قازاقستاننىڭ ريو وليمپياداسىنداعى تولاعاي تابىستارى - ءتورتجىلدىقتىڭ قورىتىندىلارى

قازاقستان اتىنان ۇكىلەپ جىبەرىلگەن ۇلتتىق قۇراما ەل ءۇمىتىن اقتاپ، 200 دەن استام مەملەكەت ىشىنەن جالپى ەسەپتە 21-ورىنعا يە بولدى. قازاقستان قورجىنىندا 3 التىن، 5 كۇمىس، 9 قولا مەدال بار.
ايتا كەتەلىك، ريو وليمپياداسىنا قازاقستاننان 104 سپورتشى 26 سپورت تۇرىنەن ونەر كورسەتتى. وسىلايشا، 2016 -جىلدىڭ 20 - تامىزىنداعى جاعداي بويىنشا 1996 -جىلعى اتلانتا وليمپياداسىنان بەرى تاۋەلسىز قازاقستاندا وليمپيادا چەمپيوندارىنىڭ سانى - 19 عا جەتتى.
ريو تورىندە قازاقستان قورجىنىنا ەڭ العاشقى مەدالدى دزيۋدوشى گالبادراح وتگونتسەسەگ سالعان بولاتىن. موڭعوليا نىڭ تۋماسى، بۇگىندە قازاقستاننىڭ ۇلتتىق قۇراماسىندا جاتتىعاتىن گالبادراح 48 كەلىگە دەيىنگى سالماقتا ونەر كورسەتىپ، قولا مەدال ەنشىلەدى. قولا ءۇشىن بولعان بەلدەسۋدە ول كۋبا چەمپيونى داياريس مەسترە الۆارەسپەن كۇش سىناسىپ، «يپپون» ادىسىمەن قارسىلاسىنىڭ جاۋىرىن جەر يىسكەتتى.
ونىڭ ءىزىن الا دزيۋدوشى ەلدوس سمەتوۆ ەل قورجىنىن كۇمىس مەدالمەن تولىقتىردى.
ول فينالدا رەسەيلىك بالۋان بەسلان مۋدرانوۆپەن بەلدەسىپ، نەگىزگى ۋاقىتتا تەڭ دارەجەدە ونەر كورسەتتى. وكىنىشكە قاراي قوسىمشا ۋاقىتتىڭ سوڭعى سەكۋندتارىندا رەسەيلىك سپورتشى ايلاسىن اسىرىپ كەتتى. وسىلايشا ەلدوس سمەتوۆ ريو وليمپياداسىنىڭ كۇمىس جۇلدەگەرى اتاندى. ەلدوستىڭ بۇل جۇلدەسى وليمپيادانىڭ العاشقى كۇنى قازاقستان قورجىنىنا تۇسكەن ەكىنشى مەدال.
ەلدوس سمەتوۆ - قازاقستاندىق دزيۋدوشى، حالىقارالىق دارەجەدەگى قازاقستاننىڭ سپورت شەبەرى، 2015 -جىلعى الەم چەمپيونى، 2010 -جىلعى جاستار اراسىنداعى الەم چەمپيونى، 2013 -جىلعى ازيا چەمپيوناتىنىڭ قولا جۇلدەگەرى. ول 1992 -جىلى 9 - قىركۇيەكتە تارازدا دۇنيەگە كەلگەن.
وليمپيادا ويىندارىندا اۋىر اتلەتتەرىمىزگە ەرەكشە نازار اۋدارىلعانى انىق. قازاقستان الىپتارى يليا يلين، جاسۇلان قىدىربايەۆ، مايا مانەزا، ءزۇلفيا چينشانلو مەن سۆەتلانا پودوبەدوۆالار دوپينگ داۋى سالدارىنان وليمپيادا جارىستارىنان شەتەتتىلگەننەن كەيىن، ەلىمىزدىڭ ءبىر قابىرعاسى ويسىراپ قالعان ەدى. بارشا الەم «ەندى قازاقستاننىڭ شاما- شارقى نەشىك؟!» دەپ سىن كوزبەن قاراعانى دا جاسىرىن ەمەس. دەگەنمەن بۇل جولى دا الەكسەي ني جەتەكشىلىك ەتەتىن ۇلتتىق قۇراما ەڭسەمىزدى تۇسىرگەن تۇسىرگەن جوق، تۋ سىرتىمىزدان الا كوزدەنىپ وتىرعانداردىڭ ەسىنەن تاندىرعانى دا شىندىق .
