مۋاممار كاددافي نۇرسۇلتان نازاربايەۆقا «يادرولىق ارسەنالدى قالدىر» دەگەن ۇسىنىس ايتىپتى

 استانا. قازاقپارات - «ك ت ك» تەلەارناسىنىڭ ءتىلشىسى ياروسلاۆ كراسيەنكو تۇسىرگەن «مەملەكەت باسشىسى» اتتى دەرەكتى فيلمدە يادرولىق قارۋعا قاتىستى بۇرىن كوپشىلىك بىلمەيتىن دەرەك ايتىلعان.

ليۆيا ريەۆوليۋتسياسىن باستاعان مۋاممار كاددافي 1992 -جىلدىڭ باسىندا نۇرسۇلتان نازاربايەۆتىڭ اتىنا حات جولداپ، يادرولىق قارۋدى «مۇسىلمانداردىڭ ءبىرىنشى اتوم بومباسى» رەتىندە ساقتاۋدى ۇسىنعان ەكەن. بۇل تۋرالى دەرەكتى فيلم كەزىندە قازىرگى سەنات ءتوراعاسى قاسىم- جومارت توقايەۆ ايتىپ بەرگەن.

«1992 -جىلدىڭ باسىندا قازاقستاننىڭ سىرتقى ىستەر مينيسترلىگىنە ديپلوماتيالىق كانالدار ارقىلى قازاقستان پرەزيدەنتىنىڭ اتىنان ليۆيا ريەۆوليۋتسياسىنىڭ كوشباسشىسى بولعان مۋاممار كاددافي اتىنان حات ءتۇستى. ول ەل اۋماعىنداعى يادرولىق ارسەنالدى «مۇسىلمانداردىڭ ءبىرىنشى اتوم بومباسى» رەتىندە ۇستاپ تۇرۋدى ۇسىنعان» ، - دەيدى ق. توقايەۆ.

«ال يادرولىق ارسەنالدى قالدىردىق دەلىك. سوندا نە بولار ەدى؟ سول راكەتانى الىپ، جان- جاعىمىزدى قورقىتىپ وتىرعاندا، قازىرگى سولتۇستىك كورەيانىڭ كۇيىن كەشەر ەدىك. بۇنداي ەلگە كىم ينۆەستيتسيا تارتار ەدى؟ ال ءبىز ءوز وڭىرىمىزدە شەتەلدىك ينۆەستيتسيا كوپ العان ەل بولدىق، قازاقستاننىڭ ەكونوميكاسىن كوتەرگەن نەسيە ەمەس، ينۆەستيتسيا. شامامەن 250 ميلليارد دوللار. ءبىز يادرولىق ارسەنالدان باس تارتپاعاندا، شەكارامىزدى دا بەكىتە الماي وتىراتىن ەدىك» ، - دەيدى پرەزيدەنت.

 

اۆتور: كەنجەكەي توقتامۇرات قىزى