قازاقستاندىقتار كۇدىكتى سايتتارعا شاعىمدانا الادى

بۇل تۋرالى مينيستر فەيسبۋكتەگى جەكە پاراقشاسىندا جازدى.
«قىمباتتى دوستار، ءبىزدىڭ مينيسترلىك سايتىندا «شاعىمدانۋ» ءبولىمى اشىلدى. ول جەرگە كەز كەلگەن ازامات ينتەرنەتتە قازاقستان زاڭناماسىنا قايشى كەلەتىن اقپاراتتىڭ جاريالانعانى تۋرالى حابارلاماسىن قالدىرا الادى.
ماسەلە، نەگىزىنەن الەۋمەتتىك جەلىلەردەگى سۋيتسيدتى، ەسىرتكىنى ناسيحاتتاعان، تەرروريزم مەن ەكسترەميزمگە، قاتىگەزدىك پەن ۇلتارالىق جانجالعا ۇندەگەن توپتارعا جانە سايتتارعا قاتىستى.
اتالعان بولىمدە قولدانۋشى زاڭ بۇزۋشىلىق كاتەگورياسىن تاڭداپ، ماتەريالدىڭ سىلتەمەسىن ەنگىزىپ، شاعىمىن ۋاكىلەتتى ورگانعا جولداي الادى. ءبىز تىركەلۋ فورماسىنىڭ قولدانۋشى ءۇشىن بارىنشا ىڭعايلى، قاراپايىم بولۋىن قامتاماسىز ەتۋگە تىرىستىق.
مينيسترلىك ءاربىر شاعىم بويىنشا جەدەل ارەكەت ەتىپ، جاريالانعان ماتەريالدارعا قۇقىقتىق باعا بەرەدى. ەگەر زاڭ بۇزۋشىلىق ناقتىلانسا، ولار ەلىمىزدىڭ اۋماعىندا بۇعاتتالادى.
سونىمەن قاتار، بىزگە جۋرناليستەر تاراپىنان قانداي دا ءبىر رەسۋرستىڭ نە سەبەپتى بۇعاتتالعانى تۋرالى سۇرانىم ءجيى تۇسەدى. وسى ورايدا ءبىز مۇنداي اقپارات قوعام ءۇشىن اشىق بولۋى كەرەك دەپ سانايمىز.
سوندىقتان، الداعى ۋاقىتتا رەسۋرستاردىڭ جابىلۋىنىڭ سەبەبىن كورسەتە وتىرىپ، بۇعاتتالعان سىلتەمەلەر بازاسىن قۇرۋدى جوسپارلاپ وتىرمىز.
ەگەر وزىڭىزگە نەمەسە جاقىندارىڭىزعا قاۋىپ توندىرەتىن كونتەنتتى كورسەڭىز، سىلتەمەسىن مىنا ادرەسكە جولداۋىڭىزعا بولادى:https://mic.gov.kz/kk/complain»، دەپ حابارلادى داۋرەن ابايەۆ.