دميتري بالانديننىڭ اناسى: ۇلىمنىڭ جەڭىسى - قازاقستاننىڭ قۋانىشى

ريو- دە- جانەيرو. قازاقپارات - كەشە برازيليانىڭ ريو- دە- جانەيرو قالاسىنداعى ءوتىپ جاتقان وليمپيادا ويىندارىندا ەكىنشى التىندى ويلاماعان جەردەن ءجۇزۋشى دميتري بالاندين جەڭىپ الدى.
None
None

بۇگىن ريوداعى قازاقستاننىڭ باسپا ءسوز ورتالىعىندا وتكەن باسقوسۋدا دميتريدىڭ اناسى تاتيانا بالاندينانى جولىقتىرىپ، ۇلىنىڭ جەڭىسىمەن قۇتتىقتاپ، شاعىن سۇحبات الدىق.

- بالاڭىز چەمپيون بولعاندا قانداي سەزىم- كۇيدە بولدىڭىز؟

- بىلمەيمىن! ەشتەمە ەسىمدە جوق. قازىردە ءوز- وزىمە سەنە الار ەمەسپىن. كەيدە ءتۇسىم بە، ءوڭىم بە دەپ وزىمە- ءوزىم كۇبىرلەيمىن ىشتەي.

- جارىستىڭ باسى- قاسىندا بولدىڭىز با؟

- ءيا! جانىمدى شۇبەرەككە ءتۇيىپ وتىردىم. جۇرەگىم اۋىزىما تىعىلدى. مارەگە جەتكەنشە ورنىمنان نەشە تۇرىپ، نەشە وتىردىم.

- مارەگە ءبىرىنشى بولىپ جەتكەندەگى كوڭىل- كۇيىڭىز؟

- قاتتى تولقىپ تۇرمىن. نە ايتارىمدى دا بىلمەيمىن. قۋانىشتان بولار باسقا ءبىر الەمدە قالقىپ تۇرعاندايمىن.

- وسىندا بالاڭىزبەن بىرگە كەلدىڭىز بە، الدە كەيىن كەلدىڭىز بە؟

- كەيىن كەلدىم. جول بويى بالاما ساتتىلىك تىلەۋمەن، وسى ۇلىم قازاقستاننىڭ تۋىن جەلبىرەتسە ەكەن دەپ تىلەدىم. تىلەگىم قابىل بولدى.

-  ۇلىڭىز وليمپياداعا اتتاناردا "مەن ءسوزسىز جەڭىسكە جەتەمىن. ارتىمنان كەلىڭىز" دەپ ۋادە بەردى مە؟

- ۋادە بەرگەن جوق، ءبىراق "ماما، مەن تەك جەڭىس ءۇشىن بارا جاتىرمىن" دەپ جاي عانا كۇلىمسىرەپ بەتىمنەن ءسۇيدى. مەن دە "ايتقانىڭ كەلسىن" دەپ انالىق اق باتامدى بەرىپ اتتاندىرىپ سالدىم. ايتقانى كەلدى. مەدال الدى. جاي مەدال ەمەس، وليمپيادانىڭ التىن مەدالىن الدى.

- ەندى نە ارمانىڭىز بار؟

- امان- ەسەن ەلگە جەتۋ. بۇل ۇلىم مەن مەنىڭ عانا قۋانىشىم ەمەس، حالىقتىڭ قۋانىشى، قازاقستاننىڭ قۋانىشى. سوندىقتان باپكەرلەرىنە، قازاق ەلىنە، جانكۇيەرلەرىنە العىس ايتامىن.

- اڭگىمەڭىزگە راحمەت! قۋانىشتارىڭىز ۇزاعىنان بولسىن...



اۆتور: كۇنسۇلتان وتارباي

 

سوڭعى جاڭالىقتار