وليمپيادا جۇلدەگەرى الەكساندر زايچيكوۆ مەكتەپتى قازاق تىلىندە بىتىرگەن

قىزىلوردا. قازاقپارات - تورتكۇل دۇنيە كوز تىككەن ريو- دە- جانەيرو وليمپياداسىندا سىر ءوڭىرىنىڭ تاعى ءبىر تولاعايى، زىلتەمىرشى الەكساندر زايچيكوۆ قولانى قورجىنعا سالدى.
None
None

ەل بولىپ قۋانىپ جاتقان تۇستا قازاقپارات ح ا ا قىزىلوردا وبلىسىنداعى ءتىلشىسى جۇلدەگەردىڭ وتباسىندا بولىپ، ونىڭ اكەسىنە بىرنەشە ساۋال قويعان ەدى.

- ۆيتالي اناتوليەۆيچ، وتكەن ءتۇندى ۇيقىسىز وتكىزگەن بولارسىزدار؟

- قالاي عانا ۇيقى بولسىن. ساشانىڭ ناعاشى اتاسى ۆيكتور الەكساندروۆيچ باستاعان اعايىندار مەن دوستارى تەلەارنا الدىندا وتىرىپ تاڭدى اتىردىق قوي. قۋانىشىمىزدا دا، قوبالجۋىمىزدا دا شەك بولعان جوق. ريو جەرى مەن قىزىلوردا اراسىندا 9 ساعاتتىق ايىرما بار. ول جاقتىڭ اۋاسى بىزدەگىدەي قۇرعاق ەمەس. وسىنىڭ ءبارى سپورتشىعا اسەر ەتپەي قويمايدى. الايدا وسىعان قاراماستان ءبىزدىڭ الەكساندر ەرلەدى عوي. قانداي قيىندىقتار كەزدەسكەنىن، تورەشىلەر تاراپىنان جاسالعان قىساستىق- ءبارىن ءوزىڭىز دە كورگەن بولارسىز.

- ساشا ءاۋ باستان- اق زىلتەمىرشى بولعىسى كەلدى مە؟

- ول بالا كۇنىنەن- اق قولدى- اياققا تۇرمايتىن شيراق بولىپ ءوستى. وسى قاسيەتىن سىرت قاراعان ادام ونى بالالار اراسىنان بىردەن بايقايتىن. ءبىر كۇنى ءبىر ەرەسەك ادام تەرەزەمىزدى قاقتى. ەسىك اشسام الەكساندردى ەرتىپ الىپتى. بالام بىردەڭە بۇلدىرگەن ەكەن دەپ قىسىلا باستادىم. عالىم دەگەن ازامات بولىپ شىقتى. ساشانىڭ سىرتىنان باقىلاپ ءجۇرىپ، بۇگىن گرەك- ريم كۇرەسىنە قاتىسۋىنا بىزدەن رۇقسات سۇراي كەلىپتى. ول بۇعان دەيىن دە كاراتە، ۆەلوسپورت، فۋتبول، باسكەتبول سياقتى ءبىراقاتار سپورت تۇرلەرىنە بارعان ەدى. بالا بويىنداعى تاسىعان ەنەرگيا الدەنەگە ۇرىندىرماسىن دەپ كەلىسىم بەردىك. ءبىزدىڭ ماقساتىمىز - سپورتقا قاتىسسا ۋاقىتى بولىنەدى، سوسىن تاربيەسى جاقسى بولادى دەپ ويلادىق ول كەزدە.

- كلاسسيكالىق كۇرەستەن زىلتەمىرگە قالاي اۋىسىپ ءجۇر؟

- كۇرەسپەن اينالىسىپ جۇرگەنىندە بۇگىنگى باپكەرى ارمان ابدرايەۆ كورىپ زىلتەمىرگە شاقىرادى. دەنە بىتىمىنە قاراپ قىزىقسا كەرەك. ءسويتىپ ونىڭ سوڭعى توقتاعانى وسى سپورت ءتۇرى بولدى.

