مەنىڭ قارسىلاسىم تەك قانا زىلتەمىر - نيجات راحيموۆ

الماتى. قازاقپارات - مەنىڭ قارسىلاسىم تەك قانا زىلتەمىر. زىلتەمىرمەن عانا سايىسقا تۇسەمىن. باسقا قارسىلاس كوزىمە كورىنبەيدى.
None
None

بۇگىن تۇندە الماتىعا ورالعان ريو وليمپياداسىنىڭ چەمپيونى، اۋىر اتلەت نيجات راحيموۆ جۋرناليستەرگە بەرگەن سۇحباتىندا ءوزىنىڭ جەڭىسىنە كۇمانمەن قارايتىندارعا قاتىستى وسىلاي دەپ جاۋاپ بەردى.

«ريو وليمپياداسىنا جان- جاقتى دايىندالدىم. تىنباي جاتتىقتىم. تەر توگىپ ەڭبەك ەتتىم. ماعان باپكەرلەرىم كومەكتەستى. سول ءۇشىن ولارعا شىن جۇرەكتەن ريزاشىلىعىمدى بىلدىرەمىن. اكەمە دە ايتار العىسىم شەكسىز. ماعان قولداۋ كورسەتكەندەرىڭىز ءۇشىن بارلىقتارىڭىزعا راحمەت! مەن وليمپياداعا بارار الدىندا ايتقانمىن، قازىر دە قايتالاپ ايتامىن: مەنىڭ قارسىلاسىم تەك قانا زىلتەمىر. زىلتەمىرمەن عانا سايىسقا تۇسەمىن. باسقا قارسىلاس كوزىمە كورىنبەيدى»، - دەدى ن. راحيموۆ تولقىپ تۇرىپ.

سونىمەن قاتار، ول الداعى جوسپارلارىنا قاتىستى سۇراققا بىلاي دەپ جاۋاپ بەردى:

«ازىرگە بىلمەيمىن. وليمپيادادان كەيىن تەك مەن عانا ەمەس، باسقا سپورتشىلار دا بولاشاعى تۋرالى تاپ باسىپ ەشتەڭە ايتا المايدى عوي. ارينە، سپورتتىق جولىمدى جالعاستىرعىم كەلەدى. ءبىراق، ەندى ونى ۋاقىت كورسەتەدى. بارلىعى اللانىڭ قولىندا».

ايتا كەتەلىك، ريو وليمپياداسىندا 77 كەلىگە دەيىنگى سالماق دارەجەسىندە ونەر كورسەتكەن نيجات راحيموۆ جۇلقا كوتەرۋ سايىسىندا 165 كەلى كوتەردى. ال، سەرپە كوتەرۋدە قازاقستاندىق سپورتشى 214 كەلىنى باعىندىردى. ءسويتىپ، قوسسايىس قورىتىندىسى بويىنشا 379 (165+214) كەلى ناتيجەنى كورسەتىپ، ريو وليمپياداسىنىڭ چەمپيونى اتاندى.

نيجات راحيموۆ 2015 -جىلعى الەم چەمپيونى. جاسى 23 تە. ۇلتى ازەربايجان. باكۋ قالاسىندا تۋعان. 2014 -جىلى قازاقستان ازاماتتىعىن العان. بۇگىندە اتىراۋ قالاسىندا تۇرادى.

ايتا كەتەلىك، ريو وليمپياداسىنا قازاقستاننان 104 سپورتشى 26 سپورت تۇرىنەن ونەر كورسەتتى. قازىرگى تاڭدا قازاقستاندىق اتلەتتەردىڭ قورجىنىندا 6 سپورت ءتۇرى بويىنشا 17 مەدال بار: 3 التىن، 5 كۇمىس جانە 9 قولا. وسىلايشا، 2016 -جىلدىڭ 20 -تامىزىنداعى جاعداي بويىنشا 1996 -جىلعى اتلانتا وليمپياداسىنان بەرى تاۋەلسىز قازاقستاندا وليمپيادا چەمپيوندارىنىڭ سانى - 19 عا جەتتى.

اۆتور: ايبوتا جاپپاربەرگەن

سوڭعى جاڭالىقتار