ريو وليمپياداسىند ا زىلتەمىر كوتەرۋدەن 77 كەلىگە دەيىنگى سالماق دارەجەسىندە 23 جاستاعى نيجات راحيموۆ - التىن، 22 جاستاعى جازيرا جاپپارقۇل (69 كەلىگە دەيىنگى سالماق) - كۇمىس، 23 جاستاعى كارينا گوريچيەۆا (63 كەلىگە دەيىنگى سالماق) ، 25 جاستاعى فارحاد حاركي (62 كەلىگە دەيىنگى سالماق) ، الەكساندر زايچيكوۆ (105 كەلىگە دەيىنگى سالماقتا) - قولا مەدال العان بولاتىن، سونداي- اق، 24 جاستاعى مارگاريتا ەليسەيەۆا (48 كەلى) بەسىنشى، 24 جاستاعى چونتەي ارلي (56 كەلى) 4- ورىندارعا قول جەتكىزدى.
اۋىر اتلەت نيجات راحيموۆ ريو-2016 وليمپياداسىندا التىن مەدال جەڭىپ الىپ، يليا ءيليندى جوق تىعىن بىلدىرمەدى . وليمپيادا ويىندارىنىڭ رەكوردىن جاڭارتقان نيدجاتتىڭ ونەرى بارشا الەم جۇرتشىلىعىنىڭ تاڭدايىن قاقتىردى.
ريو وليمپياداسىندا 77 كەلىگە دەيىنگى سالماق دارەجەسىندە ونەر كورسەتكەن نيجات راحيموۆ جۇلقا كوتەرۋ سايىسىندا 165 كەلى كوتەردى. ال، سەرپە كوتەرۋدە قازاقستاندىق سپورتشى 214 كەلىنى باعىندىردى. ءسويتىپ، قوسسايىس قورىتىندىسى بويىنشا 379 (165+214) كەلى ناتيجەنى كورسەتىپ، ريو وليمپياداسىنىڭ چەمپيونى اتاندى.
«ريو وليمپياداسىنا جان- جاقتى دايىندالدىم. تىنباي جاتتىقتىم. تەر توگىپ ەڭبەك ەتتىم. ماعان باپكەرلەرىم كومەكتەستى. سول ءۇشىن ولارعا شىن جۇرەكتەن ريزاشىلىعىمدى بىلدىرەمىن. اكەمە دە ايتار العىسىم شەكسىز. ماعان قولداۋ كورسەتكەندەرىڭىز ءۇشىن بارلىقتارىڭىزعا راحمەت! مەن وليمپياداعا بارار الدىندا ايتقانمىن، ءقازىر دە قايتالاپ ايتامىن: مەنىڭ قارسىلاسىم تەك قانا زىلتەمىر. زىلتەمىرمەن عانا سايىسقا تۇسەمىن. باسقا قارسىلاس كوزىمە كورىنبەيدى»، - دەدى ن. راحيموۆ تولقىپ.
نيجات راحيموۆ 2015 -جىلعى الەم چەمپيونى. جاسى 23-تە. ۇلتى ازەربايجان. باكۋ قالاسىندا تۋعان. 2014 -جىلى قازاقستان ازاماتتىعىن العان. بۇگىندە اتىراۋ قالاسىندا تۇرادى.
تاعى ءبىر اۋىر اتلەتىمىز جازيرا جاپپارقۇل ريو وليمپياداسىندا كۇمىس جۇلدەگەر اتاندى. كۇمىس جۇلدەگەر اتانىپ قانا قويماي، قازاق قىزدارى ىشىندە اۋىر اتلەتيكادان وليمپيادادا جۇلدە العان تۇڭعىش سپورتشى بولىپ تاريحتا قالدى.
