ق ر پرەمەر- ءمينيسترى كارىم ءماسىموۆ الماتىعا جۇمىس ساپارىمەن كەلدى

الماتى. قازاقپارات - بۇگىن الماتىعا جۇمىس ساپارىمەن ق ر پرەمەر- ءمينيسترى كارىم ءماسىموۆ كەلدى. الماتى حالىقارالىق اۋەجايىندا ۇكىمەت باسشىسىن الماتى قالاسىنىڭ اكىمى باۋىرجان بايبەك، ق ر ەنەرگەتيكا ءمينيسترى قانات بوزىمبايەۆ، ق ر اۋىل شارۋاشىلىعى ءمينيسترى اسقار مىرزاحمەتوۆ، جەرگىلىكتى جانە اۋماقتىق مەملەكەتتىك ورگانداردىڭ وكىلدەرى، سونداي- اق، باسقا دا جوعارى قىزمەتتەگى تۇلعالار قارسى الدى.

ەڭ الدىمەن كارىم قاجىمقان ۇلى الماتى حالىقارالىق اۋەجايىنىڭ ۇشۋ الاڭى ماڭىندا ورناتىلعان ارنايى ستەندتى تاماشالادى. مۇندا ۇكىمەت باسشىسى وڭتۇستىك استاناداعى اۋەجاي، تەمىرجول ۆوكزالدارى جانە اۆتوبەكەتتەردىڭ قاۋىپسىزدىگى بويىنشا اتقارىلىپ جاتقان جۇمىستارمەن تانىستى.

 بۇدان كەيىن كارىم ءماسىموۆ الماتى قالاسىنىڭ مەدەۋ اۋدانىندا ورنالاسقان «يننوۆاتسيالىق تەحنولوگيالار پاركى» ارنايى ەكونوميكالىق ايماعىنا ءجۇرىپ كەتتى.

ايتا كەتەلىك، بۇگىن ۇكىمەت باسشىسى الماتىدا ءبىرقاتار نىسانداردى ارالايدى.

 ولاردىڭ ىشىندە الماتى وبلىسى، تالعار اۋدانىنىڭ ارقاباي اۋىلىندا ورنالاسقان «بايسەركە اگرو» ج ش س بارىپ، وسى اگروونەركاسىپتىك كەشەننىڭ جۇمىسىمەن تانىسادى. ودان كەيىن، ناۋرىزباي اۋدانىنا بارىپ، قاراعايلى وزەنىنىڭ ارناسىن نىعايتۋ، 2015 -جىلى ورىن العان سەلدىڭ سالدارىن جويۋ جۇمىستارىمەن تانىسىپ، قۇرىلىسشىلارمەن جانە مەردىگەرلەرمەن اڭگىمەلەسەدى. ودان ءارى، الاتاۋ اۋدانىندا ورنالاسقان «سايالى» ىقشام اۋدانىنا كەلىپ، وڭىرلەردى دامىتۋدىڭ 2020 -جىلعا دەيىنگى مەملەكەتتىك باعدارلاماسى اياسىندا سالىنعان 65 كوپقاباتتى تۇرعىن ۇيلەردى ارالاپ كورەدى. مۇندا 10 جاس وتباسىعا پاتەر كىلتى تابىس ەتىلەدى. بۇدان كەيىن، كارىم ءماسىموۆ الاتاۋ اۋدانىنىڭ شاڭىراق شاعىن اۋدانىنا بارىپ، قاراعايلى وزەنىنىڭ ارناسىن نىعايتۋ جۇمىستارىمەن تانىسىپ، جەرگىلىكتى تۇرعىندارمەن سويلەسەدى.

تۇستەن كەيىن ۇكىمەت باسشىسى 12 مىڭ ورىندى مۇز سارايى مەن 5 مىڭ ورىندى اتلەتيكالىق قالاشىققا بارىپ، قۇرىلىس جۇمىستارىنىڭ بارىسىمەن تانىسادى. بۇدان سوڭ، پەدياتريا جانە بالالار حيرۋرگياسى عىلىمي ورتالىعىندا ۇكىمەت باسشىسىنىڭ، سونداي- اق، دەنساۋلىق ساقتاۋ سالاسىنىڭ ماماندارى جانە عىلىمي- زەرتتەۋ ينستيتۋتتارىنىڭ عالىمدارىنىڭ قاتىسۋىمەن مۇمكىندىگى شەكتەۋلى بالالارعا كومەك كورسەتۋ بويىنشا شاعىن جيىن بولادى. بۇگىن جۇمىس ساپارى بارىسىندا كارىم ءماسىموۆ بەلگىلى مەملەكەت جانە قوعام قايراتكەرى، اعارتۋشى عالىم، اقىن احمەت بايتۇرسىن ۇلىنىڭ مۇراجايىندا بولىپ، وسى مەكەمەنىڭ جۇمىسىمەن تانىسادى. بۇدان كەيىن، كەشكە قاراي، الماتى قالاسى اكىمدىگىندە ۇكىمەت باسشىسى وڭتۇستىك استانانىڭ باس جوسپارىمەن تانىسادى جانە كاسىپكەرلىكتى دامىتۋ جانە بانك قىزمەتى تاقىرىبىندا وتەتىن وتىرىستارعا قاتىسادى.

اۆتور: ايبوتا جاپپاربەرگەن