وليمپيادا دا «قازاقستاندىق سالماقتا» دەس بەرمەگەن قازاق بوكسشىلارى - فوتو

بۇل سالماقتى يەمدەنىپ العان قازاق بوكسشىلارى بارشا الەم جۇرتشىلىعىنىڭ تاڭدايىن قاقتىردى. بۇگىن ريو-2016 وليمپياداسىندا دانيار ەلەۋسىنوۆتىڭ جەڭىسىنەن سوڭ، ۆۆس جانە Daily Mail سىندى الپاۋىت اگەنتتىكتەر 69 كەلىدەگى سايىستى «قازاقستاندىق سالماق» دەپ اتاپ، جار سالدى. بۇنىڭ دا ءوزى ءبىز ءۇشىن ابىروي بولعانى انىق.
«قازاقپارات» اگەنتتىگى قازاقستان ەلىن اسقاقتاتقان بارلىق ءتورت ورەننىڭ ەسىمدەرىن تاعى ءبىر ەسكە الۋدى ءجون كورىپ وتىر.
69 كەلىدە التىن مەدال يەمدەنۋ ءداستۇرى 2004 -جىلعى افينا وليمپياداسىنان باستاۋ الادى. وسى 12 -جىلدىق كەزەڭدە قازاقستان قۇراماسىنىڭ ەنشىسىندە ءتورت التىن عانا ەمەس، ەكى ۆەل باركەر كۋبوگى دە بار.
باقتيار ارتايەۆ. افينا، 2004 -جىل
2004 -جىلى وليمپيادا وتانى افينادا قازاقستاندىق بوكسشىلاردىڭ جاڭا ءارى داڭقتى ءداستۇرىن باقتيار ارتايەۆ باستاعان بولاتىن. سول كەزدە ءبىزدىڭ بوكسشىمىز وليمپيادا ويىندارىندا قازاقستان ءۇشىن جالعىز التىن مەدال الىپ بەرگەن بولاتىن. التىن جۇلدەنى ول ءتورتجىلدىقتىڭ باستى دوداسى اياقتالاتىن ەڭ سوڭعى كۇنى سىيلاپ ەدى...
وليمپيادا ويىندارىنداعى جەرەبە باقتيار ارتايەۆقا وڭاي تۇسكەن جوق، وعان قارسى ەكى دۇركىن وليمپيادا چەمپيونى، رەسەيلىك بوكسشى ولەگ سايتوۆ، ۋكراينالىق ۆيكتور پولياكوۆ تۇردى. ال فينالدا كۋبالىق لورەنتسو اراگون جولىقتى. سول جىلى كۋبا قۇراماسىنان اراگون فينالعا شىققان جالعىز بوكسشى بولاتىن. وليمپياداعا العاش قاتىسقان باقتيار 36:26 ەسەبىمەن ونىڭ دا مىسىن باسىپ تاستاعانى ءالى ەسىمىزدە.
ب. ارتايەۆ وليمپيادا جولداماسىنا ەڭ سوڭعى ساتتە قول جەتكىزدى جانە وعان كوپ ءۇمىت تە ارتىلماعان ەدى. دەگەنمەن باقتيار چەمپيون اتانىپ قانا قويماي، تۋرنيردىڭ ەڭ ۇزدىك بوكسشىسىنا بەرىلەتىن ۆەل باركەر كۋبوگىن الىپ كەلدى.
باقىت سارسەكبايەۆ. بەيجىڭ، 2008 -جىل
وليمپيادا چەمپيونى باقىت سارسەكبايەۆ ءبىزدىڭ باعىمىزعا تۋعان بوكسشى. پاۆلوداردا تۋىپ، كەيىن اتاسى مەن اجەسىنىڭ قولىندا، وزبەكستاندا ءجۇرىپ بوكسقا كەلگەن ول كورشى ەلدىڭ اتىنان شىعىپ جۇرگەن ەدى. دەگەنمەن 2004 -جىلى وليمپياداعا بارار تۇستا ۇلتتىق قۇرامادان ورىن الا الماعان باقىت تاريحي وتانىنا كوشىپ كەلدى. بەيجىڭدە وتكەن كەلەسى وليمپياداسىندا باقىت قارسىلاستارىنىڭ تۋتالاقايىن شىعارىپ، ەلىمىزدىڭ قورجىنىنا التىن مەدال سالىپ بەردى.
