ءلايلا سۇلتان قىزى جاس كەلىنشەكتەرگە سۇيىكتى بولۋدىڭ قۇپياسىن ايتىپ بەردى
جۋىردا عانا وقىرماندارعا جول تارتقان «مەنىڭ ەكىنشى كىتابىم» ەڭبەگىنىڭ اۆتورى ءلايلا massaget.kz پورتالى ارقىلى ءوز ويلارى مەن وقىرمانعا ايتار كەڭەستەرىمەن ءجيى ءبولىسىپ تۇراتىنىن ايتقان بولاتىن.
ونىڭ كەزەكتى كەڭەستەر توپتاماسى جاڭادان تۇرمىس قۇرىپ، وتباسىلىق ءومىردىڭ اشى مەن تۇشىسىنىڭ ءدامىن ەندى عانا تاتىپ جۇرگەن جاس كەلىنشىكتەرگە ارنالدى.
اۆتوردىڭ ايتۋىنشا، «تۇرمىسقا العاش شىققاندا بويجەتكەندەر باقىتتان باسى اينالىپ، قۋانىشتان توبەسى كوككە ءبىر ەلى عانا جەتپەي جۇرگەندەي سەزىمدە بولادى» . «بولدى، ەندى ءومىرىم باسقاشا بولادى» دەيتىن جاس كەلىنشىكتەر كەيىننەن وسىعان دەيىن ونىمەن بىرگە كەلگەن ماحاببات، ىنتىق سەزىم، سىيلاستىق، قۇشتارلىق سەزىمدەرىنىڭ وتكىنشى ەكەنىن تۇسىنە باستايدى.
سول سەبەپتەن دە جاڭا تۇرمىس قۇرعاندار مەن وتباسىلى بولعىسى كەلەتىندەرگە تەلەجۇرگىزۋشى مىناداي 10 كەڭەس ۇسىنىپ وتىر:
1. «ەشقاشان كۇيەۋىڭىزدىڭ ۇيالى تەلەفونىن اقتارماڭىز. ونىڭ پوشتاسىن، ينتەرنەتتەگى اككاۋنتتارىن تەكسەرمەڭىز. ەر ازاماتتارعا «تەرگەۋشى» ايەل ۇنامايدى.
2. قىز بولىپ، شىر- كوبەلەك اينالىپ، سىرلاسى، دوسى، كوڭىلدەسى، ءارتۇرلى امپلۋاداعى ايەل بولا بىلسەڭىز، ەر ازاماتتىڭ سىزگە دەگەن قىزىعۋشىلىعى جوعالمايدى. ول ءۇشىن «جۇمباق ايەل» بولا ءبىلىڭىز.
3. ەركەككە بىلعانباعان ار جانە ءوزىن اڭساتىپ تۇراتىن مەيىرىمدى جان كەرەك. ەر ازاماتتار ءوزىنىڭ جارىنان قاشان دا تارتىمدىلىقتى، قۇشاعىنا شاقىرىپ تۇراتىن قۇشتارلىقتى كۇتەدى.
4. ءسىزدىڭ بويىڭىزدا ءبارى - شاشىڭىزدىڭ ۇشىنان باشپايىڭىزدىڭ تىرناعىنا دەيىن «مەن ايەلمىن» دەپ تۇرۋى كەرەك. ءوزىڭىزدى جاقسى كورىڭىز، وزىڭىزگە ۋاقىت ءبولىڭىز، كۇتىنىڭىز، ادەمى بولۋعا ەش ەرىنبەڭىز. جەكە باس تازالىعىنا باسا ءمان بەرىڭىز. ەرلەردىڭ ەڭ ءالسىز تۇسى - قىلىقتى، تارتىمدى، ادەمى ايەل.
5. ءوز جارىڭىزعا ەركەلەي ءبىلىڭىز، كەيدە ونى دا ەركەلەتىپ تۇرىڭىز. ءبىراق، كۇيەۋىڭىز ءسىزدىڭ «تۇڭعىش بالاڭىز» بولىپ كەتپەسىن.
6. ازاماتىڭىزدى جىلۋدى جاتتان ىزدەيتىن جاعدايعا جەتكىزبەڭىز.
7. ۋاقىت وتكەن سايىن كيىنۋ ءستيلىڭىزدى، يميدجىڭىزدى وزگەرتىپ وتىرىڭىز. ازاماتىڭىز ءۇشىن سىزدەن كوركەم، سىزدەن سۇلۋ، سىزدەن ەرەكشە ايەل بولماۋى كەرەك.
8. كۇيەۋىڭىزدىڭ اكە- شەشەسىن (اتا- ەنەڭىزدى) ، تۋىسقاندارىن، دوس- جارانىن سىيلاڭىز، ۇيگە ەرتىپ كەلگەن قوناعىنا قۇرمەت كورسەتىڭىز، جىلى قاباق تانىتىڭىز. بۇل قاسيەتىڭىز كۇيەۋىڭىزدىڭ جاقىندارى اراسىنداعى ابىرويىن، ال كۇيەۋىڭىزدىڭ سىزگە دەگەن سىيلاستىعىن ارتتىرادى.
9. باسىڭىز اۋىرىپ، بالتىرىڭىز قاقساسا دا، قاتتى شارشاساڭىز دا، قينالساڭىز دا، جولداسىڭىزعا، وزگەلەرگە سىر بىلدىرمەڭىز. ءسىز قىرىق جاندى ايەلسىز. جانىڭىزعا قاتتى باتىپ بارا جاتسا، اندا- ساندا، ءبىر ۋاقىت شىعارىپ، ەركەلەگەن كەزدە ايتارسىز. ايتپەسە، «مياۋ» ايەلدەردى ەر ازاماتتار ۇناتپايدى.
10. ەشقاشان جاڭا ءبىر نارسەنى ۇيرەنۋدەن باس تارتپاڭىز، قىزىعۋشىلىق تانىتىڭىز، جان- جاقتى بولىڭىز. ۇيدە وتىراتىن ايەل بولساڭىز، ءتورت قابىرعاعا قاراپ، «مىجىلىپ» وتىرا بەرمەڭىز. ءتۇرلى تاماقتار جاساۋدى ۇيرەنىڭىز، ءتىل ساباقتارىنا، توقىما كۋرستارىنا قاتىسىڭىز. سپورتپەن شۇعىلدانىڭىز، دەنەڭىزدى قالىپتا ۇستاڭىز. اۋىلدىق جەرلەردە ونداي مۇمكىندىك جوق بولسا، ينتەرنەت ارقىلى ءتۇرلى ساباقتاردى قاراپ، جاساۋعا بولاتىنىن ەستەن شىعارماڭىز» .
جاس كەلىندەرگە «سۋپەر كەلىنشەك» بول دەيتىن ءلايلانىڭ كەڭەستەرى كوپتەگەن قىزداردىڭ باقىتتى وتباسى بولۋىنا سەپ بولادى دەگەن ويدامىز.
