بۇگىن قازاقستاندىق سپورتشىلاردان كىمدەر شىعادى؟

17:30-دا ءبىزدىڭ ەسكەكشى ۆلاديسلاۆ ياكوۆليەۆ «لاگوا» ستاديونىندا اكادەميالىق ەسۋدە فينالدىق باسەكەگە تۇسپەك. ول - حالىقارالىق ساناتتاعى سپورت شەبەرى، جاسوسپىرىمدەر اراسىندا 2010، 2011 جانە 2012 -جىلدارداعى ازيا چەمپيونى.
سونداي- اق 18:00 ساعاتتا اكادەميالىق ەسۋدەن وتەتىن فينالدىق باسەكەدە قازاقستاندىق سپورتشى سۆەتلانا گەرمانوۆيچ ءوز باعىن سىناماق.
18:00-دە نىسانا كوزدەۋدەن كەزەكتى سىندار وتپەك. بۇل جولى سپورتشىلار 50 مەترلىك جاتىپ اتۋدان كىم مىقتىنى انىقتايدى. بىلىكتىلىك سايىسىندا ءبىزدىڭ ەلدىڭ نامىسىن يۋري يۋركوۆ قورعايدى. بىلتىر ول قازاقستان رەكوردىن جاڭارتقان ەدى. بۇل جولى وليمپيادا ويىندارىندا رەكورد ورناتادى دەپ سەنەمىز.
ساعات 18.30-دا جەڭىل اتلەتيكادان جارىس باستالادى. وليمپيادا ستاديونى 34 سپورتشىنى قابىلداماق. ا توبىندا ءبىزدىڭ وتانداسىمىز ەۆگەني لابۋتوۆ ديسك لاقىترۋدان كۇش سىناسادى. سوڭعى جىلدارى لوبۋتوۆ قازاقستاندا ەشكىمگە دەس بەرمەي كەلدى. ءبىراق وليمپيادا ويىندارىندا قازاقستان ءۇشىن جولداما الادى دەپ ەشكىم ويلاماعان ەدى.
ساعات 22.30-دا 75 كەلىگە دەيىنگى سالماقتا قازاقستاندىق بوكسشى جانىبەك ءالىمحان ۇلى الجيرلىك ورەن يلياس ابباديمەن جۇدىرىق تۇيىستىرەدى. 1/16 فينالدا ول بريتاندىق ەنتوني فاۋلەردى جەڭگەن بولاتىن. ءالىمحان ۇلى 2013 -جىلعى الەم چەمپيونى، 2013 -جىلعى ازيا چەمپيوناتىنىڭ التىن مەدال يەگەرى، 2014 -جىلى ازيا ويىندارىنىڭ جەڭىمپازى. يلياس اببادي - الجيرلىك بوكسشى، 2012 -جىلى لوندون وليمپياداسىندا 69 كەلىگە دەيىنگى سالماقتا ونەر كورسەتتى. 2011 - جىلعى افريكا چەمپيوناتىنىڭ كۇمىس جۇلدەگەرى.
كۇننىڭ سوڭىندا، شامامەن 23:30-دا پونتال مۋنيتسيپاليتەتىندە سپورتتىق جۇرىستەن جارىس وتەدى. ەرلەر اراسىنداعى 20 شاقىرىمدىق دوداعا ءبىزدىڭ ەلدىڭ اتىنان گەورگي شەيكو شىعادى. شەيكو 1989 -جىلى تۋعان. 2012 - جىلى لوندون وليمپياداسىندا 20 شاقىرىمدىق سايىستا ول تەك 35-ورىنعا يە بولعان ەدى.
سونىمەن قاتار، 12-نەن 13-نە اۋعان شاقتا اۋىر اتلەتيكادان 85 ك گ دەيىن سالماق دارەجەسىندە باق سىنايتىن دەنيس ۋلانوۆ شىعادى. تولاعايلاردىڭ باسەكەسى ساعات 04:00-دە باستالماق.
ايتا كەتەيىك، قازىرگى ۋاقىتتا قازاقستان ريوداعى وليمپيادا ويىندارىنداعى مەدالدار رەيتينگىندە ون ەكىنشى ورىندا تۇر.
«ۇلت» پورتالى