«ماعان قىزۋ قولداۋ كورسەتكەنى ءۇشىن قازاق ەلىنە شىن جۇرەكتەن ۇلكەن العىسىمدى بىلدىرەمىن! ەلباسىنا ايتار العىسىم شەكسىز! ءبىزدى كەرەمەت كۇتىپ الىپ جاتىرسىزدار! ءبىز سىزدەردىڭ قولداۋلارىڭىزدى ۇنەمى سەزىنىپ جۇردىك. راحمەت! العا قازاقستان!»، - دەدى ول الماتىعا جەتىپ، تىلشىلەرگە بەرگەن العاشقى سۇحباتتارىنىڭ بىرىندە.
سونىمەن قاتار، جازيرا ەندى الداعى توكيو وليمپياداسىندا چەمپيون اتانۋعا كۇش سالاتىندىعىن جەتكىزدى.
«ەندى، بۇل وليمپيادادا التىن مەدالعا قول جەتكىزۋدى جوسپارلاعان ەدىم. الايدا، جاتتىعۋ بارىسىندا ازداپ قاتەلىكتەر كەتتى. جاراقات الىپ قالدىم. سونى ەمدەتەمىن دەپ التىن ۋاقىتىمدى جوعالتىپ الدىم. ءبىراق، ءوزىم ءبارىبىر كوڭىلىمدى تۇسىرگەن جوقپىن. ريودا ءسال قيىنداۋ بولدى. ءبىراق، قولىمنان كەلگەنىنىڭ بارلىعىن جاسادىم. اللاعا شۇكىر، كۇمىس جۇلدەگە قول جەتكىزدىم. بۇعان دا جەتە الماي جاتقاندار بار عوي. سول جەتە الماي جاتقاندارعا وسىنداي مەدالدارعا جەتە بەرۋلەرىنە تىلىكتەسپىن. قازاق ەلى جاساسىن! ەندى الداعى توكيو وليمپياداسىنا دايىندالامىن»، - دەدى ج. جاپپارقۇل.
بۇل سپورت تۇرىندە قولا مەدال العان فارحاد حاركي، الەكساندر زايچيكوۆ پەن كارينا گوريچيەۆالار دا ەلدىڭ ءۇمىتىن اقتادى دەپ تولىق سەنىممەن ايتا الامىز.
اۋىر اتلەتيكادان قازاقستان قۇراما كومانداسىنىڭ باس باپكەرى الەكسەي ني جۋرناليستەرگە بەرگەن سۇحباتىندا قازاقستان قۇراما كومانداسى ريو وليمپياداسىنداعى ونەرىنە جوعارى باعا بەردى.
ونىڭ ايتۋىنشا، وليمپيادادا ءاربىر مەدال - قاجىرلى ەڭبەكتىڭ جەمىسى.
«ريو وليمپياداسىندا بارلىعى 8 اتلەتىمىز ونەر كورسەتتى. قورجىنعا 5 مەدال ءتۇستى. ەكى اتلەت ءتورتىنشى ورىن، ال ءبىر اتلەت بەسىنشى ورىن الدى. بۇل وليمپيادادا ەكىنشى قۇرام ونەر كورسەتتى دەسە دە بولادى. بەس اتلەت وليمپيادا تۇعىرىنا ءبىرىنشى رەت كوتەرىلىپ وتىر. وسى جايتتەردى ەسكەرەر بولساق، كوماندانى جوعارى دارەجەدە ونەر كورسەتتى دەۋگە ابدەن بولادى»، - دەدى ا. ني.
سونىمەن قاتار، الەكسەي ني جازيرا جاپپارقۇلعا وليمپيادا چەمپيونى اتانۋىنا وزىنە دەگەن سەنىمدىلىك جەتىسپەگەنىن ايتتى.
