قۇرالاي نۇرقادىلوۆا ءۇيىنىڭ ساتىلىمعا قويىلعاندىعى جايىندا ءوز پىكىرىن ءبىلدىردى

الماتى. قازاقپارات - بەلگىلى قازاقستاندىق مودەلەر قۇرالاي نۇرقادىلوۆا «كازكوممەرسبانك» ا ق الدىنداعى قارىزى ءۇشىن ءۇيىنىڭ ساتىلىمعا قويىلعاندىعى جايىندا ءوز پىكىرىن ءبىلدىردى.
None
None

«مەن دە باسقا ادامدار سياقتى كەزىندە نەسيە الدىم. كازكوم جوعالتقان تولەمدەردى جوعارعى سوت ارقىلى قالپىنا كەلتىردىك. نەسيەنىڭ سوماسى ازايتىلدى. ءۇيدىڭ باعاسى سوت شەشىمى بويىنشا بەلگىلەنگەن سومادان ۇلكەن. مەن ءوزىمنىڭ مىندەتتەمەمنەن باس تارتايىن دەپ جاتقان جوقپىن. مەن قارىزىمدى مىندەتتى تۇردە تولەيمىن»، - دەدى ول «قازاقپارات» تىلشىسىنە بەرگەن سۇحباتىندا.

سونىمەن قاتار مودەلەر ءوز مۇلكىنىڭ ساتىلىمعا قويىلعاندىعى تۋرالى بۇگىن ەستىگەندىگىن ايتتى.

«مەن ءۇيدىڭ ساتىلىمعا قويىلعاندىعىنا قارسى ەمەسپىن. ادەتتەگى ساۋدا. جالپى، ءۇيدى ساتۋ ارقىلى قارىزدى وتەۋ جونىندەگى باستامانى بۇدان جارتى جىل بۇرىن مەن كوتەرگەن بولاتىنمىن. ارنايى حات جازعانمىن. قازىر بانكپەن ارادا بەلگىلى ءبىر راسىمدەر ءالى دە جاسالىپ جاتىر. سونىمەن، ءۇي ساتىلىمعا قويىلدى. كادىمگى تۇرعىن ءۇي. بەرە سالام، وندا تۇرعان نە بار!؟ ارينە، بىرەۋلەر ءۇشىن بۇل جالعىز باسپانا بولىپ قالۋى دا مۇمكىن. ال مەنىڭ، قۇدايعا شۇكىر، اياق- قولىم ءبۇتىن، دەنىم ساۋ. ءۇيىمدى السا دا، اقىلىم، ءبىلىمىم وزىمدە»، - دەدى ق. نۇرقادىلوۆا.

ايتا كەتەلىك، بۇعان دەيىن بانك الدىنداعى قارىزى ءۇشىن بەلگىلى مودەلدەردىڭ مۇلكىنىڭ ساۋداعا قويىلعاندىعى تۋرالى حابارلانعان بولاتىن. بۇل جەردە اۋەزوۆ اۋدانى، «دۋبوك-2» شاعىن اۋدانىنداعى تۇرعىن ءۇي ساتىلىمعا قويىلدى. ونىڭ جالپى اۋماعى 283,8 شارشى مەتر، ال جەر تەلىمى - 0,1366 گەكتار.

جىلجىمايتىن مۇلىك 109 ميلليون تەڭگەگە باعالاندى.

ساۋدا 2016 -جىلدىڭ 7 -قىركۇيەگىندە باستالادى.

اۆتور: ايبوتا جاپپاربەرگەن

 

سوڭعى جاڭالىقتار