ق ر پرەزيدەنتى پولشا جانە رەسەي اراسىندا كولىك سالاسىنداعى كەلىسىمدى پىسىقتاۋ جونىندە باستاما كوتەردى

استانا. قازاقپارات - مەملەكەت باسشىسى نۇرسۇلتان نازاربايەۆ قازاقستان- پولشا بيزنەس- فورۋمىنا قاتىستى.
None
None

بۇل تۋرالى اقوردانىڭ باسپا ءسوز قىزمەتىنەن حابارلادى.

قازاقستان مەن پولشا ىسكەر توپتارىنىڭ 400 دەن استام وكىلىنىڭ قاتىسۋىمەن وتكەن فورۋم بارىسىندا ينۆەستيتسيا جانە ساۋدا- ەكونوميكا سالاسىنداعى ەكىجاقتى ىنتىماقتاستىق اياسىن كەڭەيتۋ جولدارى قاراستىرىلدى.

ەلباسى قاتىسۋشىلارعا ارناعان سوزىندە قازاقستاننىڭ پولشانى ەۋروپالىق وداقتاعى سەنىمدى ساياسي جانە ەكونوميكالىق سەرىكتەسى رەتىندە قاراستىراتىنىن اتاپ ءوتتى.

«قازاقستان مەن پولشا اراسىنداعى تاۋار اينالىمى 2015 -جىل قورىتىندىسى بويىنشا 1,1 ميلليارد بولدى، بۇل قازىرگى الەۋەتىمىزدى تولىق كورسەتە المايدى. قازاقستاننىڭ پولشاعا ەكسپورتىندا ەنەرگيا رەسۋرستارى، شيكىزات جانە حيميا، كومىر ونەركاسىبى، قارا مەتاللۋرگيا، استىق پەن ماقتا، باسقا دا اۋىل شارۋاشىلىعى ونىمدەرى باسىم. پولشادان قازاقستانعا جەتكىزىلەتىن نەگىزگى يمپورت تۇرلەرى - ەلەكترلىك- تۇرمىستىق قۇرىلعىلار مەن جابدىقتار، حيميا ونەركاسىبى مەن اۋىل شارۋاشىلىعى ونىمدەرى، ازىق- تۇلىك تاۋارلارى، جيھاز. قازىر قازاقستاندا پولشا ازاماتتارىنىڭ قاتىسۋمەن 100 دەن استام كاسىپورىن جۇمىس جۇرگىزۋدە. ءبىرقاتار پولياك كاسىپورىندارى فارماتسيەۆتيكا جانە قۇرىلىس سياقتى سالالارداعى جوبالاردى جۇزەگە اسىرۋدا. تاعى دا ونداعان پولياك كومپانيالارى بىزبەن ىنتىماقتاستىق ورناتۋعا مۇددەلى ەكەنىن بىلەمىن. بۇگىندە قازاقستاندا پولياك كومپانيالارىنىڭ قاتىسۋىمەن قۇنى 100 ميلليون دوللار بولاتىن 3 جوبا جۇزەگە اسىرىلىپ جاتىر»، - دەدى قازاقستان پرەزيدەنتى.

نۇرسۇلتان نازاربايەۆ سونداي- اق قازاقستاندى پولياكتاردىڭ شاعىن جانە ورتا كاسىپكەرلىكتى دامىتۋ تاجىريبەسى قىزىقتىراتىنىن ايتتى.

«ءبىز مەملەكەتتىك ساياساتتىڭ باسىم باعىتى بولىپ ساناتىن شاعىن جانە ورتا بيزنەسكە جان- جاقتى قولداۋ كورسەتۋدەمىز. كاسىپكەرلەرگە كومەكتەسۋ ءۇشىن بيزنەسكە قولايلى جاعدايلار تۋعىزۋعا باعىتتالعان ۇلتتىق باعدارلامالار جۇزەگە اسىرىلۋدا. كاسىپكەرلەرگە اتاۋلى كومەك كورسەتەتىن «دامۋ» اتتى كاسىپكەرلىكتى دامىتۋدىڭ ارناۋلى قورى جۇمىس ىستەيدى. ءبىزدى سىزدەردىڭ اگروونەركاسىپ كەشەنىن دامىتۋ، اۋىل شارۋاشىلىعى ونىمدەرىن وڭدەۋ، كولىك جانە لوگيستيكا، ەنەرگەتيكا، فارماتسيەۆتيكا سالالارىنداعى تاجىريبەلەرىڭىز قىزىقتىرادى.