«جازيراعا قىتايلىق قارسىلاسىن جەڭە الاتىندىعىنا دەگەن سەنىمدىلىك جەتىسپەدى. ونىڭ ۇستىنە، جۇلقا كوتەرۋدەن ەكىنشى ورىن العان سوڭ، بوساڭسىپ قالدى. ءۇشىنشى مۇمكىندىكتەن ايىرىلماۋ كەرەك ەدى. سەرپە كوتەرۋدە ءبىرىنشى مۇمكىندىكتى ءساتسىز اياقتادى. 140 كەلىنى كوتەرۋ كەرەك ەدى. ەكىنشى مۇمكىندىكتە - 144، ال ءۇشىنشى مۇمكىندىكتە 147 كەلىنى كوتەرۋ كەرەك بولاتىن. 147 كەلىنى كوتەرۋ - وليمپيادا چەمپيونى بولۋ دەگەن ءسوز. قىتايلىق قارسىلاسى 145 كەلىدەن ءارى اسا الماس ەدى. بار مۇمكىندىگى سول بولاتىن. وزدەرىڭىز دە كوردىڭىزدەر عوي، ول ءۇشىنشى مۇمكىندىگىن ءساتسىز اياقتادى. جازيراعا ءبىر مۇمكىندىك جەتىسپەدى. ەگەر، ول 147 كەلىنى كوتەرگەندە قىتايلىق اتلەت 148 دى كوتەرە الماس ەدى. جازيراعا جەڭىمپازدىق رۋح، تاجىريبە، سالقىن قاندىلىق جەتىسپەدى. ءبىراق، ەڭ باستىسى جازيرا قىتايلىق قارسىلاسىن جەڭۋگە بولاتىندىعىن سەزدى. ال بۇل، باعا جەتپەس تاجىريبە. ال تاجىريبە - سەنىمدىلىك كەپىلى»، - دەدى ا. ني.
بۇدان باسقا، اۋىر اتلەتيكادان قازاقستان قۇراماسىنىڭ باس باپكەرى باسقا دا اتلەتتەرىمىزدىڭ ونەرىنە باعا بەردى.
«كارينا گوريچيەۆا جوعارى دارەجەدەگى حالىقارالىق جارىستارعا قاتىسىپ كورمەگەن اتلەت. وليمپياداعا ءبىرىنشى رەت قاتىسىپ، ءۇشىنشى ورىنعا كوتەرىلدى. بۇل جاقسى جەتىستىك. مۇنداي ءدۇبىرلى دودا كارينانىڭ وزىنە دەگەن سەنىمدىلىگىن ارتتىرا تۇسەدى. ال، فارحاد حاركي كەزىندە الەم بىرىنشىلىگىندە 14- ورىندى يەلەنگەن. سوعان قاراماستان وليمپيادادا قولا جۇلدەگە يە بولدى. بۇل دا جەتىستىك. مارگاريتا ەليسەيەۆاعا كەلەر بولساق، ول ءوز سالماعىندا جەڭىسكە جەتۋى ءتيىس ەدى. ءبىراق تاجىريبە جەتىسپەدى. ءبىر سوزبەن ايتقاندا پسيحولوگيالىق تۇرعىدا «جانىپ كەتتى». ال زايچيكوۆتىڭ مۇمكىندىگىن قابىلداۋعا بولاتىن ەدى. اتتەڭ، قازىلار القاسى قابىلداماي تاستادى. بىزگە ادەيى قيانات جاسادى. التىن مەدالدى بەرگىسى كەلمەدى»، - دەدى الەكسەي ني.
اۋىر اتلەتيكامىز ءبىر توبە بولسا، بوكسىمىز ءبىر توبە. بۇل جولى دا قازاقستان قۇراماسىنىڭ ەنشىسىنە مەدال جاۋدىرعان بوكسشىلارىمىز جاراپ تۇر. الەمنىڭ ەكى دۇركىن ەڭ ۇزدىك باپكەرى مىرزاعالي ايتجانوۆ گۇرزى جۇدىرىق جىگىتتەردى جاقسىلاپ باپتاپ كەلىپتى. بىردەن بارلىق سالماقتا وليمپيادا جولداماسىن العان الەمدەگى ءۇش قۇرامانىڭ ءبىرى قازاقستان بولدى. ريو-2016 دوداسىن ءساتتى وتكىزگەن بوكسشىلار ەل نامىسىن ابىرويمەن قورعاپ، 1 التى، 2 كۇمىس پەن 2 قولا مەدالدار جەڭىپ الدى. بوكستا جالپى ەسەپتە قازاقستان كۋبا مەن فرانسيادان كەيىنگى ءۇشىنشى ورىنعا قول جەتكىزدى.
