ريزامىز، ريو دە جانەيرو

استانا. قازاقپارات - برازيلياداعى بايراقتى باسەكەدەن سپورتشىلارىمىز ولجالى ورالدى. ءبىتتى.
None
None

2016 -جىلدىڭ، قۋانىش پەن شاتتىق، رەنىش پەن وكىنىش قول ۇستاسىپ قاتار جۇرگەن تەڭدەسسىز 16 كۇنى، جەر اتتى پلانەتاداعى سپورتتىڭ ەڭ ۇلكەن تويى مارەسىنە جەتتى.

«ماراكانادا» جابىلۋ سالتاناتى ءوتتى. وليمپيادا تۋى ءتۇسىرىلىپ، توكيو گۋبەرناتورىنا تابىستالدى. سالتاناتتى دۋماندارعا وڭ يىعىن بەرىپ تۇراتىن برازيليا داستۇرىنەن اينىعان جوق. سپورت پەن دوستىقتىڭ مەرەكەسى وتە قىزعىلىقتى ءورىس الدى. وسى الامانعا ءتورت جىل بويى بارلىق شارۋاسىن ءبىر جاققا ىسىرىپ قويىپ، دايىندالعان ءبىر- ءبىر ەلدىڭ ساڭلاقتارى قايىر قوش ايتىسىپ، كۇمىس قانات ۇشاقتاردىڭ تەكپىشەكتەرىنە اياعىن سالدى...

 null

null
وليمپياداعا 207 مەملەكەتتىڭ سپورتشىلارى جانە بوسقىنداردان قۇرالعان قۇراما قاتىستى. وسى 207 ەلدىڭ 88 ى عانا وليمپيالىق ويىندارعا دەپ ارنايى سوعىلعان جۇلدەلەردى تەرىپ الدى. باس بايگە 46 التىن، 37 كۇمىس، 38 قولا مەدال العان ا ق ش اتلەتتەرىنىڭ قانجىعاسىندا كەتتى. ەكىنشى ورىن 27 التىن جۇلدەنى يەلەنگەن، 67 مەدالى بار ۇلى بريتانيانىڭ ەنشىسىنە بۇيىردى. حالقىنىڭ سانى ميللياردتان مول اسقان ءۇندىستان ەكى قولا مەدالىنە شۇكىرشىلىك ەتتى. جالقى «قولاعا» دا جەتە الماعان جۇزدەن استام مەملەكەتتىڭ سپورت باسشىلارى جان- جاعىنا جالتاقتاي قاراپ بارا جاتقاندارى تاعى اقيقات.

ال قازاقستان بۇل سپورت تويىنان ايدارىنان جەل ەسىپ قايتتى. اۋزىمەن قۇس تىستەگەن 207 مەملەكەتتىڭ ىشىندە 22- ورىنعا تۇراقتادى. 17 ميلليون حالقى بار قازاقستان 170 ميلليون ادامىن كوز قۋانىش ەتىپ وتىرعان مەملەكەتتەر باعىندىرا الماعان شىڭعا شىقتى. ەلىمىزدىڭ كوك بايراعى جەلكىلدەپ بارىپ، جەلبىرەپ قايتتى. باس- اياعى جۇپ- جۇمىر 17 مەدال - 3 التىن، 5 كۇمىس جانە 9 قولا جۇلدە قورجىنعا ءتۇستى. مۇنىڭ ءوزى ءبىز ءۇشىن جاڭا جەتىستىك. مۇنىڭ الدىنداعى بەيجىڭ مەن لوندونداعى مەدال سانىن تورتەۋگە اسىرىپ جىبەردىك.

ۇلكەن سپورت - ۇلكەن ساياسات. مۇندا دۇنيە جۇزىندەگى بارلىق مەملەكەتتەردىڭ قادىر- قاسيەتتەرىنەن باستاپ، الەمدەگى ورنى جاتىر. قازاقستان پرەزيدەنتى نۇرسۇلتان نازاربايەۆ العا جاھانداعى باسەكەگە قابىلەتتى وتىز ەلدىڭ قاتارىنا كىرۋ جونىندە ماقسات قويسا، ونى سپورتشىلارىمىز ورىنداپ تا قويدى. ءبىز بۇل جەتىستىككە ەلباسىمىزدىڭ سىندارلى ساياساتى، حالقىمىزدىڭ ۇيىمشىلدىعى، ەڭ باستىسى، باتىر ۇل- قىزدارىمىزدىڭ ەرلىكپەن استاسقان ەرىك- جىگەرى ارقاسىندا جەتتىك. ۇلتتىق وليمپيادا كوميتەتى، مادەنيەت جانە سپورت مينيسترلىگى، جەكەلەگەن سپورت تۇرلەرى فەدەراتسيالارى جانە ساڭلاقتارىمىزدى وسىناۋ سىنعا دايىنداعان جاتتىقتىرۋشىلارىمىز بۇعان ۇشان- تەڭىز ەڭبەك ءسىڭىردى.

