قازاقستاندا جاسالعان: ەڭ ۇزدىك ماتەريال ءۇشىن جۋرناليستەرگە ەلەكتروموبيل تابىس ەتىلەدى

شارا باس رەداكتورلار كلۋبى مەن «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسىنىڭ ۇيىمداستىرۋىمەن قولعا الىنىپ وتىر.
«باس رەداكتورلار كلۋبىنىڭ باستاماسىمەن قازاقستان تاۋەلسىزدىگىنىڭ 25 جىلدىعى قارساڭىندا «سامعاۋ» اتتى جۋرناليستەر اراسىنداعى بايقاۋ وتەدى. بۇل بايقاۋدىڭ نەگىزگى ماقساتى - وسى تاۋەلسىزدىك جىلدارىندا قالىپتاسقان وتاندىق وندىرۋشىلەردىڭ جۇمىسىن جانە ناتيجەسىن ناسيحاتتاۋ. وسى ورايدا، باس رەداكتورلار كلۋبى «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسىمەن ارنايى مەموراندۋمعا قول قويادى. وزدەرىڭىز بىلەسىزدەر، باس رەداكتورلار كلۋبى ەلىمىزدەگى 250-دەن اسا ب ا ق باسشىلارىنىڭ باس بىرىكتىرە وتىرىپ، جالپى قازاقستانداعى بولىپ جاتقان يگى جۇمىستاردى حالىققا جاريا ەتۋ، حالىققا قوعامدىق ماڭىزدى ماسەلەلەرگە ۇلەس قوسۋ سىندى كوپتەگەن باستامالارعا ۇيىتقى بولىپ كەلە جاتىر. ەندىگى ماقساتىمىز - قازاقستاندا بەدەلدى، ساپالى ءونىم شىعارىپ وتىرعان تاۋار وندىرۋشىلەرىمىزگە ءوز ۇلەسىمىزدى قوسۋ جانە وسىعان ءوز ارىپتەستەرىمىزدى شاقىرۋ»، - دەيدى باس رەداكتورلار كلۋبىنىڭ پرەزيدەنتى بيبىگۇل جەكسەنباي.
بايقاۋ 7 اتالىم بويىنشا وتەدى. وعان ەلىمىزدەگى بارلىق ب ا ق قاتىسا الادى. گازەت، جۋرنال، راديو، تەلەۆيزيا عانا ەمەس، بلوگەرلەردىڭ دە قاتىسۋىنا مۇمكىندىك قاراستىرىلعان.
«وسى بايقاۋعا بايلانىستى 10 ميلليون تەڭگەگە جۇلدە قورىن اشىپ وتىرمىز. سونىڭ ىشىندە جۋرناليستەر اراسىندا ەڭ ۇزدىك دەپ تانىلعان تىلشىگە گران- پري سىيلىعى رەتىندە كولىك سىيلايمىز. ول قازاقستاندا جاسالعان اۆتوموبيل بولادى. تاعى ءبىر ەرەكشەلىگى ول - ەلەكتر اۆتوموبيلى بولۋى مۇمكىن. بارلىقتارىڭىزعا وسى بايقاۋعا قاتىسۋعا جول اشىپ وتىرمىز»، - دەيدى «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسىنىڭ پرەزيدەنتى ريما تاجىبايەۆا.
بارلىق نوميناتسيالار بويىنشا ماتەريالدار بايقاۋعا 2016 - جىل 10 - جەلتوقسانعا دەيىنگى مەرزىمدە ەلەكتروندى تۇردە عانا ۇسىنىلۋى ءتيىس.
اۆتور: جاسۇلان جولدىبايەۆ