ايتا كەتەيىك، ءبىزدىڭ قۇرامادا دانيار ەلەۋسىنوۆ 69 كەلىدە التىن السا، 81 كەلىدە ادىلبەك نيازىمبەتوۆ پەن 91 كەلىدە ونەر كورسەتەتىن ۆاسيلي ليەۆيت كۇمىس ەنشىلەدى. تاعى ەكى بوكسشىمىز جارتىلاي فينالدا ءسۇرىنىپ، ءۇشىنشى ورىنعا تابان تىرەدى. ولار - اسا اۋىر سالماقتاعى يۆان دىچكو مەن 75 كەلىگە دەيىنگى سالماقتاعى داريعا شاكىموۆا.
وليمپيادا تورىندە دانيار ەلەۋسىنوۆتىڭ ونەرىنە ءتانتى بولماعان جان جوق شىعار. وسى ورايدا تاۋەلسىزدىكتەن بەرگى التى وليمپيادادا قازاق بوكسشىلارىنان 7 بوكسشى چەمپيون اتانىپتى. دانيار ەلەۋسىنوۆ سونىڭ جەتىنشىسى بولىپ تاريحقا قالدى.
دانيار ەلەۋسىنوۆ فينالدا ەرەكشە ىنتا- جىگەرىمەن جۇدىرىقتاستى. قارسىلاسىنا ەشقانداي مۇمكىندىك بەرمەي، 3:0 ەسەبىمەن جەڭىسكە جەتىپ، ريو وليمپياداسىنىڭ چەمپيونى دەگەن اتاققا قول جەتكىزدى.
جارتىلاي فينالدا دانيار فرانسيا سپورتشىسى سۋلەيمان سيسسوكونى جەڭگەن ەدى.
وليمپيادا چەمپيونى اتانعان جەرلەسىمىز وسىعان دەيىن 2013 -جىلى الەم چەمپيونى اتاعىن جەڭىپ العان بولاتىن. سونىمەن قاتار، ول 2010 -جىلى جانە 2014 -جىلى ازيا ويىندارىنىڭ جەڭىمپازى، حالىقارالىق ساناتتاعى سپورت شەبەرى. دانيار باتىس قازاقستان وبلىسىنىڭ تۋماسى، قازىرگى ۋاقىتتا استانادا اكەسى مارات ەلەۋسىنوۆتىڭ قول استىندا جاتتىعادى.
ەسكە سالا كەتەيىك، 69 كەلى سالماق «قازاقتىڭ سالماعى» دەپ اتالىپ كەتكەن ەدى. وسىعان دەيىنگى ءۇش وليمپيادا ويىندارىندا وسى سالماقتا ءۇش بوكسشىمىز چەمپيون اتاندى. 2004 -جىلى افينا وليمپياداسىندا باقتيار ارتايەۆ، 2008 -جىلى بەيجىڭدە باقىت سارسەكبايەۆ، 2012 -جىلى لوندوندا سەرىك ساپييەۆ وليمپيادا جۇلدەگەرى اتانسا، مىنە، ريو- دە- جانەيرو وليمپياداسىندا ءتورتىنشى سپورتشىمىز دانيار ەلەۋسىنوۆ چەمپيون اتاندى.
«تۇپ- تۋرا 16 جىل ارماندادىم. 2000 -جىلى سيدنەي وليمپياداسىندا بەكزات ساتتارحانوۆ، ەرماحان ىبىرايىموۆ اعالارىمىز چەمپيون بولعاندا مەن كىشكەنتاي بالا بولاتىنمىن. بالا بولسام دا سول اعالارىما قىزىعىپ، مەن دە وليمپيادا چەمپيونى بولسام عوي دەگەن ءتاتتى ارمان پايدا بولدى. سول ارمانىم وسە كەلە مەنى سپورتقا جەتەلەدى. مىنە، بۇگىن ناتيجەسىن كورىپ وتىرسىزدار. ادام شىنايى ارمانداپ، شىنايى تالپىنسا ءبارى دە ورىندالادى ەكەن»، - دەدى ول «قازاقپارات» تىلشىسىنە بەرگەن سۇحباتىندا.
