نۇرسۇلتان نازاربايەۆ پولشانى ەۋرازيالىق ەكونوميكالىق وداقتان قورىقپاۋعا شاقىردى

ۆارشاۆا. قازاقپارات - قازاقستان پرەزيدەنتى نۇرسۇلتان نازاربايەۆ پولشالىق بيزنەسمەندەرگە ەۋرازيالىق ەكونوميكالىق وداق (ە ا ە و) اۋماعىنداعى جۇمىستىڭ ارتىقشىلىقتارىن ءتۇسىندىردى، دەپ حابارلادى قازاقپارات ءتىلشىسى.
None
None

«ەگەر ءبىز سىزدەرمەن بىرگە قازاقستاندىق اۋىل شارۋاشىلىعى ءونىمىن وڭدەسەك، قىتايعا، ورتالىق ازياعا، رەسەيدىڭ باتىسى مەن سولتۇستىگىنە ساتۋعا بولادى، بۇل وتە ءتيىمدى بولار ەدى. پولشاعا ەۋرازيالىق ەكونوميكالىق وداقتىڭ نەسى ۇنامايتىنىن بىلمەيمىن. بۇل ىسكە باستاماشىلىق ەتكەن مەنمىن. رەسەي قايتا كەڭەس وداعىن جيناپ جاتىر دەيدى بىرەۋلەر. مۇمكىن كەڭەس وداعىنىڭ قۇلاعانىن قالامايتىندار بار شىعار، الايدا ونى قالپىنا كەلتىرگىسى كەلەتىندەردىڭ باسى جوق، سەبەبى بۇل مۇمكىن ەمەس. سوندىقتان ەۋروپادا بۇل جايلى دۇرىس تۇسىنىك بار دەپ ويلامايمىن»، - دەپ مالىمدەدى بيزنەس- فورۋمدا ن. نازاربايەۆ.

مەملەكەت باسشىسى بۇل جاعدايدى تۇزەتۋ ءۇشىن كۇزدە «ەۋروپالىق وداق پەن ەۋرازيالىق ەكونوميكالىق كەڭىستىكتى» جاقىنداتۋ كونفەرەنسياسى وتەتىنىن حابارلادى.

«دوستار، سىزدەر مىنانى تۇسىنۋلەرىڭىز كەرەك. بىرىنشىدەن، ە ا ە و - بۇل 180 ميلليون حالىق، 2,5 تريلليون دوللار ءى ج ءو، كەدەن وداعى، اشىق جانە ەركىن شەكارالار. بۇل ينتەگراتسيا، باسقا ەشتەڭە ەمەس. ارينە، ەۋرازيالىق وداق جاسايىق دەگەن ساياساتكەرلەر دە بولدى. مەن: «جوق تەك ەكونوميكالىق» دەدىم. ءبىز تاۋەلسىزدىگىمىزدى پولشادان كەم قادىر تۇتپايمىز»، - دەپ اتاپ ءوتتى ن. نازاربايەۆ.

ونىڭ ايتۋىنشا، ەگەر پولشالىق كومپانيالار ە ا ە و- دا جۇمىس ىستەسە، وندا 180 ميلليون حالىقپەن نارىق پايدا بولادى. «ساياساتتان ءبىر ساتكە الىس كەتەيىكشى. ەگەر اگروونەركاسىپتىك كەشەن ءونىم وڭدەسە، ءبىز قوسىمشا قۇندى كوتەرەمىز، بۇل بارلىعىنا پايدا اكەلەدى»، - دەپ ءسوزىن تۇيىندەدى ول.

ەسكە سالساق، 22-23 -تامىزدا ن. نازاربايەۆ پرەزيدەنت اندجەي دۋدانىڭ شاقىرتۋىمەن پولشا رەسپۋبليكاسىنا مەملەكەتتىك ساپارمەن باردى.

  

سوڭعى جاڭالىقتار