وليمپيادادا وزگە ەلدىڭ نامىسىن قورعايتىن قازاققا قاتىسى بار سپورتشىلار كىمدەر؟

بوكستان 91 كەلىگە دەيىنگى سالماقتا سىنعا تۇسەتىن تەيمۋر ماممادوۆ ريو وليمپياداسىنىڭ اشىلۋ سالتاناتىندا ءازىربايجان قۇراماسىنىڭ تۋىن الىپ شىقتى. بوكستان ەۋروپا چەمپيونى اتانعان تەيمۋر لوندون وليمپياداسىندا قولا جۇلدەگەر اتانعان بولاتىن.
الماتىدا وتكەن الەمدىك سىندا دا ماممادوۆ ۇزدىك ۇشتىكتەن كورىندى. سونىمەن قاتار، تەيمۋر ەۋروپا ويىندارىنىڭ چەمپيونى دا اتاندى.
ال ءازىربايجاندىق بوكسشىنىڭ ناعاشىلارى - وڭتۇستىك قازاقستان وبلىسىنىڭ تۋمالارى. تەيمۋر اناسىنىڭ تۋعان جەرىنە ءجيى كەلىپ، اسىرەسە، شىمكەنت قالاسىندا كوپ قوناق بولادى. ەلىمىزدەگى كوپتەگەن جانكۇيەرلەر الماتىداعى الەم چەمپيوناتىندا تەيمۋر ماممادوۆتى قازاقتىڭ جيەنى دەپ كوتەرمەلەگەن بولاتىن.
ەرلانبەك كاتەي ۇلى (قىتاي)
ەركىن كۇرەس شەبەرى ەرلانبەك كاتەي ۇلى ريو وليمپياداسىندا قىتاي قۇراماسىنىڭ نامىسىن قورعايدى. ەتنيكالىق قازاق بالۋانى وليمپيادا ويىندارىنا تۇڭعىش رەت قاتىسقالى وتىر.
ەرلانبەك قازاقستانعا بىرنەشە مارتە كەلىپ، ءتۇرلى تۋرنيرلەرگە قاتىسقان بولاتىن. ونى وليمپيادا ويىندارىنا قىتايداعى قازاق باپكەرى دايىنداعان. قوي باعىپ وسكەن شوپاننىڭ بالاسى ازيا ويىندارىندا قولا جۇلدە يەلەندى. ال 2012 -جىلعى لوندون وليمپياداسىنا جولداما بەرەتىن تۋرنيردە ول اقجۇرەك تاڭاتاروۆتان ۇتىلعان.
ەرلانبەك سپورتتىق مانسابىن اياقتاعان سوڭ باپكەرلىكتى قولعا العىسى كەلەدى.
ارتەم چەبوتاريەۆ (رەسەي)
بوكستان ەۋروپا چەمپيونى، رەسەي قۇراماسىنىڭ ۇزدىگى، 75 كەلىدە سىنعا تۇسەتىن ارتەم چەبوتاريەۆ تە قازاق حالقىنىڭ جيەنى سانالادى. ارتەمنىڭ اناسى - قازاق. بوكسشىنىڭ ۇلكەن سپورتقا جول تارتۋىنا ناعاشى اعاسى ەدىلباي قازييەۆ ۇلەس قوسقان.
«مەنىڭ انام دينا - قازاق قىزى. سوندىقتان، الماتىعا كەلسەم، ءوزىمدى ۇيىمدە جۇرگەندەي سەزىنەمىن. رەسەيدە تۇرساق تا، ءبىز قازاقتىڭ ەتىن اسىپ، باۋىرساق پىسىرەمىز. قازاق حالقىنا جاقىن ەكەنىم راس»، - دەگەن بولاتىن ارتەم سۇحباتتارىنىڭ بىرىندە.
چەبوتاريەۆتىڭ الەم چەمپيوناتىندا العان ەكى قولا جۇلدەسى دە بار.
ەلمۇرات تاسمۇرادوۆ (وزبەكستان)
گرەك- ريم كۇرەسىنەن 59 كەلىدە سىنعا تۇسەتىن ەلمۇرات تاسمۇرادوۆ وزبەكستاننىڭ قازاقتار كوپ مەكەندەيتىن بوستاندىق اۋدانىندا دۇنيەگە كەلگەن.
تاسمۇرادوۆ وسىعان دەيىن ءۇش رەت ازيا چەمپيونى اتانىپ، الەم چەمپيوناتىندا ەكى مارتە قولا جۇلدە يەلەندى.
بالا كۇنىندە قازاقستانعا كەلىپ، ب. ساتتارحانوۆ اتىنداعى سپورت- ينتەرناتتى ءتامامداعان ول وزىنە قازاقستان قۇراماسىنان ورىن تابىلماعاسىن، وزبەكستان نامىسىن قورعاپ ءجۇر. ەلمۇرات وزبەكستان قۇراماسى جۇلدە كۇتىپ وتىرعان بالۋانداردىڭ ءبىرى.
ەلنۇر ءابدىرايىموۆ (وزبەكستان)
وزبەكستاننىڭ بوستاندىق اۋدانىندا دۇنيەگە كەلگەن تاعى ءبىر قازاق بوكسشىسى ريو وليمپياداسىنا جولداما جەڭىپ العان بولاتىن. ەلنۇر ءابدىرايىموۆ دوحادا وتكەن الەم چەمپيوناتىندا قولا جۇلدەگەر اتانعان. سونىمەن قاتار، بۇكىلالەمدىك بوكس سەرياسى اياسىنداعى وتە ءساتتى ونەر كورسەتىپ ءجۇر.
الايدا، ەلنۇردى وزبەكستاندىق باپكەرلەر وليمپياداعا الماي كەتتى. 60 كەلى سالماقتاعى حۋرشيد توجيبويەۆ ريو شارشى الاڭىندا سىنعا تۇسۋدە. ال ەلنۇر بولسا، تۇبىندە وليمپيادا چەمپيونى اتاناتىنىنا سەنىمدى.
قازاق تىلىندە ەركىن سويلەيتىن ەلنۇردى بولاشاقتا وليمپ بيىگىنەن دە كورۋىمىز مۇمكىن.