مەن ەكى ەلدىڭ بيزنەس وكىلدەرىن قىزىقتىرۋى مۇمكىن بىرنەشە سالانى عانا اتاپ ءوتتىم. بۇل رەتتە پولشا ۇكىمەتى قابىلداعان پەرسپەكتيۆالى نارىقتاردى يگەرۋدىڭ 2013-2016 -جىلدارعا ارنالعان باعدارلاماسىنىڭ الەۋەتىن بەلسەندىرەك پايدالانۋ قاجەت. وندا قازاقستان برازيليا، كانادا، تۇركيا جانە الجيرمەن بىرگە پەرسپەكتيۆالى بەس ەكونوميكالىق نارىقتىڭ ءبىرى رەتىندە كورسەتىلگەن. بۇدان بولەك، پولشادا ءبىزدىڭ ەلمەن ءبىرقاتار سالاداعى ىنتىماقتاستىق تۋرالى ارناۋلى باعدارلامالار جۇزەگە اسىرىلۋدا»، - دەدى مەملەكەت باسشىسى.

قازاقستان پرەزيدەنتى بيىل جىل سوڭىندا بريۋسسەلدە وتەتىن ەاەو مەن ەۋروپالىق وداق اراسىنداعى كونفەرەنتسيانى ەسكە سالا وتىرىپ، ينتەگراتسيالىق بىرلەستىكتەر اراسىنداعى ىنتىماقتاستىقتى جولعا قويۋ قاجەتتىگىنە نازار اۋداردى.

نۇرسۇلتان نازاربايەۆ ينۆەستيتسيالىق تارتىمدىلىقتىڭ جاڭا دەڭگەيىنە كوتەرىلۋ ءۇشىن قازاقستاندا قانداي جۇمىستار جاسالىپ جاتقانىنا، ونىڭ ىشىندە بەس ينستيتۋتسيونالدىق رەفورمانى ىسكە اسىرۋ جونىندەگى ۇلت جوسپارى - 100 ناقتى قادام جانە يندۋستريالىق- يننوۆاتسيالىق دامۋ باعدارلاماسى اياسىنداعى اكىمشىلىك كەدەرگىلەردى ازايتۋ جونىندەگى شارالارعا توقتالدى.

ەلباسى ەكى ەلدىڭ كولىك- ترانزيت الەۋەتىن ءتيىمدى پايدالانۋدىڭ ماڭىزدىلىعىن اتاپ ءوتتى. وسىعان بايلانىستى، نۇرسۇلتان نازاربايەۆ قازاقستان، پولشا جانە رەسەي اراسىندا كولىك سالاسىنداعى ءۇشجاقتى كەلىسىمدى پىسىقتاۋ جانە كاۆكاز ترانزيتتىك ءدالىزىن پايدالانۋ جونىندە باستاما كوتەردى.

سوڭىندا مەملەكەت باسشىسى بيزنەس- فورۋم ەكى ەل بيزنەسىنىڭ ءوزارا ءتيىمدى سەرىكتەستىگى ءۇشىن جاڭا پەرسپەكتيۆالارعا جول اشادى دەپ ۇمىتتەنەتىنىن جەتكىزدى جانە پولياك ىسكەر توپتارى وكىلدەرىن ەلىمىزدەگى مەملەكەتتىك باعدارلامالاردىڭ جۇزەگە اسىرىلۋىنا بەلسەنە اتسالىسۋعا شاقىردى.

  

سوڭعى جاڭالىقتار