ادىلبەك نيازىمبەتوۆ پەن ۆاسيلي لەۆيت «التىن» مەدالدىڭ ماراپاتىن الادى

بۇگىن استانادا جازعى ХХХІ وليمپيادا ويىندارىنىڭ جەڭىمپازدارى مەن جۇلدەگەرلەرىنە قۇرمەت كورسەتۋ سالتاناتتى شاراسىندا ەلباسى نۇرسۇلتان نازاربايەۆ وسىلاي ءمالىم ەتتى.
مەملەكەت باسشىسى سپورتشىلارىمىز 270 ەلدىڭ اراسىندا 22- ورىندى يەلەنىپ، بارشا الەمنىڭ الدىندا قازاقستاننىڭ ابىرويىن اسقاقتاتقانىن ايتا كەلە: «ريودا ەلىمىزدىڭ ءانۇرانى ءۇش رەت شىرقالىپ، كوكبايراعىمىز ءۇش مارتە كوتەرىلگەنىن ماقتان ەتەمىز. وسى رەتتە وليمپيادا چەمپيوندارىنىڭ جەڭىستەرى اتاپ ءوتىلدى، ياعني بوكسشىمىز، كوماندامىزدىڭ كاپيتانى دانيار ەلەۋسىنوۆ جەڭىس تۇعىرىنان كورىندى. ءبىزدىڭ تاريحىمىزدا العاش رەت ءجۇزۋشى دميتري بالاندين «التىن» يەلەندى. مەنىڭ ويىمشا، ەندى جۇزۋگە قىزىعۋشىلىق تانىتقان بالالار سانى ارتا تۇسەدى. سونىمەن قاتار اۋىر اتلەتشىمىز نيجات راحيموۆتىڭ ەڭبەگى لايىقتى باعالاندى»، - دەدى.
بۇدان بولەك ن. نازاربايەۆ جالپى قورجىنعا تۇسكەن بەس «كۇمىس» جۇلدە مەن توعىز «قولا» مەدال يەگەرلەرىنە قۇتتىقتاۋىن جەتكىزدى.
«سپورتتتىق جەتىستىكتىڭ ەستافەتاسىن بوكسشىلارىمىز قۋاتتادى، ياعني وتكەن وليمپيادانىڭ ۆيتسە- چەمپيونى ادىلبەك نيازىمبەتوۆتىڭ جانە ۆاسيلي لەۆيتتىڭ ەڭبەگى ەرەكشە. ءبىز بارشامىز بىلەمىز، بۇل ەكى بوكسشىمىزدى وليمپيادانىڭ التىن جۇلدەگەرى دەپ ساناۋ كەرەك. وسى رەتتە ماراپاتتاۋدا، سونداي- اق ىنتالاندىرۋ تۇرعىسىندا ولاردى «التىن» مەدال العاندارمەن تەڭەستىردىم»، - دەدى ەلباسى.
سونىمەن قاتار مەملەكەت باسشىسى «قولا» جۇلدە العان سپورتشىلارعا بولاشاقتا بيىك جەتىستىكتەردەن كورىنۋلەرىنە تىلەك ءبىلدىردى.
ريو- دە- جانەيرو قالاسىندا 2016 -جىلى 5 جانە 21 -تامىز ارالىعىندا وتكەن جازعى وليمپيادا ويىندارىنا قاتىسقان قازاقستان قۇراما كومانداسى جالپى سانى 17 مەدال ۇتىپ الدى. بۇل قازاقستاننىڭ وليمپيادا ويىندارىنا 6- رەت قاتىسۋى. ءتورت جىلدىقتىڭ باستى دوداسىندا ەلىمىزدىڭ نامىسىن 26 سپورت تۇرىنەن 104 سپورتشى قورعاعان. وليمپيادادان قازاقستان ەنشىسىندە 3 التىن، 5 كۇمىس، 9 قولا جۇلدە بار. التىن جۇلدەگە بوكستان دانيار ەلەۋسىنوۆ، اۋىر اتلەتيكادان نيجات راحيموۆ پەن جۇزۋدەن دميتري بالاندين قول جەتكىزدى. كۇمىس مەدالدى قازاق سپورتشىلارى ساپىنان ادىلبەك نيازىمبەتوۆ (بوكس)، ۆاسيلي لەۆيت (بوكس)، جازيرا جاپپارقۇل (اۋىر اتلەتيكا)، ەلدوس سمەتوۆ (دزيۋدو)، گۇزەل مانيۋروۆالار (كۇرەس) الىپ بەرسە، قولا جۇلدەگە يۆان دىچكو (بوكس)، داريعا شاكىموۆا (بوكس)، وتگونسەسەگ گالبادراح (دزيۋدو)، كارينا گوريچەۆا (اۋىر اتلەتيكا)، ولگا رىپاكوۆا (جەڭىل اتلەتيكا)، الەكساندر زايچيكوۆ (اۋىر اتلەتيكا)، ەلميرا سىزدىقوۆا (كۇرەس)، ەكاتەرينا لاريونوۆا (كۇرەس)، فارحاد حاركي (اۋىر اتلەتيكا) قول جەتكىزە الدى.
اۆتور: رۋسلان عابباسوۆ