- قازاق ءتىلىن ءبىر قازاقتان كەم بىلمەيدى، وسىنىڭ سىرىن ايتىپ بەرسەڭىز؟

- قازاق ءتىلىن بالالارمەن ويناپ ءجۇرىپ ۇيرەنگەن بولار دەيتىنبىز. ال ونىڭ وسىنشا تازا سويلەيتىنىن ءبىز تەك كەيىننەن عانا بىلدىك. باپكەرى ارمان ونى قالامىزداعى ج. ءباھادۇر اتىنداعى سپورتتا دارىندى بالالارعا ارنالعان مەكتەپ- ينتەرناتتا وقۋىنا كەڭەس بەردى. ول جەردە بارلىق ءپان قازاق تىلىندە عانا جۇرەتىن ەدى. سوعان قينالاتىن شىعار دەدىك. ءبىر قىزىعى، ساشا ول جاقتا دا بارلىق پاندەردى قازاق بالالارىمەن بىردەي وقىپ، ويداعىداي ءبىتىرىپ شىقتى.

- بالاڭىز اتاقتى سپورتشىعا اينالدى. ال اتاقتى ادامداردىڭ بوس ۋاقىتىندا نەمەن اينالىساتىنى جۇرتتى قىزىقتىرادى...

- جاتتىعۋلاردان بوس ۋاقىت وندا از بولادى عوي. دەگەنمەن قولى قالت ەتىپ بوساسا بالىق اۋلاۋ مەن اڭعا شىققاندى ۇناتادى. ءوزىڭىز ۇيگە كىرىپ كەلە جاتقاندا اڭشى ءيتىن بايقاعان بولارسىز. ونى ساشا وسكەمەننەن ارنايى اكەلدى. اتى «لولا».

- تورەشىلەر كۇمىستەن قاققانمەن، الەكساندر قولانى قولىنان شىعارعان جوق. جەڭىستى ساتتەن سوڭ وتباسىندا العاشقى بولىپ كىمگە حابارلاستى؟

- ونىڭ جەڭىسىن العاش بولىپ جانىندا ريودا بىرگە جۇرگەن اناسى مارگاريتا ۆيكتوروۆنا كورگەن بولار. وتباسىندا ءبىرىنشى بولىپ ناعاشى اتاسى ۆيكتور الەكساندروۆيچكە حابارلاسىپ، «بۇل ءسىزدىڭ تۋعان كۇنىڭىزگە تارتۋىم» دەدى. ولاي ەتەر سەبەبى دە بار. وسى ءتۇنى ناعاشى اتاسى 69 جاسقا تولدى. نەمەرەسىنىڭ جەڭىسىن كورىپ كوزىنە جاس الىپ قۋاندى.

- ساشانىڭ كۇمىسكە قولى جەتىپ تۇرعاندا، ياعني تورەشىلەر ونىڭ كوتەرگەنىن ەسەپتەپ، سالدەن سوڭ تايقىپ كەتكەندە اۋىر بولعان شىعار؟

- سپورتتا بالالارى جۇرگەن اتا- انالار مۇنداي جاعدايدىڭ قانشالىقتى اۋىر ەكەنىن جاقسى تۇسىنەدى. ءاربىر سالماقتى كوتەرۋگە شىققاندا ونىمەن بىرگە كوتەرىپ تۇرعانداي اسەردە بولاسىڭ. وسىدان كەيىن- اق، مەنىڭ جاي- كۇيىمدى بىلە بەرسەسىڭ. ا ق ش- تا الەم چەمپيونى بولعاندا دا وسىنداي كۇي كەشكەنبىز. جالپى اتا- انا قانداي جارىس بولماسىن وڭاي بولمايدى.

ءتۇيىن: از عانا ۋاقىتتا ءبىرقىدىرۋ اڭگىمەنىڭ تيەگىن اعىتىپ ۇلگىردىك. سۇحباتتا ايتىلعاننىڭ ءبارى قاعاز بەتىنە تۇسە بەرمەيدى عوي. ونىڭ ۇستىنە، ءبىزدىڭ باتىردىڭ اكەسى ۆيتالي اناتوليەۆيچ اسا قاراپايىم كىسى ەكەن. الەكساندردىڭ ءوزى كەلمەي سۋرەتكە تۇسپەيمىن دەپ كەلىسىمىن بەرمەدى. قولعا تۇسكەن ءبىرلى-جارىم سۋرەتتى قاناعات تۇتىپ قايتتىق.


null null null 

 



 اۆتور: ەلۋباي اۋەزوۆ

سوڭعى جاڭالىقتار