الماتىنىڭ تۋريستىك برەندى تانىستىرىلدى

تۋريستىك برەندتى جاساۋداعى باستى ماقسات - قالانىڭ تانىمالدىعىن، تۋريستىك تارتىمدىلىعىن ارتتىرۋ، ينۆەستيتسيا تارتۋ، سونداي-اق قالانىڭ ءبىرىڭعاي ءستيلىن قالىپتاستىرۋ.
الماتىنىڭ تۋريستىك برەندى مادەني- تاريحي داستۇرلەردى ساقتاپ، جانە زاماناۋي بەتبۇرىستاردى ەسكەرە وتىرىپ جاسالعان.
«لوگوتيپ اتومنىڭ قۇرىلىمىن ەسكە تۇسىرەدى. ورتاسىنداعى الما - بۇل يادرو، ال اينالاسىنداعى جەتى شەڭبەر - يادروداعى ەنەرگيانىڭ جەتى وربيتاسى. 7 سانى - قازاق مادەنيەتىندە قاسيەتتى سان. ءاربىر قازاق جەتى اتاسىنا دەيىن بىلەدى، جەتى اتاعا دەيىن قىز الىسپايدى. لوگوتيپتىڭ تۇستىك كودى قازاقتىڭ ويۋ- ورنەگىنە نەگىزدەلگەن. ولار اسپاننىڭ، قازاقستان تۋىنىڭ، كۇننىڭ، ەركىندىكتىڭ، ومىرلىك كۇش- قۋاتتىڭ، تابيعاتپەن ۇيلەسىمدىلىكتىڭ، شابىتتىڭ جانە شىعارماشىلىق جولدىڭ پاكتىگىن بىلدىرەدى»، - دەدى ج. تولەگەنوۆا.
لاتىن ارپىمەن جازىلعان «Almaty» جازۋى الماتىنىڭ قوناقجايلىلىعىن، اشىقتىعىن، تۋريزمدى دامىتۋدى كوزدەيتىندىگىن بىلدىرەدى. جازۋ قىزىل جانە جاسىل تۇستەردى قولدانا وتىرىپ جاسالعان. جاسىل ءتۇس - جاستىق شاق پەن كوكتەمنىڭ، دامۋ مەن ءوسۋدىڭ سيمۆولى، ال قىزىل ءتۇس - ومىرلىك كۇش پەن جاسامپاز كۇشتىڭ بەلگىسى.
لوگوتيپتى ەندىرۋ بارىسىندا قالانىڭ گەربى قولدانىلادى. ويتكەنى، ول رەسمي سيمۆول. سوندىقتان، گەرب وزگەرتىلمەيدى جانە جاڭارتىلمايدى. ال لوگوتيپ قالانىڭ تانىمالدىلىعىن، تۋريستىك تارتىمدىلىعىن ارتتىرۋعا باعىتتالعان فيرمالىق ءستيلدىڭ ەلەمەنتى.
بۇعان دەيىن 2016 -جىلدىڭ قاڭتار ايىندا الماتىنىڭ ساۋلەت جانە قالا قۇرىلىسى باسقارماسى قالانىڭ برەند- بۋگىن جاساۋ بويىنشا بايقاۋ جاريالاعان بولاتىن.
جۇمىستاردى ىرىكتەۋگە 14 ادامنان تۇراتىن ساراپتامالىق كوميسسيا قۇرىلدى. ولاردىڭ قاتارىندا تاريحشىلار، ونەرتانۋشىلار، سۋرەتشىلەر، ديزاينەرلەر بولدى. كەلىپ تۇسكەن 109 ءوتىنىشتىڭ ىشىنەن كوميسسيا مۇشەلەرى 25 ۇزدىك جۇمىستى تاڭدادى. بۇل جۇمىستار داۋىس بەرۋ ءۇشىن عالامتور بەتىنە جاريا ەتىلدى.
داۋىس بەرۋگە 3000 نان استام ادام قاتىستى. ەڭ قىزىقتى 8 جۇمىس تاڭداپ الىندى. كەيىن، سولاردىڭ ىشىنەن تيگران تۋنيانتستىڭ ازىرلەگەن جۇمىسى ەڭ ۇزدىك دەپ تانىلدى. ول قالانىڭ تۋريستىك برەندىن جاساۋعا نەگىز بولدى.
اۆتور: ايبوتا جاپپاربەرگەن