭ شەشىمىمەن ۇتىلعان ەدى. ال مۇنداي شەشىمگە سول كەزدە جارىستى تاماشالاپ زالدا وتىرعان كورەرمەندەر بارىنشا نارازىلىق تانىتقان بولاتىن. وسىدان كەيىن ەلىمىزدىڭ بوكس فەدەراتسياسى ۆاسيليگە وليمپيادا التىنىن العان سپورتشىعا بەرىلەتىن سىياقى تولەۋ تۋرالى شەشىم قابىلداعان بولاتىن.

«ۆاسيلي ليەۆيت وليمپيادا رينگىنىڭ فينالدىق كەزدەسۋىندە تاماشا ناتيجە، جەڭىسكە دە ايرىقشا ەرىك-جىگەر كورسەتتى. ول وليمپيادانىڭ كۇمىس مەدالىن جەڭىپ العاننان كەيىن وعان مەملەكەت 150 مىڭ دوللار سىياقى بەرەدى. بۇعان قوسا، قازاقستان بوكس فەدەراتسياسىنىڭ پرەزيدەنتى ت. قۇلىبايەۆتىڭ شەشىمىمەن اتالعان سوماعا تاعى دا 100 مىڭ دوللار قوسىلادى. وسىلايشا ليەۆيتتىڭ سىياقىسى «التىنمەن» تەڭەسەدى»، - دەپ حابارلاعان ەدى فەدەراتسيادان.

ايتا كەتەيىك، بۇگىن ۆاسيلي ليەۆيت مەرزىمىمەن بۇرىن لەيتەنانت اسكەري شەنىن الدى.

اۆتور: مارلان جيەمباي

سوڭعى جاڭالىقتار