قازاقستاندىقتار ريو وليمپياداسىنىڭ ەكىنشى كۇنىن مەدالسىز اياقتادى

ريو وليمپياداسىنىڭ العاشقى كۇنى قازاقستان قورجىنىنا قوس مەدال ءتۇسىپ، رۋحىمىز ءبىر سەرپىلىپ قالعانى انىق. وكىنىشكە قاراي، وليمپيادانىڭ ەكىنشى كۇنى ونەر كورسەتكەن سپورتشىلارىمىز بىردە- ءبىر مەدالعا قول جەتكىزە المادى.
وليمپيادانىڭ ەكىنشى كۇنى قازاق سپورتشىلارىنان العاشقىلاردىڭ ءبىرى بولىپ، دزيۋدو كۇرەسىنەن 66 كەلىدەگى جانساي سماعۇلوۆ جارىس الاڭىنا شىقتى.
جاسىراتىن نەسى بار، وليمپيادانىڭ العاشقى كۇنى كۇرەستىڭ بۇل تۇرىنەن ەكى مەدال ەنشىلەگەن سوڭ، بۇگىندە سماعۇلوۆتىڭ جولىنا ۇلكەن ۇمىتپەن قارادىق. وكىنىشكە قاراي، بۇل ءۇمىت اقتالمادى.
ول العاشقى اينالىمدا ياسپەر لەفيەۆەردى جارىس جولىنان شىعارعانىمەن، ەكىنشى بەلدەسۋىندە وڭتۇستىك كورەيالىق ان باۋلدان وڭباي ۇتىلدى.
سونداي- اق، بۇگىن ايەلدەر اراسىندا 100 مەتر قاشىقتىققا شالقالاپ جۇزۋدەن جارىستار ءوتتى. بۇل سىندا قازاقستاندىق ەكاتەرينا رۋدەنكو باق سىنادى. الايدا، جارتىلاي فينالعا وتۋگە شاماسى جەتپەدى. ول ىرىكتەۋ كەزەڭىندە 100 مەتر قاشىقتىقتى 1:01.28 ناتيجەمەن اياقتاپ، 6- ورىنعا تابان تىرەدى.
ال تەننيستەن ەل ءۇمىتىن ارقالاپ كەلگەن ياروسلوۆا شۆەدوۆا ايەلدەر اراسىندا جەكەلەي سىندا جاپون قىزى ميساكي دويدان ۇتىلدى. ەكى سەتتىڭ ەسەبى - 6:3, 6:4.
وسى جەڭىلىسىنەن كەيىن، تەننيستەن قازاقستان قۇراماسىنىڭ كاپيتانى دياس دوسقارايەۆ قازاق تىلشىلەرىنە سۇحبات بەرىپ، شۆەدوۆا مۇمكىندىكتى پايدالانا الماعانىن ايتىپ ءوتتى. ول سۇحباتىندا «ياروسلاۆا شۆەدوۆا العاشقى سەتتە ءوز ويىنىن تاپپادى. سونداي- اق سوققىسىنىڭ پايىزى وتە تومەن بولدى. وڭ جاقتان بەگحەندتەن ويىن تاپقانىمەن، سوققىلارى ناتيجە بەرمەدى. جارىسقا ساقاداي ساي ەدىك. جاپونيا ويىنشىسى ميساكو دويدىڭ ويىنىمەن ءجىتى تانىسپىز. قالاي وينايتىنىن، قارسىلاسىنا نە ىستەيتىنىن - بارىمەن تانىس ەدىك. وكىنىشكە قاراي، ياروسلاۆا شۆەدوۆا بەرىلگەن مۇمكىندىكتى دۇرىس پايدالانا المادى. بۇگىن دويدىڭ ويىنى وتە جاقسى بولدى. قاتەلىككە جول بەرگەن جوق. بۇل - سپورت. قاتەلىكتى كەشىرمەيدى. بارلىعى شۆەدوۆانىڭ ءوز قولىندا ەدى. ەندى قاتەلىكپەن جۇمىس ىستەيتىن بولامىز»، - دەپ اتاپ ءوتتى.
ال گالينا ۆوسكوبويەۆا جەكەلەي سىندا ونەر كورسەتكەن جوق. سونداي- اق جەرلەستەرىمىز تەننيستەن جۇپتىق سايىستا دا كوڭىل كونشىتەرلىك ناتيجە كورسەتە المادى. بۇل سايىستىڭ ءبىرىنشى اينالىمىندا ياروسلاۆا شۆەدوۆا جانە گالينا ۆوسكوبويەۆا بەلگيالىق تەننيسشىلەردەن وڭباي ۇتىلدى. قارسىلاستارىمىز ءبىرىنشى سەتتىڭ قورىتىندىسىندا 6:1 ەسەبىمەن العا شىقتى. ال ەكىنشى اينالىمعا كەلگەندە قازاقستاندىق جۇپ ءوز ەرىكتەرىمەن جارىسقا شىعۋدان باس تارتتى.
سونىمەن قاتار بۇگىن ستەند اتۋدان دا جەرلەستەرىمىز ونەر كورسەتتى. بۇل باسەكەدە سىنعا تۇسكەن وتانداسىمىز ماريا دميترەنكو ىرىكتەۋ كەزەڭىندە 8-ورىنمەن شەكتەلىپ، 66 ۇپايىمەن جارتىلاي فينالعا وتە المادى.
ريو وليمپياداسىنىڭ ەكىنشى كۇنى قازاقستاندىق سپورتشىلاردان ەڭ سوڭعى بولىپ 56 كەلىدەگى اۋىر اتلەتىمىز ارلي چونتەي ونەر كورسەتتى.
بار ءۇمىتىمىز دە سوندا قالعان بولاتىن. كەمىندە ۇزدىك ۇشتىكتەن كورىنەدى دەپ ۇمىتتەندىك. ولاي بولمادى.
چونتەي قوس سايىستىڭ قورىتىندىسى بويىنشا 278 (130-148) كەلىنى باعىندىردى. بۇل كورسەتكىش ونى جەڭىس تۇعىرىنا جەتۋگە تىم ازدىق ەتتى. سەبەبى، وسى سالماقتا قولا مەدال العان تايلاندتىق سينفەت كرۋايتونگتەن ول 11 كەلى ارتتا قالدى. تايلاندتىق قوس سايىستىق قورىتىندىسى بويىنشا 289 كەلىنى باعىندىردى. ءبىرىنشى ورىندى 307 كەلىنى باعىندىرعان قىتايلىق لون سزينحۋان جەڭىپ الدى. ول 2008 -جىلى بەيجىڭ وليمپياداسىندا دا چەمپيون اتانعان. ال ەكىنشى ورىندى 303 كەلىنى باعىندىرعان سولتۇستىك كورەيالىق وم يۋن چحول جەڭىپ الدى.
وسىلايشا قازاقستان سپورتشىلارى ريو وليمپياداسىنىڭ ەكىنشى كۇنىن مەدالسىز اياقتاپ، جالپى ەسەپتە 18-ورىنعا ءتۇسىپ قالدى.
اۆتور: كۇنسۇلتان وتارباي