قازاقستان جانكۇيەرلەرى برازيلياعا ارنايى بارىپ سپورتشىلارىمىزعا وتە ۇلكەن قولداۋ كورسەتتى. قاي جارىسقا بارساڭ دا جيىرما شاقتى قازاقتىڭ داۋىسى الىپ ستاديوندى تەربەپ تۇرادى. «ەڭ مىقتى جانكۇيەرلەر - قازاقتار» دەگەن ماقتاۋدى دا ەستىدىك.

سوڭعى كۇنى وليمپيادا مەدالدارىنىڭ قاپ تۇبىندە قالعاندارى كونگە قويىلدى. اركىم وزىنە تيەسىلەرىن تەرىپ اكەتتى. ەندى باس- اياقتى جينايتىن كەز كەلدى. وسى الاماندا باسىنان سوڭىنا دەيىن بولعان ءبىزدىڭ دە شاعىن ساراپتاما جاسايتىن كەزەگىمىز جەتتى.

اۋەلى اۋىر اتلەتيكا جايلى. داۋسىز «التىن» الادى دەگەن ساڭلاقتارىمىز جايسىز جاعدايعا ۇرىنعاننان كەيىن اتلەتتەرىمىزدىڭ مۇندا بوسقا جاتقانى جايلى جەل ءسوز ەلدەن شىقپاي تۇرىپ- اق گۋ ەتكەن. الايدا، سولاردىڭ ءبارىن باسىمەن باسقان الەكسەي ءنيدىڭ شاكىرتتەرى ريودا تاماشا تابىسقا جەتتى.

نيجات راحيموۆ «التىننان» ولجا سالسا، زىلتەمىرشى قازاق قىزى العاش رەت ءوليمپتىڭ جۇلدەلى ورنىنا تابان تىرەدى. سول سياقتى كارينا گوريچەۆانىڭ، فارحات حاركي مەن الەكساندر زايچيكوۆتىڭ قولا مەدالدارى قازاقستاننىڭ وليمپياداداعى تابىستارىن ەسەلەۋگە كوپ سەپتەستى. وسىلايشا جەتى اتلەتتىڭ دارالانۋى ەلىمىزدىڭ الەمدە ورنى ەرەك ەكەندىگىنىڭ دالەلى بولسا كەرەك.

قازاقستاننىڭ بوكس قۇراماسى ەلىمىز تاۋەلسىزدىك العاننان بەرى ءبىر وليمپيالىق ويىنداردان التىن جۇلدەسىز قايتىپ كورگەن جوق. بۇل جولى دا سول ءۇردىس بۇزىلعان جوق. التىن ايدارلى ۇلىمىز، قۇرامانىڭ كاپيتانى دانيار ەلەۋسىنوۆ 10 التىننىڭ ءبىرىن وتانىنا سىيلادى. رەسەي بوكسشىسىن ۇرىپ جىعۋعا شاق قالعاندا، رەفەريدىڭ ارالاسۋىمەن مۇمكىندىگىنەن ايىرىلعان ۆاسيليي ليەۆيت ۇلىمىزدىڭ ۇرلانعان جەڭىسى الەم جانكۇيەرلەرىن ءالى الاڭداتۋدا. ۇ و ك- تىڭ لەۆيتكە التىن مەدالدىڭ قارجىسىن بەرۋگە شەشىم قابىلداعانى ازاماتتىق ءىس بولدى.

ال سول جەكپە- جەككە قازىلىق جاساعان تورەشىلەر ۇزاق مەرزىمگە شارشى الاڭنان الاستاتىلدى. ايۆا قابىلدانعان شەشىمدى بۇزا الماي، كۇماندى ايقاس ناتيجەسى وزگەرىسسىز قالدى.

ادىلبەك نيازىمبەتوۆ تۋرالى دا وسىنى ايتۋعا بولار. رەفەري كۋبالىق حۋليو سەزار لا كرۋزدىڭ قولىن كوتەرگەندە، جانكۇيەر دەگەن ءادىل جۇرت نارازىلىق ءبىلدىردى.

ماراپاتتاۋ كەزىندە دە قايتالاندى. بۇل جايىندا ادىلبەكتىڭ وزىمەن سويلەسكەنىمىزدە، كرۋز ەكەۋىنىڭ ءبىر- ءبىرىن باعىپ بوكستاساتىنىن، كەيدە ۇرىس مانەرىن وزگەرتىپ الاتىندارىن ايتتى. ول جاعدايعا تەز بەيىمدەلىپ، شەگىنە ءجۇرىپ تە، قارسى ايقاسقا ءتۇسىپ تە قاجەتتى ۇپايلارىن جيناپ الادى. يۆان دىچكو تۋرالى ايتارىمىزدى ايتتىق. تالانتتى بوكسشى، ءبىراق وسى وليمپياداعا ءبىر قايناۋى ىشىندە كەلگەندەي اسەر قالدىردى.

