ءسادۋاقاسوۆا: سپورتشى قىزداردىڭ جولى بىزدىكىنەن الدەقايدا اۋىر دەيتىن ەدىم

ينستاگرام جەلىسىندە بەلسەندىلىك تانىتاتىن جۇلدىزداردىڭ قاتارىندا ءمادينا ءسادۋاقاسوۆا دا بار. ول ۇنەمى اتالعان جەلى ارقىلى ءتۇرلى جاڭالىعىن ءبولىسىپ، اراسىندا ساياحاتىنىڭ سۋرەتتەرىمەن جۇرتتى قىزىقتىراپ تۇرادى. بۇل جولى ول ريو وليمپياداسىندا «كۇمىس» جۇلدەگەرى اتانعان جازيرا جاپپارقۇلمەن جاقىنىراق تانىسقانىن ايتتى. وتاندىق باعدارلامالاردىڭ ءتۇسىرىلىمى كەزىندە سپورتشى قىزبەن سىرلاسىپ تا ۇلگەرگەن ەكەن.
«ەلىمىزدىڭ ماقتانىشى جازيرا جاپپارقۇل، جارايسىڭ! تانىسقانىما قۋانىشتىمىن! بۇگىنگى كۇنىم سپورتشى قىزدارمەن بىرگە تۇسىرىلىمدە ءوتتى. جاقىن تانىسىپ، اڭگىمەلەسىپ، سىرلاسىپ، ءتىپتى، ءبىر بىرىمىزگە باۋىر باسىپ تا ۇلگەردىك. «ونەر جولى - اۋىر جول» دەپ ايتادى. ال سپورت جولى، اسىرەسە، قىز بالا ءۇشىن ودان دا اۋىر دەپ ايتار ەدىم. ءومىرىن سپورتقا ارناعان بارشا قايسارلى قىزدارعا كۇش- قۋاتتارىڭ سارقىلماسىن، ومىردە دە سپورتتا دا جەڭىلگەن ساتتەرىڭ بولماسىن، قاشاندا جۇزدەرىڭىزدەن نۇر توگىلىپ، سۇيىكتى دە سۇيكىمدى بولىپ جۇرە بەرىڭىزدەر!» - دەيدى ءمادينا ءسادۋاقاسوۆا.
مۇنىمەن قاتار، ءانشى ريودا ونەر كورسەتكەن تاعى ءبىر سپورتشى قىزدى كۇتىپ الۋعا ارنايى اۋەجايعا بارعان ەكەن. ول - ءسابينا اشىربايەۆا. «ريودا جاقسى ونەر كورسەتكەن تاعى ءبىر سپورتشى قىزىمىز ءسابينا ءوزىنىڭ جاتتىقتىرۋشىسىمەن بەلگىلى ءاليا يۋسۋپوۆامەن. جارايسىڭدار، قىزدار!» - دەپ جازادى ءسادۋاقاسوۆا سۋرەتىنىڭ تۇسىنا.
جەلى قولدانۋشىلارى وزگەنىڭ قۋانىشىن وزىنىكىندەي بولىسە بىلەتىن ءانشىنىڭ مىنەزىنە قايران قالدى. «ءمادينا، سپورتشىلاردى ءوزىڭ كۇتىپ الىپ ءجۇرسىڭ بە؟ جارايسىڭ!»، «قازاقتىڭ قىزدارى وسىلاي بولۋى كەرەك. جارايسىڭدار! سەندەردى ماقتان تۇتامىز! جۋىردا تەلەديداردان كورىپ كوزىمىزگە جاس الدىق»، «مەن قازاق قىزدارىنا قايران قالام دەمەكشى، وسىنداي قازاق قىزدارى ەلدىڭ اتىن شىعارىپ جاتسا، قالاي قايران قالمايسىڭ. جارايسىڭدار! بيىكتەن كورىنە بەرىڭدەر» دەيدى جەلى قولدانۋشىلارى.