مىرزاعالي ايتجانوۆ: قۋانۋعا ءالى ەرتە
- بۇگىنگى ءۇش بوكسشىڭىزدىڭ جەڭىسىنە كوڭىلىڭىز تولدى ما؟
- نەگىزى قۋانۋعا ءالى ەرتە. جارىس ەندى باستالىپ جاتىر. بۇل ىرىكتەۋ ويىندارى. سوندىقتان، نەگىزگى تالاس، باستى شايقاستار الداعى ۋاقىتتا بولادى. دەگەنمەن بۇگىنگى ءۇش جىگىت تە جامان جۇدىرىقتاسقان جوق. ۇشەۋى دە ۇتتى.
- ءارقايسىسىنا جەكە- جەكە توقتالىپ وتسەڭىز...
- ءبىرجان ناميبيالىق ماتتياس حامۋنەلامەن بوكستاسقانىن وزدەرىڭىز كوردىڭىزدەر. قارسىلاسى دا جامان ەمەس. قيمىلى شيراق بولدى. ءبىراق ءبىزدىڭ جىگىت تاجىريبەسىنىڭ ارقاسىندا جەڭىسكە جەتتى. ءبىرجاننىڭ وسال تۇستارى بولدى. ءبىراق، قازىر ونى سارالاپ تۇراتىن ۋاقىت ەمەس. ەندى كەلەسى قارسىلاسىنا قالاي جۇمىس جاساۋ كەرەكتىگىن ويلاستىرۋىمىز كەرەك. ەندى ول شيرەك فينالدا وزىنە جاقسى تانىس وزبەك بوكسشىسى حاسانبوي دۋسماتوۆپەن كەزدەسەدى. ول دا مىقتىمىن دەپ جۇرگەن بوكسشىلاردىڭ ءبىرى.
ال جانىبەك پەن ليەۆيت بۇل جولى جاقسى جۇدىرىقتاستى. ەكەۋىنە ايتار ءسوزىم جوق. وسى قارقىندارىنان تايماي، فينالعا جەتسە، ارى قاراي وزدەرى التىن ءۇشىن ايانىپ قالماسى انىق.
- جالپى جىگىتتەردىڭ كوڭىل كۇيى قالاي؟
- جامان ەمەس. ءبارى جاقسى. بەرىك قانا جەڭىلىپ قالدى. ارينە، جارىس بولعان سوڭ جەڭىلىس بولادى. ەندى قالعان جىگىتتەرىمىز ءۇمىتتى اقتاسا بولدى.
- بۇگىن ءۇش بوكسشىمىز شارشى الاڭعا شىعادى دەگەندى ەستىپ، جانكۇيەرلەر كوپ جينالدى. وسىنداي جارىس كەزىندە جانكۇيەرلەردىڭ ايعايى سپورتشىلارىمىزعا قانشالىق دەمەۋ بولادى؟
- بۇل جىگىتتەرىمىزگە ۇلكەن كۇش بەرەدى. ءاردايىم وسىلاي جانكۇيەرلەر ءبىزدى قولداپ تۇرسا، ءبىز دە جاقسى كوڭىل كۇيدە بولامىز. جىگىتتەر دە جەڭىسكە ۇمتىلادى.
- وزگە ەلدەردەن كەلگەن بوكسشىلاردىڭ ايقاستارىن دا كورىپ، باقىلاپ وتىرعان بولارسىز. جالپى، ريوعا بوكسشىلار قانداي دايىندىقپەن كەلگەن سياقتى؟
- وليمپياداعا ناشار بوكسشىلار كەلمەيدى. ءار ەل ءوزىنىڭ ەڭ مىقتىلارىن عانا الىپ كەلەدى. جالپى بوكس الەمدە جاقسى دامىپ جاتىر. ريوعا دا كىلەڭ مىقتىلار جينالىپتى. جاڭا ەسىمدەردى دە كەزدەستىرىپ جاتىرمىز.
- اڭگىمەڭىزگە راحمەت!
اۆتور: كۇنسۇلتان وتارباي
