الماتىدا ۇلتتىق باسپا ءسوز كلۋبى ورنالاسقان عيمارات ءسۇرىلىپ تاستالادى - فوتو

سوت ورىنداۋشىلارىنىڭ ايتۋىنشا، عيماراتتى ءسۇرىپ تاستاۋ تۋرالى سوت ۇكىمى كۇشىنە ەنگەن. قازىر جۇمىسشىلار عيماراتتىڭ جوعارعى قاباتتارىن بولشەكتەپ، بۇزىپ جاتىر.
«ءبىز عيماراتتى ءسۇرىپ تاستاۋدى ءبىر ايعا كەيىنگە قالدىرۋدى سۇراپ ەدىك. ءبىراق، بۇگىن سوت ورىنداۋشىلارى سوت شەشىمىنە سايكەس، عيماراتتىڭ جوعارعى قاباتتارىن بولشەكتەپ، بۇزۋعا كىرىستى»، - دەدى «ۇلتتىق باسپا ءسوز كلۋبى» ج ش س وكىلى اسقار ماتايەۆ.
ءوندىرىپ الۋشى - الماتى قالاسى ساۋلەت جانە قالا قۇرىلىسى باسقارماسى ءسۇرىپ تاستاۋ جۇمىسىن ءوز ەسەبىنەن جۇرگىزۋدە. كەيىن بارلىق شىعىندار ۇلتتىق باسپا ءسوز كلۋبى ەسەبىنەن وتەلەتىن بولادى.
«بىزگە سوت شەشىمى 2016 -جىلدىڭ 30 -ماۋسىمىندا كەلىپ ءتۇستى. الدىمەن، قاۋىپسىزدىك تەحنيكاسىن ساقتاي وتىرىپ، شاتىرىن، ەسىك- تەرەزەلەرىن، كەيىن قابىرعاسىن الاتىن بولامىز. بۇدان سوڭ، بىرتىندەپ 3-4 -قاباتتارى الىنادى. مۇنىڭ بارلىعى جۇمىسشىلاردىڭ كۇشىمەن جاسالادى. عيماراتتى ەرىكتى تۇردە ءسۇرىپ تاستاۋعا ارنايى مەرزىم بەرىلگەن ەدى. الايدا، بۇل باعىتتا ەشتەڭە جاسالمادى. سوندىقتان، ءسۇرىپ تاستاۋ جۇمىستارى ءماجبۇرلى تۇردە جۇرگىزىلىپ جاتىر»، - دەدى الماتى قالاسى بويىنشا ادىلەت دەپارتامەنتىنىڭ سوت ورىنداۋشىسى ارنۇر باقبەرگەن.
اۆتور: ايبوتا جاپپاربەرگەن