الماتىداعى باراحولكا جايما بازارىنداعى ءورت اۋىزدىقتالدى
بۇل تۋرالى ق ر ءى ءى م توتەنشە جاعدايلار جونىندەگى كوميتەتىنىڭ رەسمي وكىلى رۋسلان يمانقۇلوۆ حابارلادى.
ونىڭ ايتۋىنشا، ق ر ءى ءى م توتەنشە جاعدايلار كوميتەتى اۆياتسياسىنىڭ كۇشىمەن ءورت وشاعىنا 40 توننا سۋ بۇركىلگەن.
«ەكى تىكۇشاق ءورت وشاعىنا ءاربىر 6-8 مينۋت سايىن سۋ شاشىپ جاتىر. قازىرگى ساتتە ءورت وشاعىنا 9 رەت سۋ سەبىلدى.
الماتى قالاسى جەتىسۋ اۋدانى سولتۇستىك اينالما جولى 25/6 مەكەنجايىندا ورنالاسقان «ولجا» بازارىنىڭ ورتەنىپ جاتقانى تۋرالى العاشقى حابار بۇگىن الماتى قالالىق ت ج د «101» كەزەكشى بولىمىنە 16 ساعات 26 مينۋتتا كەلىپ تۇسكەن. العاشقى ءورت سوندىرۋشىلەر توبى وقيعا ورنىنا 7 مينۋتتان كەيىن، ياعني 16 ساعات 33 مينۋتتا كەلىپ جەتتى. اقپارات راستالدى: ساۋدا پاۆيلوندارى مەن قويمالىق قورا- جايلار ورتەنىپ جاتتى. ءورتتىڭ اۋماعى شامامەن 3000 شارشى مەتردى قۇرادى.
ءورتتى سوندىرۋگە 360 تان استام ادام (ءورت ءسوندىرۋ قىزمەتى، ۇلتتىق ۇلان، ءى ءى د، جەدەل دەن قويۋ ارنايى وتريادى) جانە 50 دەن استام تەحنيكا مەن ەكى تىكۇشاق جۇمىلدىرىلدى.
16 ساعات 42 مينۋتتا ءورت ءسوندىرۋ بويىنشا وپەراتيۆتىك شتاب قۇرىلدى.
ءورتتى سوندىرۋگە 21 قولمەن شاشىلاتىن جانە 4 لافەتتىك سۋ شاشۋ وقپاندارى قولدانىلدى. 17 ساعات 52 مينۋتتا ك ا-32 تىكۇشاعى ءورت وشاعىنا العاش رەت سۋ بۇرىكتى. سۋ 200 مەتر جەردەن اعىپ جاتقان ۇلكەن الماتى وزەنىنەن الىنىپ جاتىر.
سونىمەن قاتار، سۋمەن ۇزدىكسىز قامتاماسىز ەتۋ ءۇشىن بازار اۋماعىنداعى 3 ءورت ءسوندىرۋ گيدرانتى پايدالانىلدى. بۇدان باسقا، اتس-30 -جىلجىمالى ءورت ءسوندىرۋ اۆتوپويىزى جانە كوممۋنالدىق ۇيىمدار تاراپىنان 8 سۋ شاشاتىن ماشينا تارتىلدى.
دەر كەزىندە قولدانىلعان شارالاردىڭ ارقاسىندا ءورت 18 ساعات 43 مينۋتتا اۋىزدىقتالدى.
وكىنىشكە قاراي، ساۋدا پاۆيلوندارىنداعى تاۋارلاردىڭ كوپتىگى جانە قويۋ قارا ءتۇتىننىڭ سالدارىنان ءورتتى تولىعىمەن ءسوندىرۋ قيىنعا سوعىپ جاتىر»، - دەلىنگەن حابارلامادا.
اۆتور: ايبوتا جاپپاربەرگەن