بۇل جولدا كۇمىس مەدالعا قول جەتكىزىپ، مەرەيى ۇستەم بولعان ۆاسيليي ليەۆيت پەن ادىلبەك نيازىمبەتوۆتىڭ دا ەرەن ەڭبەگىن اتاپ وتكەن ءجون.
ۆاسيليي ليەۆيت رەسەيلىك ەۆگەنيي تيشەنكومەن فينالدا جۇدىرىقتاسىپ، تورەشىلەردىڭ قياانات ەتۋىمەن جەڭىلىس تاپتى. وليمپيادا فينالىندا ەۆگەني تيشەنكو ۆاسيليي ليەۆيتتى جەڭگەننەن كەيىن زالدا وتىرعان جانكۇيەرلەر رەسەيلىككە جەڭىستى الىپ بەرگەن تورەشىلەر شەشىمىنە نارازىلىق تانىتتى.
ەستەرىڭىزگە سالا كەتسەك، سپورتشىلار 91 كەلىگە دەيىنگى سالماق ساناتىندا جۇدىرىقتاسقان بولاتىن . كەزدەسۋ اياقتالعاننان كەيىن تورەشىلەردىڭ شەشىمىمەن جەڭىس 2015 -جىلعى الەم چەمپيونى رەسەيلىك ەۆگەنيي تيشەنكوعا بەرىلدى. مۇنداي شەشىمگە ريزا بولماعان كورەرمەندەر ايقايلاپ، نارازىلىقتارىن تانىتتى. ءتىپتى ءبىرقاتارى «قازاقستان!» دەپ ۇرانداتقان دا بولاتىن.
العاشقى راۋندتا ۆ. ليەۆيت بارىنشا بەلسەندىلىك تانىتىپ، رەسەيلىكتىڭ قورعانىسىن بۇزىپ- جارا بۇيىرىنەن، باسىنان سوققىلار جاسادى. ە. تيشەنكو دا ايانىپ قالماي، قارسى ۇمتىلعانىمەن ۆ. ليەۆيت ارا قاشىقتىقتى دۇرىس ۇستاي ءبىلدى. ناتيجەسىندە رەسەيلىك ازداعان جاراقات الىپ، ءبىرىنشى راۋند تىڭ قورىتىندىسىندا ۆ. ليەۆيتكە باسىمدىق بەرىلدى.
ەكىنشى راۋندتا دا قازاقستان بوكسشىسى بارىنشا بەلسەندىلىك تانىتىپ، قارسىلاسىنا ءدال سوققىلار جاساعانىمەن تورەشىلەر جەڭىستى رەسەيلىك بوكسشىعا ۇستاتتى.
ءۇشىنشى كەزەڭدە دە ۆ. ليەۆيت رەسەيلىكتى اۋىر سوققىلاردىڭ استىنا الدى. الايدا، جەكپە- جەكتىڭ قورىتىندىسىندا تورەشىلەر جەڭىستى رەسەيلىككە بەرىپ جىبەردى.
ريو- دە- جانەيرو جازعى وليمپيادا ويىندارىنداعى قازاقستان بوكسشىسى ۆاسيليي ليەۆيت پەن رەسەيلىك ەۆگەنيي تيشەنكونىڭ اراسىنداعى جەكپە- جەكتىڭ شەشىمىنە بارشا الەم نارازىلىق تانىتتى دەسە دە بولادى. Washington Post, Eurosport سىندى الەمدەگى بەدەلدى باسىلىمدار ليەۆيتتىڭ التىن مەدالىن «ۇرلاپ» الدى دەپ جار سالدى.
