جاپپاي ەگىن وراعى ناۋقانىنىڭ باستالۋى قىركۇيەك ايىنىڭ ءبىرىنشى ون كۇندىگىنە جوسپارلانۋدا

بۇل تۋرالى بۇگىن ۇكىمەت وتىرىسىندا ق ر اۋىل شارۋاشىلىعى ءبىرىنشى ۆيتسە- ءمينيسترى قايرات ايتۋعانوۆ ءمالىم ەتتى.
«استىق ەگەتىن نەگىزگى وبلىستاردا ماۋسىمنىڭ ءبىرىنشى بولىگىندە نورمادان تومەن اتموسفەرالىق جاۋىن- شاشىن مەن سۋىق اۋا- رايى بايقالدى. استىق ەگەتىن وبلىستاردىڭ كوپشىلىك بولىگىندە ماۋسىمنىڭ ەكىنشى جارتىسىندا جانە شىلدە ايىندا جاۋعان مول جاۋىن- شاشىن ۆەگەتاتيۆتىك ماسسانىڭ قالىپتاسۋىنا، ءداندى داقىلدار دامۋىنىڭ سوزىلۋىنا، جازدىق بيداي ەگىستەرىندە اۋرۋلاردىڭ تارالۋىنا جانە دامۋىنا اكەلىپ سوقتى. اقمولا، قوستاناي جانە سولتۇستىك قازاقستان وبلىستارىندا شىلدە ايىندا جاۋىن- شاشىننىڭ مولشەرى نورمادان 2-3 ەسە ارتىپ، بۇل بيىك بيداي ساباعىنىڭ قالىپتاسۋىنا، سونىڭ سالدارىنان جەكەلەگەن تاناپتاردا ەگىننىڭ جاتىپ قالۋىنا اسەر ەتتى»، - دەدى قايرات ايتۋعانوۆ.
ونىڭ سوزىنە قاراعاندا، جالپى العاندا، ماۋسىم جانە شىلدە ايلارىندا وڭ ءتيىمدى تەمپەراتۋرالاردىڭ جەتكىلىكسىزدىگى بايقالدى. ول ءداندى، مايلى جانە ءداندى بۇرشاقتى داقىلداردىڭ ءوسىپ- جەتىلۋىن شەكتەيدى. ەگۋ مەرزىمدەرىنە بايلانىستى ەگىننىڭ دامىپ- جەتىلۋىنىڭ سوزىلۋى ماۋسىم ايىندا جاۋىن- شاشىن نورما شەگىندە بولعان وڭىرلەردە 5-7 كۇندى، جاۋىن- شاشىن نورمادان 2-3 ەسە جوعارى بولعان وڭىرلەردە 7-10 كۇندى قۇرادى.
«وسىنى ەسكەرىپ، اۋا- رايىنىڭ كوپ جىلدىق تاجىريبەسىنە سۇيەنسەك، تامىز ايىندا ەگىستىڭ دامىپ- جەتىلۋدەن ارتتا قالۋشىلىعى ساقتالاتىن بولادى جانە جاپپاي ەگىن جيناۋدىڭ باستالۋى قىركۇيەك ايىنىڭ ءبىرىنشى ونكۇندىگىنىڭ سوڭىندا كۇتىلۋدە. تامىز ايىندا اۋا رايى ىستىق بولعان جاعدايدا جاپپاي ەگىن جيناۋدىڭ باستالۋى تامىز ايىنىڭ سوڭى مەن قىركۇيەك ايىنىڭ باسىندا كۇتىلۋدە»، - دەپ اتاپ ءوتتى ۆيتسە- مينيستر.
ايتا كەتەيىك، «قازگيدرومەت» ر م ك بولجامى بويىنشا تامىز ايىندا اۋانىڭ تەمپەراتۋراسى كوپ وڭىرلەردە نورمادان جوعارى جانە نورما دەڭگەيىندە، ال جاۋىن- شاشىننىڭ مولشەرى نورمانىڭ شەگىندە بولادى دەپ كۇتىلۋدە.
اۆتور: رۋسلان عابباسوۆ