العاشقى كەزدەسۋىندە باقىت سارسەكبايەۆ كانادالىق قارسىلاسى ادام ءترۋپيشتى 20:1 ەسەبىمەن جارىس جولىنان ىعىستىرسا، ەكىنشى كەزەڭدە مولدوۆا ورەنى ۆيتالي گرۋشاكتى 18:1 ەسەبىمەن ويسىراتا جەڭدى. شيرەك فينالدا قازاقستاندىق بوكسشىعا قارسى وزبەك سپورتشىسى شىقتى. ديلشود ماحمۋدوۆتى قازاق بوكسشى 12:7 ەسەبىمەن ۇتىپ كەتتى. ال فينالدا باقىت سارسەكبايەۆتى كۋبالىق بوكسشى كارلوس بانتو كۇتىپ تۇردى. ءبىراق قازاق بوكسشىسى قارسىلاسىنا ەش مۇمكىندىك بەرگەن جوق، ەسەپ - 18:9 بولدى.
سەرىك ساپيەۆ. لوندون، 2012 -جىل
سەرىك ساپيەۆ - قازاقستان بوكسشىلارىنىڭ ىشىندە تيتۋلدار سانى بويىنشا وزىق تۇرعان وعلان. ەستە بولسا، ول ەكى دۇركىن الەم چەمپيونى، بىرنەشە دۇركىن ازيا جانە قۇرلىقتىق بىرىنشىلىكتەردىڭ جەڭىمپازى، وليمپيادا چەمپيونى. 2012 -جىلى لوندون وليمپياداسىندا التىن سىيلاعان سەرىك، ۆەل باركەر كۋبوگىن دە قوسا الدى. ول ءبىزدىڭ قۇرامانىڭ تەحنيكالىق قابىلەتى جاعىنان ەڭ ۇزدىك سپورتشىسى دەپ تانىلدى.
فينالدا ول رينگ قوجايىنى، اعىلشىن بوكسشىسى فرەددي ەۆانسپەن قولعاپ ءتۇيىستىردى. شارشى الاڭدا جاسىنداي ويقاستاعان سەرىك ساپييەۆ قارسىلاسىنا بەت قاراتپاي، 17:9 ەسەبىمەن جەڭىسكە جەتكەن ەدى. دەگەنمەن فينالدان گورى، اقتىق سىنعا بارار جول قازاق بوكسشىسى ءۇشىن اۋىرعا سوقتى. العاشقى كەزدەسۋىندە جاپوندىق ياسۋحيرو سۋزۋكيگە قارسى بولعان كەزدەسۋدە قاتتى قوبالجىدى. ۆەنەسۋەلالىق پەرەس ماەسترەمەن بولعان ەكىنشى جەكپە- جەگىندە تورەشى ساپييەۆكە نوكداۋن سانادى، دەگەنمەن ۇپاي سانى بويىنشا قارسىلاسىنان باسىم ءتۇستى. جارتىلاي فينالدا سەرىك ساپييەۆ ءوزىنىڭ بۇرىنعى بىتىسپەس قارسىلاسى اندرەي زامكوۆويمەن كۇش سىناسىپ، ءوزىنىڭ مىقتىلىعىن دالەلدەي ءبىلدى.
دانيار ەلەۋسىنوۆ. ريو- دە- جانەيرو، 2016 -جىل
ريو- دە- جانەيرو وليمپياداسىندا قازاقستان قۇراماسىنا 69 كەلىدە تاعى التىن بۇيىردى. بۇل جولى سەرىك ساپيەۆتەن كوماندا كاپيتانى اتاعىن امانات ەتىپ العان دانيار ەلەۋسىنوۆ وليمپيا ويىندارىن باعىندىردى. فينالدا ول وزبەك بوكسشىسى شاحرام گياسوۆتى «ويناپ» ءجۇرىپ جەڭىپ كەتتى. دەگەنمەن فينالدا دانياردىڭ جولىن بۇنىڭ الدىندا العان ءقاۋىپتى جاراقاتى كەسە مە دەپ سەسكەنگەن ەدىك. جارتىلاي فينالدا فرانسۋز بوكسشىسىمەن بولعان قيان- كەسكى جەكپە- جەكتە دانياردىڭ شەكەسى جارىلىپ، كەزدەسۋ توقتاتىلعان بولاتىن. ءبىراق ەكى راۋندتا العان پايلار سانى بويىنشا جەڭىسكە قول جەتكىزدى. ەندى فينالدا گياسوۆقا قارسى جەكپە- جەككە دايىنداۋ قاجەت بولدى. الايدا دانيار ەلەۋسىنوۆكە قارسىلاسى بالەندەي قيىندىق تۋدىرعان جوق.
ايتا كەتۋ كەرەك، دانيار ۆەل باركەر كۋبوگىنا ۇمىتكەرلەردىڭ قاتارىندا.
اۆتور: جاسۇلان جولدىبايەۆ