اۋىر اتلەتيكادان، بوكستان التىن مەدال الۋ قازاقستان ءۇشىن قالىپتى جايت بولسا، جۇزۋدەن وليمپيادادا ەشكىمگە دەس بەرمەۋ - قازاقستان ءۇشىن تاڭسىز ەدى. ءجۇزۋشى دميتريي بالاندين ريو-2016 جارىسىندا التىن ەنشىلەپ، ايدى اسپانعا ءبىراق شىعاردى. نەبارى 21 جاستاعى دميتريي بۇنىڭ الدىندا تەك قۇرلىقتىق جارىستاردا جۇلدە الىپ كەلگەن بال عىن سپورتشى جانە ونىڭ وليمپيادا تۇعىرىنا كوتەرىلەتىنى ەشكىمنىڭ ءۇش ۇيىقتاسا دا، تۇسىنە ەنبە گەن دە شىعار . دەگەنمەن ول ا ق ش پەن رەسەي سپورتشىلارىن ارتتا قالدىرىپ، ناعىز سەنساتسيا جاسادى. بۇل جەڭىسكە و باستا، ءدميترييدىڭ ءوزى دە سەنبەپتى.
«بارىنشا مەدالعا تالاسام دەپ ويلادىم. ءبىراق، ناقتى مەدال الام، چەمپيون بولام دەگەن وي بولعان جوق. فينالدىق جارىستا ەڭ سوڭعى سەگىزىنشى جولاقتا ءجۇزدىم. العاشقىدا بۇل جولاق ماعان ۇنامادى. باسقالار ءبىر - ءبىر بىرىمەن قارايلاس جۇزگەندە قاتارىڭداعى قارسىلاسىڭدى كورمەي جالعىز ءجۇزۋ قيىن سياقتى بولدى. كەيىن پايداسىن كوردىم. جالعىز جۇزگەندە قارسىلاسىم قالاي ءجۇزىپ كەلەدى دەپ الاڭدامايدى ەكەنسىڭ. ويىڭدا تەك قانا جەڭىسكە جەتۋ، بار كۇشىمدى سوعان سالدىم. مارەگە كەلگەندە قاراسام، مەنىڭ تۇسىمدا ءبىرىنشى دەگەن جازۋ جانىپ تۇر. مەن ونى باستاپقىدا شەتكى جولاقتا جۇزگەنىم ءۇشىن «ءبىرىنشى جولاق» دەگەندى كورسەتكەن سان ەكەن دەپ ويلادىم. چەمپيون بولدىم دەگەن وي مۇلدە بولعان جوق. كەيىن باسقالار كەلىپ مەنىڭ قولىمدى الىپ، قۇتتىقتاي باستاعاندا عانا مارەگە ءبىرىنشى كەلگەنىمدى ءتۇسىندىم»، - دەدى ول قازاقستاندىق تىلشىلەرگە بەرگەن سۇحباتىندا.
ونىڭ ونەرىنە ءتانتى بولعان تانىمال قازاقستاندىق كاسىپقوي بوكسشى گەننادي گولوۆكين دميتري بالانديندى ريوداعى جەڭىسىمەن قۇتتىقتادى. «دميتريي بالانديندى ريوداعى ءجۇزۋ بويىنشا العاشقى وليمپيادالىق «التىنىمەن» قۇتتىقتايمىن!»، - دەپ جازدى GGG تۆيتتەردە.
دميتري بالاندين 2014 -جىلى وڭتۇستىك كورەيالىق ينچحون قالاسىندا وتكەن ازيا ويىندارىنىڭ ءۇش دۇركىن چەمپيونى اتانعاندا، ەسىمى كوپكە ايان بولدى. ازياداعا دەيىن ونى تەك ارنايى ماماندار عانا بىلەتىن. سول جارىستا دميتري ءۇش قاشىقتىقتاعى (50,100 جانە 200 مەتر) براسس بويىنشا التىن مەدال جەڭىپ الىپ، ازيادانىڭ رەكوردىن جاڭارتقان ەدى. وسى جەڭىستەن كەيىن ەلدىڭ سپورتتىق جەتىستىكتەرىن باقىلاۋشىلار ءدميترييدى قازاقستانداعى ءجۇزۋ سپورتىنىڭ باستى ءۇمىتى دەپ اتادى.
