نيجات راحيموۆ: قازاق ەلىنە كەلىپ، وليمپيادا چەمپيونى اتاندىم

بۇل تۋرالى بۇگىن ريوداعى قازاقپارات تىلشىسىنە بەرگەن سۇحباتىندا ريو وليمپياداسىنىڭ چەمپيونى اۋىر اتلەت نيجات راحيموۆ ءمالىم ەتتى.
كەشە برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا ءبىرىنشى التىن مەدالدى وسى جىگىت ەل قورجىنىنا سالعان بولاتىن. بۇگىن ريوداعى قازاقستاننىڭ باسپا ءسوز ورتالىعىندا وتكەن باسقوسۋدان كەيىن راحيموۆتى جەڭىسىمەن قۇتتىقتاپ، شاعىن سۇحبات الدىق.
- جۇلدەڭ قۇتتى بولسىن! وليمپيادا چەمپيونى دەگەن اتاق وزىڭە قانداي اسەر ەتىپ جاتىر؟
- راحمەت! ءوزىمدى چەمپيون رەتىندە ءالى تولىق سەزىنە الماي جاتىرمىن. ءبىراق، بىرەۋ قۇتتىقتاعاندا وزىمە- ءوزىم «مەن شىنىمەن چەمپيون بولدىم با؟» دەپ ويلانىپ قالام. ازىرگە كەرەمەت ءبىر سەزىمنىڭ قۇدىرەتىن سەزىنىپ ۇلگەرگەن جوقپىن. بارلىعى ءتۇس سياقتى.
- العاشقى جۇلقا كوتەرۋدە قىتايلىق قارسىلاسىڭنان 12 كەلىگە ارتتا قالىپ قويدىڭ. وسى كەزدە چەمپيون بولام دەگەن وي بولدى ما؟
- ارينە، بولدى. ول مەنەن جۇلقا كوتەرۋدە اسىپ كەتسە، مەن سەرپە كوتەرۋدە ونىڭ جولىن بوگەيمىن دەگەن وي بولدى. سونىمەن بىرگە، مەندە تاعى ءبىر ماقسات بولدى. «قازاق ەلى مەنى توبەسىنە كوتەرىپ جاتقاندا مەن نەگە قازاقتىڭ تۋىن ريودا توبەگە كوتەرمەسكە» دەپ ويلادىم. ەگەر مەن قازاق ەلىنە كەلمەگەندە وليمپيادا چەمپيونى دەگەن اتاققا قول جەتكىزە الار ما ەدىم، بىلمەيمىن. بارلىعى وسى قازاق ەلىنىڭ ارقاسى. مەنىڭ جەڭىسىم قازاقستاننىڭ جەڭىسى.
- سەرپە كوتەرۋدەن 214 كەلىنى بۇرىن جاتتىعۋلاردا كوتەرىپ كورگەن بە ەدىڭ؟
- شىنىمدى ايتسام، بۇل مەنىڭ جەكە رەكوردىم. وسى رەكوردتى جاتتىعۋدا ەمەس، ءتورتجىلدىق باستى دودادا كوتەرىپ تۇرمىن. ءبارى دە قازاق ەلىنىڭ ابىرويى ءۇشىن. قازاقستانعا التىن سىيلاۋ ءۇشىن وسىنداي تاۋەكەلگە باردىم.
- بۇل سالماقتى كوتەرۋگە باس باپكەر ني تاپسىرما بەردى ما، الدە ءوزىڭ ۇسىنىس جاسادىڭ با؟
- ني ەكەمىز اقىلداسىپ شەشتىك. ول ماعان «چەمپيون بولۋ ءۇشىن وسىنداي كەلىنى كوتەرە الاسىڭ با؟» دەپ سۇرادى. مەن ويلانباستان كوتەرەم دەپ جاۋاپ بەردىم.
- ني سەنىڭ كوتەرە الاتىنىڭا سەندى ما؟
- ول كەزدە ول تۋرالى ويلاعان جوقپىن. ءبىراق، مەن كوتەرەم دەدىم، اللا قۋات بەردى، كوتەردىم.
- قىتاي سپورتشىسى سەن 214 كەلىنى باعىندىرعان سوڭ ەشتەڭە دەگەن جوق پا؟
- نە دەسە دە، الەم الدىندا ونىڭ ۋىسىندا تۇرعان التىندى تارتىپ الدىم. قىتايلىقتار التىن ءبىزدىڭ قولدا، ەندى وعان تالاسۋعا ەشكىمنىڭ شاماسى كەلمەيدى دەپ ويلادى. مەنىڭ كۇتپەگەن جەردەن تاۋەكەلگە باراتىنىمدى ەشكىم كۇتكەن جوق.
- اڭگىمەڭە راحمەت!
اۆتور: كۇنسۇلتان وتارباي