مىرزاعالي ايتجانوۆ: بوكسشىلارىمىزدىڭ ەندىگى جەكپە- جەكتەرى وتە قيىن بولادى

«بۇگىن شارشى الاڭعا ءتورت بوكسشىمىز شىعىپ، تورتەۋى دە قارسىلاستارىن ۇتىپ، ارى قاراي جارىستارىن جالعاستىراتىن بولدى. بۇگىنگى ءتورت بوكسشىمىز دا جاقسى بوكستاستى. تاپسىرمالارىمدى ويداعىداي ورىندادى. جىگىتتەردىڭ جەڭىستەرىنە رازىمىن. ءبىراق، ەندىگى جەكپە- جەكتەرى وتە قيىن بولادى. سەبەبى، السىزدەر جارىستاردان شىعىپ قالدى. ەندى كىلەڭ ىرىكتەلگەن مىقتىلار قالدى. سوندىقتان، ءبىزدى ناعىز ايقاستار ەندى كۇتىپ تۇر»، - دەپ تاپ ءوتتى باس باپكەر.
سونداي- اق، ءوزىنىڭ قول استىندا جاتتىعاتىن جىگىتتەر دە وسال ەمەس ەكەنىن ايتتى.
«ءبىزدىڭ جىگىتتەر دە وسال ەمەس. ءارقايسىسىنىڭ ءوز ورىندارى بار. مىنە، بۇگىن ۆاسيلي لەۆيت فينالعا قينالماي جەتتى. قازىردىڭ وزىندە قولىندا وليمپيادانىڭ مەدالى بار. ءبىراق، چەمپيون اتانۋ ءۇشىن تاعى ءبىر جاقسىلاپ تەر توگۋى كەرەك. باسقا جىگىتتەر دە سولاي. تەرىن توگىپ وتىرىپ، جۇدىرىقتاسپاسا، جۇلدەدەن قاعىلادى. بارىنە تاپسىرما ورتاق. العا قويعان ماقساتقا جەتۋ ءۇشىن بارىمىزدى سالامىز»، - دەدى ايتجانوۆ.
ەستەرىڭىزگە سالا كەتەيىك، قازاقستان قۇراماسى 2 التىن، 2 كۇمىس، 3 قولا مەدالمەن بۇگىن جالپى كوماندالىق ەسەپتە 16-ورىندا كەلە جاتىر.
ەسكە سالا كەتەيىك، جارىستىڭ العاشقى كۇنىندە دزيۋدودان ەرلەر اراسىندا 60 كەلىگە دەيىنگى سالماق دارەجەسىندە سىنعا تۇسكەن ەلدوس سمەتوۆ ەل قورجىنىنا كۇمىس جۇلدە سالسا، 48 كەلىگە دەيىنگى سالماقتا ايەلدەر اراسىندا جارىسقا قاتىسقان وتگونتسەتسەگ گالبادراح وليمپيادا ويىندارىنىڭ قولا جۇلدەگەرى اتاندى. ال ءۇشىنشى مەدالدى قورجىنعا اۋىر اتلەت فارحاد حاركي سالدى. ول ەرلەر اراسىنداعى 62 كەلىگە دەيىنگى سالماق دارەجەسىندە ونەر كورسەتكەن بولاتىن. وليمپيادانىڭ ءتورتىنشى كۇنى تاعى ءبىر اۋىر اتلەت قىزىمىز كارينا گوريچەۆا 63 كەلى سالماقتا ءتورتىنشى مەدالدى ەل قورجىنىنا سالسا، وليمپيادانىڭ بەسىنشى كۇنى ەكى سپورتشىمىز - اۋىر اتلەت نيدجات راحيموۆ پەن دميتري بالاندين 200 مەتر قاشىقتىققا جۇزۋدەن ەكى التىندى جەڭىپ الدى. ال وسى كۇنى ايەلدەر اراسىندا سىنعا تۇسكەن اۋىر اتلەت قازاقتىڭ قىزى جازيرا جاپپارقۇل كۇمىس جۇلدەگەر اتاندى.
اۆتور: كۇنسۇلتان وتارباي