ەلدوس سمەتوۆتىڭ اناسى: ۇلىم كۇرەسكەندە ۇيدە وتىرا الماي، دالاعا شىعىپ كەتتىم - فوتو

بۇل تۋرالى جامبىل سپورتى حابارلايدى.
«ەلدوسقا جانكۇيەر بولعان بارشا قازاقستاندىقتارعا العىسىمىز شەكسىز. بالاسى اتقا شاپسا، اتا- اناسى ۇيدە وتىرىپ تاقىم قىسار قازاقپىز. ءبىز دە باسقالار سياقتى جانكۇيەر بولدىق. ءار كەزدەسۋىن تاپجىلماي وتىرىپ تاماشالادىق. اسىرەسە، اقتىق سىندا رەسەيلىك بالۋانمەن بەلدەسكەن ساتتەگى اسەردى سوزبەن ايتىپ جەتكىزۋ مۇمكىن ەمەس. سوڭعى ساتتەرگە دەيىن تەلەديداردىڭ الدىندا تىم- تىرىس وتىردىق. فينالدىق كەزدەسۋدە تەڭ ءتۇسىپ، قوسىمشا ۋاقىت بەلگىلەگەندە تىپتەن ءوزىمدى قويارعا جەر تاپپاي، تىپىرشىپ قالدىم. ەلدوس ۇتىلىپ، باسىن ۇستاپ جاتقاندا دا ءۇنسىز قالدىق. كىشكەنە ۋاقىتتان كەيىن عانا ۇلكەن ۇلىم جاندوس شاپالاق ۇرىپ، «كۇمىس» دەپ ايقايلاعاندا بارىپ ەسىمىزدى جينادىق. ەلدوستىڭ ىلعي ءبىرىنشى ورىن الىپ جۇرگەنىنە ابدەن ۇيرەنىپ الىپپىز. (كۇلىپ). ارينە، كەز كەلگەن سپورتشى وليمپيادا شىڭىن باعىندىرۋدى ارماندايدى عوي. ۇلىمنىڭ بۇل جەڭىسى دە سول شىڭنان كەم ەمەس دەپ ويلايمىن»، - دەدى ەلدوستىڭ اكەسى باقتىباي.
«ەلدوس ۇلىم بارلىق جانكۇيەرلەرىنىڭ ءۇمىتىن اقتاپ، ەل نامىسىن ابىرويمەن قورعاپ شىققانىنا شىن قۋاندىم. جالپى، ەلدوس كۇرەسكەندە مەن دالاعا شىعىپ كەتەم. ونى باسىنان اياق قاراپ وتىرۋعا انا جۇرەگى شىداسىن با؟! قاي جارىستا بولماسىن، ول كىلەمگە شىقسا، مەن سىرتقا شىعىپ، تىلەۋىن تىلەپ وتىرامىن. سوسىن، ءبىراز ۋاقىت ءوتىپ، «جەڭدى!» دەگەن داۋىستى ەستىگەننەن كەيىن عانا ۇيگە جۇگىرىپ كىرەم. كەشەگى جارىستاعى اسەر مۇلدە بولەك. ول كەزدە دە دالاعا شىعىپ كەتتىم، ءبىر اينالىپ كەلىپ تەرەزەدەن قاراسام، ءالى كۇرەسىپ جاتىر ەكەن. تاعى دا كەتىپ قالدىم. كەلەسى كەلگەنىمدە بالام باسىن ۇستاپ كىلەمدە جاتىر. ۇلىم جاندوستىڭ سەكىرىپ قۋانعانىنان كەيىن عانا قۋانىشتان جىلاپ جىبەردىم. ءبىراق، تەلەديدارعا قاراسام ەلدوستىڭ ءۇنجىرعاسى ءتۇسىپ، كوڭىلى بوساپ تۇر ەكەن. سوسىن، بىردەن ەلدوسقا «ۇلىم، قۋانىشتان جۇرەگىمىز جارىلىپ، ءبىزدىڭ توبەمىز كوككە جەتىپ جاتىر. كەرەمەت! سەن ءبىزدىڭ ماقتانىشىمىزسىڭ. ەشقانداي ۋايىمداما!» - دەپ، حات جولدادىم. ارتىنشا كۇلىپ تۇرعان سۋرەتتەرىمەن جاۋاپ جازدى»، - دەيدى باتىر ۇلدىڭ اناسى توقتارگۇل.
قازاقستانعا كۇمىس جۇلدە سىيلاعان باتىردىڭ اناسى توقتارگۇل ۇلىنىڭ تالاي رەت ەڭسەسى تۇسسە دە، جاسىماي العا باسقانىن ايتتى.
«قاي كەز ەكەنى ەسىمدە جوق، ءبىر جارىسقا بارىپ، ەرتەسىنە تەلەفون شالدى. جەڭىلگەن بە، الدە اعايىنان ءسوز ەستىگەن بولۋ كەرەك، كوڭىل- كۇيى جوق. ونىڭ الدىندا دا ءبىر- ەكى جارىستا جولى بولماي ءجۇردى. «ماما، مەن قازىر كيىمدەرىمدى تاستاپ، بارىنە قول سىلتەپ ۇيگە قايتايىن با؟» - دەدى. سوسىن مەن: « ۇلىم، ولاي بولمايدى. قانداي دۇنيە بولماسىن، وڭايشىلىقپەن كەلمەيدى. بۇلاي بولدى ەكەن دەپ، بارىنە قول سىلتەي بەرسەڭ، سەنەن ەشتەڭە شىقپايدى. ولاي ىستەمە! ەكەۋمىزگە دەمالۋعا بولمايدى. مىنا جاقتان مەن دەمالسام، ارعى جاقتا سەن دەمالساڭ، سوندا كىم جەتىستىككە جەتەدى؟» - دەپ، اكەسى ەكەۋمىز ەكى جاقتان دەمەۋ بەردىك. كەلەسى كۇنى كەلىپ قالار ما ەكەن دەپ ويلادىق. جوق، كەلمەدى! شىدادى. ودان كەيىن، بۇنداي ءسوز ايتقان ەمەس. ءومىر بولعان سوڭ، ءبارى دە بولادى عوي. بۇل جەڭىلىستەن دە ساباق الادى دەپ ويلايمىن»، - دەيدى باتىردىڭ اناسى.
اتا- اناسىنىڭ ايتۋىنشا، ەلدوس وليمپيادادان كەلگەن سوڭ الاڭسىز اۋىلدا دەمالادى ەكەن. ال ەلدوستىڭ اكەسى ۇلىنىڭ تۇبىندە وليمپيادا التىنىن موينىنا تاعاتىنىنا سەنىمدى.
ەسكە سالا كەتەيىك، ريو وليمپياداسىنىڭ العاشقى جارىس كۇنىندە ەلدوس سمەتوۆ كۇمىس جۇلدەگەر اتاندى.
www.nur.kz