الماتىدا تاعى ءبىر كوپقاباتتى تۇرعىن ءۇي قيسايدى - فوتو

كەشە تۇستەن كەيىن ساعات 16:30-دا ۇيدەن قىتىرلاعان دىبىس شىققان.
«ءبىز بارلىعىمىز دالاعا جۇگىرىپ شىقتىق. «جەر سىلكىنگەن شىعار»، - دەپ ويلادىق. سودان تۇرعىندار جينالىپ، ءبىر- ءبىرىمىزدى جۇباتىپ، الاتاۋ اۋدانىنىڭ اكىمدىگىنە حابارلاستىق. ءبىراق تەز كەلە قويمادى. سودان قالالىق توتەنشە جاعدايلار جونىندەگى دەپارتامەنتكە حابارلاستىق. ولار كەشكى ساعات 09.00 شاماسىندا عانا كەلىپ، پاتەرلەردى ارالاپ كوردى، تۇرعىندارمەن سويلەستى. بارلىق كەمشىلىكتەردى جويۋعا ۋادە بەردى. بۇگىن الماتى قالالىق ساۋلەت- قۇرىلىس باقىلاۋ مەملەكەتتىك مەكەمەسىنىڭ قىزمەتكەرلەرى كەلىپ، ءۇيدىڭ قانشالىقتى قيسايعاندىعىن انىقتاپ جاتىر. بۇگىن كەشكى ساعات 19:00-دە تەكسەرۋ ناتيجەسى بەلگىلى بولادى»، - دەدى ءوز سوزىندە وسى ءۇيدىڭ تۇرعىنى اسلان شاتىربايەۆ.
ونىڭ ايتۋىنشا، پاتەر كىلتى تۇرعىندارعا ءبىر كۇندە - 2016 -جىلدىڭ 28 - ماۋسىمىندا بەرىلگەن. سول كۇننەن باستاپ، تۇرعىنداردىڭ تاۋقىمەتى باستالىپتى.
«ءۇي قيسايىپ تۇر. جارايدى، وعان دا كەلىستىك. ءبىراق، قۇرىلىس ساپاسىنا قاراڭىزشى، ەسىك- تەرەزەلەر دۇرىس ورناتىلماعان. دۇرىس جابىلمايدى. ەكىنشى ءدالىزدىڭ ەسىگى دۇرىس اشىلىپ، جابىلمايدى. ءبىز قونىستانعان سوڭ، كوپ ۇزاماي كەمشىلىكتەر جونىندە الماتى قالالىق قۇرىلىس باسقارماسىنا اكت جازىپ بەرگەنبىز. ءالى كۇنگە دەيىن جاعداي تۇزەلگەن جوق. ىستىق سۋ كەلگەلى بەرى جوق. جەرتولەدە سۋ بار. ساسىق ءيىس جوعارى قاباتتارعا دەيىن سەزىلەدى. ءبىرىنشى قاباتتان بەسىنشى قاباتقا دەيىن سۋ شاحتالارىنان سۋ اعىپ تۇر. مەن بۇل پاتەرگە كوپ بالالى وتباسى رەتىندە مەملەكەتتىك باعدارلاما بويىنشا قول جەتكىزدىم. جيىرما جىل بويى كۇتتىك. پاتەر جالداپ قاڭعىرىپ جۇردىك. ءۇي ماعان وتە ۇنايدى. تەك ءۇيدىڭ جوندەۋ جۇمىستارى مەن قاۋىپسىزدىگى رەتتەلسە ەكەن. بار تىلەگىمىز وسى»، - دەدى ا. شاتىربايەۆ.
ايتا كەتەلىك، تۇرعىنداردىڭ ايتۋىنشا، بۇگىن كەشكە 19:00-دە الماتى قالاسى اكىمىنىڭ ورىنباسارى سۇلتانبەك ماكەجانوۆ، التاۋ اۋدانىنىڭ اكىمى باعدات مانزوروۆ جانە توتەنشە جاعداي جونىندە دەپارتامەنت وكىلدەرى كەلىپ، تۇرعىندارمەن كەزدەسەدى.