قازاقستاننىڭ اۋىر اتلەتتەرى ريو وليمپياداسىندا ەل نامىسىن ابىرويمەن قورعادى - اتى اڭىزعا اينالعان تۇركيالىق مامان ەنۆەر تۇركەلەري

 الماتى. قازاقپارات - 20 - تامىزدا اۋىر اتلەتيكادان قازاقستاننىڭ ۇلتتىق قۇراماسىنىڭ وكىلدەرى الماتىعا ورالدى.
None
None

ولاردى سپورت سالاسىنداعى ۇيىمداردىڭ وكىلدەرى، زىلتەمىرشىلەردىڭ تۋعان- تۋىستارى، تۋعان وڭىرىنەن كەلگەن دەلەگاتسيالار، جاس سپورتشىلار، قالا تۇرعىندارى - بارلىعى 300 دەن استام ادام زور قۋانىشپەن قارسى الدى.

قارسى الۋشىلار اراسىندا اۋىر اتلەتيكا سالاسىندا اتى اڭىزعا اينالعان تۇركيالىق مامان، قازاقستان قۇراما كومانداسىنىڭ كەڭەسشى- باپكەرى 74 جاستاعى ەنۆەر تۇركەلەري دە بولدى. بۇرىندارى ءبىر بالداقپەن جۇرەتىن ول بۇگىندە ەكى بالداققا سۇيەنەتىن بولعان. سوعان قاراماستان، ەنۆەر اعا دا ريو وليمپياداسىنىڭ جۇلدەگەرلەرىن جانكۇيەرلەرمەن بىرگە جاس بالاشا قۋانىپ قارسى الدى. سالتاناتتى شارادان كەيىن، «قازاقپارات» ءتىلشىسى اتاقتى باپكەردەن قىسقاشا سۇحبات العان بولاتىن.

- ەنۆەر اعا، اۋىر اتلەتيكادان قازاقستان قۇراماسىنىڭ ريو وليمپياداسىندا كورسەتكەن ونەرىنە قانداي باعا بەرەر ەدىڭىز؟

 - ءبىزدىڭ كوماندا وليمپيادا تۇعىرىندا 5 مەدالدى قانجىعاعا بايلادى. نيجات راحيموۆ ءوز سالماعىندا التىن مەدالدى يەلەنسە، جازيرا جاپپارقۇل كۇمىس مەدالعا قول جەتكىزدى. ءۇشىنشى ورىن العان اۋىر اتلەتتەرىمىز دە بارشىلىق. نەگىزى ريو- دە- جانەيروعا ەكىنشى قۇرام باردى دەۋگە بولادى. ءبىراق، سوعان قاراماستان ولار ەل نامىسىن ابىرويمەن قورعاپ شىقتى. وسى سالانىڭ بەلگىلى ماماندارى ماعان قازاقستاندا زىلتەمىرشىلەردىڭ جاڭا دارىندى بۋىنى ءوسىپ كەلە جاتقاندىعىن ايتىپ، ءتانتى بولعاندارىن ءبىلدىردى. شىنىندا دا قازاقستاندا دارىندى، بولاشاعىنان ءۇمىت كۇتتىرەتىن جاس زىلتەمىرشىلەر ءوسىپ كەلەدى. مەن ويلايمىن، بۇل كوماندا 2020 -جىلى توكيدودا وتەتىن كەزەكتى وليمپيادا جارىسىندا بۇدان دا جوعارى دارەجەدە ونەر كورسەتەدى.

- ەنۆەر اعا، 77 كەلىگە دەيىنگى سالماقتا ونەر كورسەتكەن نيجات راحيموۆ وليمپيادا چەمپيونى اتاندى. ەكىنشى مۇمكىندىكتە 214 كەلىنى كوتەرىپ، الەم رەكوردىن بىردەن 4 كەلىگە جاڭارتىپ، ءدۇيىم جۇرتتى تاڭ قالدىردى. ءسىز نيجاتتىڭ التىن الاتىندىعىنا سەندىڭىز بە؟

 - ارىدەن باستايىن. 2014 - جىلى قاڭتار ايىندا باكۋ قالاسىنان ماعان نيجاتتىڭ اكەسى ءالي تەلەفون شالدى. «مەنىڭ نيدجات دەگەن ۇلىم بار. جاسوسپىرىمدەر اراسىنداعى وليمپيادا ويىندارىنىڭ جەڭىمپازى. ونىڭ ارمانى - وليمپيادا چەمپيونى بولۋ.  ۇلىمدى ءسىزدىڭ قولىڭىزعا، قازاقستانعا جىبەرگىم كەلەدى. نەمەسە بىزگە باكۋگە كەلىڭىز. فەدەراتسيا باسشىلىعى دا ءسىزدىڭ كەلگەنىڭىزدى قالايدى»، - دەدى. ماعان ارينە، باسقا ەلدەردەن دە ۇسىنىستار كەلىپ جاتادى. مەنىڭ قازاقستاندا جۇمىس ىستەپ كەلە جاتقانىما اتتاي 12 جىل بولدى. قازاقستان مەنىڭ ەكىنشى وتانىما اينالدى دەۋگە بولادى. ماعان بۇل جەردە بارلىعى ۇنايدى. سوندىقتان مەن نيجاتتىڭ اكەسىنە:

«مەن ەشقايدا بارمايمىن.  ۇلىڭدى 10-15 كۇنگە الىپ كەل. كورەيىك. سوندا قازاقستاننىڭ اتىنان ونەر كورسەتۋىنە بولاتىن- بولمايتىندىعىن ايتىپ بەرەمىن»، - دەدىم. سودان نە كەرەك، ۇلىن الىپ كەلدى. نيجات ول كەزدە 21 جاستا بولاتىن. 15 كۇن قولىمدا جاتتىقتى. جۇلقا كوتەرۋدەن 133-135، ال سەرپە كوتەرۋدەن 160-165 كەلىنى كوتەردى. ءبىراق، مەن ونىڭ مىقتى، تابيعي قاسيەتتەرىن بايقادىم. دەنە كۇشى، اسىرەسە جىلدامدىعى وتە جوعارى دارەجەدە بولدى. ءبىراق، تەحنيكالىق جاعىنان جەتكىلىكتى شىڭدالماعان ەدى. مەن اكەسىنە نيجاتتىڭ قازاقستانعا كەلسە، ونىڭ الەم جانە وليمپيادا چەمپيونى بولا الاتىندىعىن، بۇل ءۇشىن بىرگە جۇمىس ىستەۋ كەرەك ەكەندىگىن كەسىپ ايتتىم. سودان نيجات قازاقستانعا كەلدى. سول جىلى قازاقستان ازاماتتىعىن الدى. ال 2015 -جىلى ول ا ق ش- تىڭ حيۋستون قالاسىندا وتكەن الەم بىرىنشىلىگىندە چەمپيون اتاندى. ال بيىل، وليمپيادا چەمپيوندىعىنا قول جەتكىزدى. مەن ۋادەمدى ورىندادىم...

- ەنۆەر اعا، ايتىڭىزشى، 69 كەلىگە دەيىنگى سالماق دارەجەسىندە ونەر كورسەتكەن جازيرا جاپپارقۇلعا التىنعا قول جەتكىزۋىنە نە كەدەرگى بولدى؟

- جازيراعا تاجىريبە جەتىسپەدى. ويتكەنى ونىڭ باستى قارسىلاسى قىتايلىق سيان يانمەي وتە تاجىريبەلى اتلەت. دەگەنمەن، جازيرا وسى جارىستا ءوزىنىڭ بار مۇمكىندىگىن جۇزەگە اسىردى دەپ ويلايمىن. جازيرا وتە دارىندى جانە ەڭ باستىسى وتە ەڭبەكقور اتلەت. ءبىراق، ءاربىر مۇمكىندىگىن وتە سانالى، وتە ءتيىمدى پايدالانۋى ءۇشىن وعان تاجىريبە كەرەك. ءالى ۋاقىت بار. جازيرا ءالى جاس. 23 جاسقا ەندى اياق باستى. توكيو وليمپياداسىندا چەمپيون بولاتىندىعىنا كامىل سەنەمىن. ءبىراق، بۇل ءۇشىن جاتتىعۋلاردا جانە جارىستارعا قاتىسىپ، ايانباي تەر توگۋ قاجەت.

- ەنۆەر اعا، اۋىر اتلەتيكادان ۇلتتىق قۇرامانىڭ ءبىرىنشى قۇرامىنا قاتىستى جاعدايدان ءبارىمىز دە حاباردارمىز. وكىنىشكە قاراي ولاردىڭ ريوعا بارۋىنا جول بەرىلمەدى. وسىعان قاتىستى ءوز پىكىرىڭىزدى بىلدىرسەڭىز.

 - بۇل مەنىڭ ءارى ىزامدى ءارى كۇلكىمدى كەلتىرەدى. مەن اۋىر اتلەتيكادا جۇرگەنىمە 40 جىلعا تايادى. سپورتشىنىڭ دوپينگ قابىلداعان- قابىلداماعانىن جارىستان سوڭ 10 كۇن ىشىندە انىقتاۋ قاجەت. ادىلدىگى وسى. قولىڭنان كەلە مە، ءادىسىن، تەحنولوگياسىن تاپ تا 10 كۇن ىشىندە انىقتا. ءبىراق، 8 جىلدان كەيىن ەمەس قوي!؟ بۇل بارىپ تۇرعان ادىلەتسىزدىك. يليا يلين ءۇشىن بۇل وتە اۋىر پسيحولوگيالىق سوققى. وتە ايانىشتى جاعداي. ال، يليا الەمدىك اۋىر اتلەتيكانىڭ كورنەكتى تۇلعاسى. ول قازاقستان اۋىر اتلەتيكاسىنىڭ سيمۆولى. وسىنداي ادامدى وسىنداي لاس ارەكەتپەن قورلاۋعا بولا ما!؟ حالىقارالىق وليمپيادا كوميتەتى ءوزىنىڭ قاتەلىگىن ءتۇسىندى دەپ ويلايمىن. ەندى مۇنداي ارەكەتتەرگە بارمايتىن شىعار. ءبىراق، امال قانشا، ريو وليمپياداسى ارتتا قالدى. ەندى بولاشاققا ۇمىتپەن قارايىق.

 - اڭگىمەڭىزگە راحمەت.

اۆتور: ايبوتا جاپپاربەرگەن

سوڭعى جاڭالىقتار