ەرماحان ىبىرايىموۆ: قانشا وليمپياداعا بارسام دا، ءدال وسىنداي سوراقىلىقتى كورگەن جوقپىن

بۇگىن سيدنەي وليمپياداسىنىڭ چەمپيونى ەرماحان ىبىرايىموۆتى جولىقتىرىپ قالدىق. وسى مۇمكىندىكتى پايدالانىپ ەرماحان ساعي ۇلىنان وليمپيادا تۋرالى پىكىر سۇراعان بولاتىنبىز.
- ريوعا قاشان كەلدىڭىز؟
- ءوتىپ بارا جاتقان تۇندە كەلدىم.
- كىمدەرگە جانكۇيەرلىك ەتىپ كەلدىڭىز؟
- ءوزىم بوكسشى بولعان سوڭ بىلعارى قولعاپ شەبەرلەرىنە قولداۋ كورسەتۋ ازاماتتىق بورىشىم. ءبىراز بوكسشىلارىمىزدىڭ فينالداعى ايقاستارىن كورۋگە كەلدىم. كەشە دانيار ەلەۋسىنوۆ فينالعا شىعىپتى. مىنە، بۇگىن ادىلبەكتىڭ فينالعا وتكەنىن ءوز كوزىممەن كورىپ قاتتى قۋانىپ وتىرمىن. دىچكو دا جارتىلاي فينالعا ءوتتى. بۇل دا ۇلكەن قۋانىش.
- وسى ءۇش بوكسشىنىڭ قايسىسى التىنعا لايىق دەپ ويلايسىز؟
- ۇشەۋى دە التىن جىگىتتەر. ۇشەۋى دە التىنعا لايىق. ۇشەۋى دە چەمپيون بولىپ جاتسا، تاڭعالمايمىن.
- كەشەگى ليەۆيتتىڭ كۇمىس جۇلدەسىنە كوڭىلىڭىز تولا ما؟
- مەن ليەۆيت ايقاسقان كۇنى جولدا بولدىم. جەكپە- جەگىن ءوز كوزىممەن كورە المادىم. ءبىراق، كەلگەن سوڭ وسىنداعى جىگىتتەردەن ەستىپ جاتىرمىن. ايقىن باسىمدىقپەن ۇتىپ تۇرعان جەڭىستى قالاي باسقا بىرەۋدىڭ الاقانىنا سالىپ بەرە سالادى؟ مەن تورەشىلەردى تۇسىنبەدىم. ەگەر تەڭ دارەجەدە ونەر كورسەتسە، قارسىلاسىنا جىعىپ بەرسىن. وندا مەنىڭ داۋىم جوق. ءدال ەندى بۇكىل زال عانا ەمەس، جەر شارىنىڭ تۇرعىندارى كورىپ وتىرعان ادىلدىكتى رينگتىڭ تۇبىندە وتىرعان بەس تورەشى قالاي بەتتەرى بۇلك ەتپەي باسقا بىرەۋدىڭ ۋىسىنا سالىپ بەردى.
مەن وسىعان دەيىن قانشاما وليمپيادا ويىندارىنا باردىم. ءبىراق، ءدال وسىنداي سوراقىلىقتى كورگەن جوقپىن. جاڭا عانا جىگىتتەرىمىزدىڭ الدىندا قازاقتىڭ قاراتورى قىزى جاينا شەكەربەكوۆانىڭ جەكپە- جەگىن كوردىم. جاينا جەڭىلگەن جوق. مەن بوكسشى رەتىندە، باپكەر رەتىندە ۇستاز رەتىندە قارىنداسىمىزدىڭ ءار سوققىسى مەن قولدانعان ايلا- ءتاسىلىن قاداعالاپ وتىردىم. قازاق قىزىنا دا تورەشىلەر قيانات جاساعانى كورىنىپ تۇردى.
- باسقا باسقا ەمەس، تورەشىلەردىڭ وليمپيادا ويىندارىنداعى مۇنداي «ارام» ارەكەتتەرى نەنى بىلدىرەدى؟
- بۇل - سپورتتىڭ لاستانعانىن بىلدىرەدى. بۇل - سپورتتاعى جەمقورلىقتى بىلدىرەدى. بۇل - «سۇم» ساياساتتىڭ سپورتقا دا اۋىز سالا باستاعانىن بىلدىرەدى.
- بۇدان قۇتىلۋدىڭ جولدارى بار ما؟
- ارينە! سول قولمەن جاساعان دۇنيەنى وڭ قولمەن وزگەرتۋگە بولادى. ءبىراق، ۋاقىت كەرەك، ۇلكەن رەفورما كەرەك.
- ەگەر بۇل ءۇردىس جالعاسا بەرسە نە بولادى؟
- ءتورت جىلدا ءبىر كەلەتىن جارىستىڭ تورەسى اتانعان وليمپيادا ويىندارىنىڭ بەدەلى جويىلادى. قازىر بىرەۋلەر وليمپياداعا قاتىسۋدى ارمانداپ جۇرسە، كەيىن وليمپياداعا بارۋدان باس تارتاتىن بولادى. بۇگىن ليەۆيت بۇگىن ادىلەتسىزدىكتىڭ قۇربانى بولدى، ەرتەڭ دە سولاي بولماسىنا كىم كەپىل. وسىنداي ادىلەتسىزدىكتەردەن قانشاما جاس سپورتشىلار جانىپ كەتىپ جاتىر. جەڭىپ تۇرعان سپورتشىدان جەڭىستى تارتىپ الۋ دەگەن ءسوز - ونىڭ ازاماتتىعىنا، ادامدىق قۇقىعىنا قول سۇعۋ دەگەن ءسوز. سول سپورتشىنى قورلاۋ دەگەن ءسوز. تەك سپورتشىنى عانا ەمەس، ول سپورتشى قاي ەلدىكى بولسا، سول ەلدى دە قورلاۋ دەپ تۇسىنەمىن.
- اڭگىمەڭىزگە راحمەت!
اۆتور: كۇنسۇلتان وتارباي