08:07, 27 - تامىز 2016 | GMT +5
ۆەنگريا سەربيامەن شەكاراسىنا ەكىنشى قورشاۋ سالادى
استانا. قازاقپارات - ۆەنگريا ۇكىمەتى سەربيامەن شەكاراسىنا ەكىنشى قورشاۋ سالۋدى كوزدەپ وتىر. مۇنى حورۆاتيادا ءوتىپ جاتقان ايماقتىق كونفەرەنتسيا بارىسىندا ۆەنگريانىڭ سىرتقى ىستەر ءمينيسترى مالىمدەدى، دەپ جازادى 24.kz.

بۇل - ەلدى زاڭسىز ميگرانتتاردىڭ اعىنىنان ساقتاپ قالۋعا باعىتتالعان شارا. 2015-جىلى شەكارادا سالىنعان العاشقى دۋال ەلگە كەلگەن بوسقىندار سانىن ازايتۋعا سەپ بولعان ەدى. ۆەنگريا بيلىگى تۇركيانىڭ ميگراتسيا سالاسىنا قاتىستى ساياساتىنىڭ وزگەرۋ مۇمكىندىگىنەن قاۋىپتەنىپ وتىر.
ەسكە سالا كەتسەك، انكارا مەن ەۋرووداق اراسىنداعى كەلىسىم بويىنشا، تۇركيا ءوز اۋماعى ارقىلى ەۋروپاعا وتكەن بوسقىنداردى قابىلدايتىن بولدى. ال ەۋرووداق انكاراعا 3 ميلليراد ەۋرو ءبولۋى ءتيىس. الايدا جاقىندا تۇركيا سىرتقى ىستەر ءمينيسترى ميەۆلۋت چاۆۋشوگلۋ قازان ايىنا دەيىن ەۋرووداق وسى ەلدىڭ ازاماتتارى ءۇشىن ۆيزاسىز بارىپ-كەلۋ ءتارتىبىن ورناتپاسا، بۇل كەلىسىمنەن باس تارتاتىنىن مالىمدەگەن بولاتىن.