«قولاعا» قاناعاتتاناتىنىن دجوي دجويسپەن ايقاستىڭ ەكىنشى راۋندىندا اڭعارتىپ قويدى. سول دجويس فينالدا فرانسۋز توني يوكادان ۇپاي سانىمەن ۇتىلدى. داريعا شاكىموۆا قازاق قىزدارى ىشىندە وليمپيادادان جۇلدە العان بوكسشى رەتىندە سپورت تاريحىنا تىركەلدى. ونىڭ جارتىلاي فينالداعى قارسىلاسى كلارەسسا شيلدس ءوزى بوكستان كەتپەي، بۇل سالماقتا ەشكىمگە التىننىڭ شەتىن ۇستاتپايتىنىن فينالدا بايقاتتى.

جاس تالانتىمىز دميتري بالاندين سۋعا جۇزۋدەن تاريحىمىزدىڭ جاڭا ءبىر پاراعىنا التىن ارىپتەرمەن قولتاڭبا قالدىردى. سۋ سپورتى دا جەڭىل اتلەتيكا سياقتى مەدالداردى ەڭ كوپ تاراتاتىن ورىن. ماسەلەن، ءبىر مايكل فەلپستىڭ ءوزى ا ق ش- قا وليمپيادانىڭ 23 «التىنىن» سىيلادى. يامايكالىق جەلدەن جۇيرىك ۋسەين بولت ءار وليمپيادادان ەكى- ءۇش التىن مەدال الماي، ەلىنە قايتپايدى. بالۋاندارىمىزعا كەلسەك، وليمپيادانىڭ العاشقى كۇنى مەدالدار سالىنعان قورجىننىڭ ءجىبىن شەشىپ بەرگەن دزيۋدوشىلارىمىز وتگونسەسەگ گالبادراح پەن ەلدوس سمەتوۆ تۋرالى تاڭنان كەشكە دەيىن ايتا بەرۋگە بولادى. ەكەۋى دە تاماشا كۇرەستى. ەكەۋى دە التىن مەدال الۋعا كۇشتەرى جەتەتىندىكتەرىنە كوز جەتكىزىپ قايتتى.

ءبىراق دزيۋدو، گرەك- ريم جانە ەركىن كۇرەستەگى سەنگەن ەر بالۋاندارىمىز جەرگە قاراتتى دەمەسەك تە، سوعان قارايلاس قۇرەستى. ماكسيم راكوۆقا جەرەبە جولداس بولمادى. المات كەبىسبايەۆ الەمنىڭ 6 دۇركىن چەمپيونى، وليمپيالىق ويىنداردىڭ چەمپيونى يراندىق حاميت سورياندى جارىستان الىپ تاستاپ تۇرىپ، ءوزى قولا مەدالعا وتەر جەردە ءسۇرىندى. دوسجان قارتىقوۆ تۋرالى دا وسىلاي ايتۋعا بولادى. ەركىن كۇرەستە عالىمجان وسەربايەۆ فينالعا وتەر جەردە جەڭىلىپ، قولاعا تالاساردا تۇرىك بالۋانىنا قارسى قايرات كورسەتە المادى. نۇريسلام سانايەۆقا مەدال الۋعا ءسال ساتتىلىك جەتپەي قالدى. ونىڭ ەسەسىنە، ەركىن كۇرەستەگى قىزدارىمىز ەرلەدى. گۇزەل مانيۋروۆا - كۇمىس، ەلميرا سىزدىقوۆا مەن ەكاتەرينا لاريونوۆا قورجىنعا قولا مەدالدار سالدى. ەلميرانىڭ ەركىن كۇرەس تاريحىندا ەڭ العاش جۇلدە العان قازاق قىزى ەكەندىگىن دە ءسوز ىڭعايىندا ايتا كەتەيىك.

ال ءبىز بارعا قاناعاتشىل حالىقپىز. راسىندا قول جەتكەن جەتىستىكتەرىمىز جامان ەمەس. ءاۋ باستا جوبالاعان مەدالداردان جوسپاردى اسىرا ورىندادىق. لوندوندا 1 عانا كۇمىس الساق، بۇل جولى ول 5-ەۋ بولدى. زاتى كۇمىس دەمەسەڭىز، وسىندا التىنعا لايىق، ءسال سىنىق سۇيەم جەتپەي قالعاندارى كوپ. كۇنى ەرتەڭ سول كۇمىستەر التىنعا اينالسىن دەپ تىلەيىك.

«ەگەمەن قازاقستاننىڭ» ارناۋلى ءتىلشىسى - باقتيار تايجان.

سوڭعى جاڭالىقتار