ەركىن كۇرەستە ەرلەردەن گورى، قىزدارىمىز ەلگە ۇلكەن ولجامەن ورالدى. ءبىر كۇمىس، ەكى قولا الىپ بەرگەن بالۋان قىزدارىمىزدىڭ ارقاسىندا قازاقستان كۇرەستەن جالپى ەسەپتە 11 ورىنعا يە بولدى.
ايەلدەر كۇرەسىنەن گيۋزەل مانيۋروۆا كۇمىس جۇلدەگەر اتاندى.
برازيليانىڭ ريو- دە- جانەيرو قالاسىندا وتكەن وليمپيادا ويىندارىندا ايەلدەر كۇرەسىنەن 75 كەلى سالماقتاعى قازاقستاندىق بالۋان گيۋزەل مانيۋروۆا فينالدا كانادالىق بالۋان ەريك ۋيبەدەن ۇتىلدى.
ول وسىعان دەيىن، جارتىلاي فينالدا رەسەيدىڭ 2010- 2011 -جىلدارداعى بىرنەشە مارتە چەمپيونى ەكاتەرينا بۋركيناعا قارسى كۇرەستە ناعىز سپورتتىق سەنساتسيا جاساعان ەدى.
ۇپاي جاعىنان ۇتىلا تۇرسا دا، گ. مانيۋرا جەكپە- جەكتى ءوز پايداسىنا تازا جەڭىسپەن اياقتاعان. ايقاستىڭ سوڭىنا دەيىن 8 سەكۋند قالعاندا قازاقستاندىق بالۋان رەسەيلىك قارسىلاسىن شالقاسىنان سۇلاتىپ سالدى.
بۇدان بۇرىن وليمپيادانىڭ العاشقى بەلدەسۋىندە ول ەۋروپا چەمپيونى، ۆەنگرلىك جانەتت نەمەتتى 12.2 ەسەبىمەن ۇتىپ، جەكپە- جەكتى مەرزىمىنەن بۇرىن اياقتاعان بولاتىن.
ال وسىدان شامالى ۋاقىت بۇرىن 63 كەلىگە دەيىنگى سالماقتا ەل نامىسىن قورعاعان ەكاتەرينا لاريونوۆا قولا جۇلدە ءۇشىن تارتىستا ا ق ش سپورتشىسى ەلەنا پيروجكوۆانى جەڭىپ، قازاقستان قورجىنىنا كەزەكتى قولا مەدالدى سالعان ەدى. بۇل سپورتتا قولا مەدالدى تاعى ءبىر بالۋان قىزىمىز ەلميرا سىزدىقوۆا جەڭىپ العان بولاتىن.
وسىلايشا، قازاقستان قۇراماسى وليمپيادا ويىندارىندا 2 التىن، 5 كۇمىس 9 قولا ەنشىلەپ، بۇل جولى دا ەل ءۇمىتىن اقتادى. بۇرىن ەل اۋزىندا بولماعان جاس سپورتشىلار تولاعاي جەتىستىكتەرگە قول جەتكىزىپ، اعا ءىزىن جالعاستىرىپ كەتتى. دميتريي بالاندين، جازيرا جاپپارقۇل، الەكساندر زايچيكوۆ، كارينا گوريچيەۆا، ەكاتەرينا لاريونوۆا، ەلميرا سىزدىقوۆا، قايرات ەرالييەۆ، ابىلايحان ءجۇسىپوۆ، داريعا شاكىموۆا سىندى جاس وسكىن سپورتشىلار ۇلكەن قارىم- قابىلەتتەرىن كورسەتىپ، الەمدە قازاقستان سپورت دەرجاۆالارىنىڭ قاتارىنداعى ەل ەكەندىگىن دالەلدەپ بەردى. ءتورت جىلدىڭ ىشىندە ولاردىڭ تاجىريبەسى تولىسىپ، كۇش- قۋاتتارى ارتا تۇسەتىنى انىق. الدىمىزدا 2020 -جىلى بولاتىن توكيو وليمپياداسىندا وسى جاس سپورتشىلاردان كوپ ءۇمىت كۇتەمىز!
جاسۇلان جولدىبايەۆ