ريو وليمپياداسىنا قاتىسقان قازاقستاندىق زىلتەمىرشىلەر الماتىعا ورالدى - فوتو

الماتى. قازاقپارات - بۇگىن - 20 -تامىزعا قاراعان ءتۇنى ساعات 03:30 دا اۋىر اتلەتيكادان قازاقستاننىڭ ۇلتتىق قۇراماسىنىڭ وكىلدەرى بۇل كۇندەرى برازيليانىڭ ريو- دە- جانەيرو قالاسىندا ءوتىپ جاتقان XXXI جازعى وليمپياداسىنان الماتىعا ورالدى.
None
None

وڭتۇستىك استانانىڭ حالىقارالىق اۋەجايىنىڭ VIP- تەرمينالىنىڭ الدىندا زىلتەمىر كوتەرۋدەن 77 كەلىگە دەيىنگى سالماق دارەجەسىندە ريو وليمپياداسىنىڭ چەمپيونى 23 جاستاعى نيجات راحيموۆتى، كۇمىس جۇلدەگەر 22 جاستاعى جازيرا جاپپارقۇلدى (69 كەلىگە دەيىنگى سالماق)، قولا جۇلدەگەرلەر: 23 جاستاعى كارينا گوريچەۆا (63 كەلىگە دەيىنگى سالماق) مەن 25 جاستاعى فارحاد حاركيدى (62 كەلىگە دەيىنگى سالماق)، سونداي-اق، بەسىنشى ورىن العان 24 جاستاعى مارگاريتا ەليسەيەۆا (48 كەلى) مەن 4- ورىن العان 24 جاستاعى چونتەي ارليدى (56 كەلى) سپورت سالاسىنداعى ۇيىمداردىڭ وكىلدەرى، زىلتەمىرشىلەردىڭ تۋعان- تۋىستارى، تۋعان وڭىرىنەن كەلگەن دەلەگاتسيالار، جاس سپورتشىلار، قالا تۇرعىندارى - بارلىعى 300 دەن استام ادام زور قۋانىشپەن قارسى الدى.

قولدارىنا ترانسپارانتتار، پلاكاتتار مەن قازاقستاننىڭ ۇلتتىق تۋىن ۇستاعان جۇزدەگەن جاستار وليمپيادا جۇلدەگەرلەرى VIP- تەرمينالىنان كورىنگەن بەتتە «نيجات - چەمپيون»، «العا، قازاقستان!» «جازيرا - چەمپيون» دەپ ۇراندادى.

«ماعان وليمپيادا بارىسىندا قىزۋ قولداۋ كورسەتكەندەرىڭىزگە شىن جۇرەكتەن العىسىمدى بىلدىرەمىن. بۇل تەك مەنىڭ عانا جەڭىسىم ەمەس. بۇل - بۇكىل قازاقستاننىڭ جەڭىسى! مەنى وليمپيادادا تابىستى ونەر كورسەتۋىمە ۇلەس قوسقان جاتتىقتىرۋشىما، اكەمە، باسقا دا ازاماتتارعا شىن جۇرەكتەن العىسىمدى بىلدىرەمىن. مەن بۇل ايتۋلى دوداداعا تىڭعىلىقتى دايىندالدىم. جەڭىسكە جەتكەنىمە باقىتتىمىن! مەن ءۇشىن قازاقستان اتىنان ونەر كورسەتىپ، ەل نامىسىن قورعاۋ - اسا ۇلكەن مارتەبە»، - دەدى ن. راحيموۆ.

ايتا كەتەلىك، ريو وليمپياداسىنا قازاقستاننان 104 سپورتشى 26 سپورت تۇرىنەن ونەر كورسەتتى. قازىرگى تاڭدا قازاقستاندىق اتلەتتەردىڭ قورجىنىندا 6 سپورت ءتۇرى بويىنشا 17 مەدال بار: 3 التىن، 5 كۇمىس جانە 9 كۇمىس. وسىلايشا، 2016 -جىلدىڭ 20 -تامىزىنداعى جاعداي بويىنشا 1996 -جىلعى اتلانتا وليمپياداسىنان بەرى تاۋەلسىز قازاقستاندا وليمپيادا چەمپيوندارىنىڭ سانى 19 عا جەتتى.





اۆتور: ايبوتا جاپپاربەرگەن

سوڭعى جاڭالىقتار