كازكوممەرسبانك قۇرالاي نۇرقادىلوۆا مۇلكىنىڭ ساۋداعا قويىلۋ سەبەبىن ءتۇسىندىردى

الماتى. قازاقپارات - «كازكوممەرتسبانك» ا ق قۇرالاي نۇرقادىلوۆا مۇلكىنىڭ ساۋداعا قويىلۋ سەبەبىن ءتۇسىندىردى.

بانكتىڭ باسپا ءسوز قىزمەتىنىڭ حابارلاۋىنشا، بانك قارىز الۋشى قۇرالاي نۇرقادىلوۆانىڭ ۇستىنەن تۇسىرگەن تالاپ-ارىز بويىنشا بارلىق سوت وتىرىستارىندا جەڭىپ شىققان.

بەلگىلى بولعانداي، بارلىعى 106 ميلليونعا جۋىق تەڭگەنى ءوندىرىپ الۋ جانە وعان قوسا مەملەكەتتىك باج سالىعىن تولەتتىرۋ قاجەت بولعان.

«الايدا، قارىز الۋشى سوت شەشىمىن ورىندامادى. سول ءۇشىن اكىمشىلىك جاۋاپكەرشىلىككە تارتىلدى. سوت شەشىمى بويىنشا، ورىنداۋ ءوندىرىسى اياسىندا ق. نۇرقادىلوۆانىڭ مۇلكى تىزىمگە الىنىپ، باعالاندى جانە مەملەكەتتىك سوت ورىنداۋشىسى ولاردى ساۋداعا قويدى»، - دەلىنگەن حابارلامادا.

«2006 -جىلى ق. نۇرقادىلوۆا جوعارى ساناتتى تۇرعىن ءۇي ساتىپ الۋ ماقساتىندا (كەيبىر ب ا ق- تا ايتىلعانىنداي، بيزنەستى دامىتۋ ءۇشىن ەمەس) نەسيە الۋ ءۇشىن «كاز كوممەرسبانك» اق جۇگىنەدى.

بانك كەلىسىم بويىنشا ءوز مىندەتتەمەسىن ورىنداپ، نەسيە بەردى. نەسيە سوماسى - 641,9 مىڭ ا ق ش دوللارىن قۇرادى. ونى قارىز الۋشى 20 جىل ىشىندە قايتارۋعا مىندەتتەلدى.

ءبىراق، وكىنىشكە قاراي، اقشا العان سوڭ ءۇش جىلدان كەيىن، ول جەكە باسىنداعى قارجىلىق قيىندىقتاردى سىلتاۋ ەتىپ، ءوز مىندەتتەمەسىن ورىنداۋدى توقتاتتى. نەسيەنى تولەۋ مەرزىمىن ۇزارتۋ بويىنشا ءوتىنىش جاساعان سوڭ، بانك ءوز كەلىسىمىن بەردى. ءسويتىپ، نەسيەنى تولەۋ بويىنشا جەڭىلدەتىلگەن مەرزىم ۇسىندى.

2010 -جىلدان باستاپ، بانك پەن قارىز الۋشى ق. نۇرقادىلوۆا اراسىندا بانك كرەديتىنىڭ كەلىسىم- شارتىنا قاتىستى جەتى رەت قوسىمشا كەلىسىم جاسالدى. وندا بانك ءاردايىم قارىز الۋشىنىڭ جاعدايىن ءتۇسىنىپ، نەسيەنى تولەۋ مەرزىمىن كەيىنگە قالدىرىپ كەلدى»، - دەلىنگەن بانكتىڭ حابارلاماسىندا.

اۆتور: ايبوتا جاپپاربەرگەن