قوش بول، ريو! الدا - توكيو

وعان وسى وليمپيادادا ونەر كورسەتكەن، ءالى ەلدەرىنە قايتا قويماعان سپورتشىلار قاتىستى. ولاردىڭ اراسىندا قازاق ەلىنىڭ وكىلدەرى دە بولدى.
سالتاناتتى ءراسىم بارىسىندا برازيليا حالقىنىڭ تاريحى، سالت- داستۇرلەرى مەن ونەرى بارشا الەمگە پاش ەتىلدى. ءان مەن بي، تەاترلاندىرىلعان كورىنىستەر ستاديونداعى حالىققا ايرىقشا اسەر سىيلادى. سونداي- اق وليمپيادانىڭ ەڭ جارقىن كەزدەرى كورسەتىلدى. ولاردىڭ اراسىنا قازاقستاندىق دزيۋدوشى وتگونسەگەگ گالبادراح پەن ايەلدەر كۇرەسىنەن باتىس قازاقستاندىق ەكاتەرينا لاريونوۆانىڭ جەڭىستى جۇلىپ العان ساتتەرى ەنگىزىلدى.
بۇدان كەيىن ءداستۇر بويىنشا حالىقارالىق وليمپيادا كوميتەتىنىڭ پرەزيدەنتى توماس باح مارافوننىڭ جەڭىمپازى، كەنيالىق ەليۋد كيپچوگە مەن جۇلدەگەرلەرى فەييسا ليلەسا (ەفيوپيا) مەن گالەن رۋپكە (ا ق ش) مەدالدارىن سالتاناتتى جاعدايدا تابىس ەتتى. سونداي- اق وليمپيادا كوميتەتى سپورتشىلار كوميسسياسىنىڭ جاڭا مۇشەلەرى تانىستىرىلدى. بەلسەندى ەرىكتىلەر دە ۇمىت قالعان جوق.
گرەكيا مەملەكەتى جانە وليمپيادا گيمندەرى ورىندالدى. وليمپيادانىڭ قاسيەتتى بايراعى توكيو مەرىنە تابىس ەتىلىپ، جاپونيا استاناسى تانىستىرىلدى.
ريو وليمپياداسىن ۇيىمداستىرۋ كوميتەتىنىڭ باسشىسى كارلوس ارتۋر نۋزمان وسى وليمپيادا ويىندارىن جوعارى دەڭگەيدە وتكىزۋگە ۇلەس قوسقانداردىڭ بارىنە ريزاشىلىعىن ءبىلدىردى. «الەمدە بەيبىتشىلىك بولسىن. باسەكەلەر تەك سپورت الاڭدارىندا ءوتسىن»، دەدى ول. حالىقارالىق وليمپيادا كوميتەتىنىڭ پرەزيدەنتى توماس باح ريو وليمپياداسىن ۇيىمداستىرۋشىلار مەن وعان قاتىسقان بارلىق مەملەكەتتەر وكىلدەرىنە العىسىن ايتىپ، ريو ويىندارىن جابىق دەپ جاريالادى.
ەسكە سالا كەتەيىك، قازاقستاننان ريو وليمپياداسىنا 26 سپورت تۇرىنەن 104 سپورتشى قاتىسىپ، باق سىنادى. قازاقستاندىقتار بارلىعى 17 مەدال (3 التىن، 5 كۇمىس، 9 قولا) الىپ، ەل سپورتى تاريحىندا كۇمىس جانە جالپى جۇلدەلەر سانى جونىنەن رەكوردتىق كورسەتكىشكە قول جەتكىزدى.
ەندى الدا 2020 -جىلى 24 -شىلدە - 9 - تامىز ارالىعىندا جاپونيا استاناسى توكيودا وتەتىن 32 - جازعى وليمپيادا ويىندارى تۇر. ونىڭ باعدارلاماسىنا جاڭادان كاراتە سىندى سپورت تۇرلەرى ەنگىزىلمەكشى. دەمەك، قازاقستان ءۇشىن دە مەدال الاتىن مۇمكىندىكتەر مولايا تۇسپەكشى.
ەندەشە، جەڭىستى كۇندەردە كەزدەسەيىك.