استانادا وتكەن كورمەدە سيرەك كەزدەسەتىن ءيت تۇقىمى ۇسىنىلدى - فوتو
بۇل شاراعا قازاقستاننان 58 تۇقىم بويىنشا 170 تەن استام ءيت قاتىستىرىلدى.
كورمە قورىتىندىسى بويىنشا ۇزدىك 10 تۇقىمدىق توپتىڭ وكىلدەرى ىرىكتەلىنبەك. وسىدان كەيىن قازاقستان چەمپيونى كانديداتىنىڭ تيتۋلى بەرىلەدى.
«وسىلاردىڭ اراسىندا ەڭ كىشكەنتايلارى تويتەررەر مەن چيحۋاحۋالار، ال ەڭ ىرىلەرىنىڭ ساناتىندا ورتا ازيالىق وۆچاركالار مەن تيبەتتىك ماستيفتەر. سونىمەن قاتار، كورمەدە سىبىرلىك حاكيلەردى، ورتا ازيالىق جانە شىعىس ەۋروپالىق وۆچاركالاردى كوپتەپ كەزدەستىرۋگە بولادى.
بۇرىندارى وتە تانىمال بولعان بۋلدوگ جانە روتۆەيلەر تۇقىمدارى وتە از كەلگەن. جالپى، وسى شاراعا نەگىزىنەن الماتى، قاراعاندى، قوستاناي، كوكشەتاۋ، پەتروپاۆل، رۋدنىي، تەمىرتاۋ جانە استانا قالالارىنان بەلسەندى قاتىسۋدا»، - دەدى كورمە كوميتەتىنىڭ ءتوراعاسى ەۆگەني مەچكوۆسكي.
بەلگىلى بولعانداي، كورمەگە ورىستىڭ قارا تەريەرى تۇقىمىنان جالعىز عانا يت كەلگەن ەكەن.
لاۆرەنتي پاۆلوۆيچ ەسىمدى وسى ءيت ورىس جانە نەمىس تىلىندەگى بۇيرىقتاردى تۇسىنەتىن كورىنەدى. مامانداردىڭ سوزىنە قاراعاندا، ءيتتىڭ بويى 72 س م- گە، ال سالماعى 68 كەلىگە جەتەدى، سوندىقتان بۇل تۇقىمداس يتتەردى جەكە ۇيدە ۇستاعان دۇرىس.
«قازىرگى كەزدە بۇل يتتەر قازاقستاندا وتە سيرەك كەزدەسەدى. ول بالالار مەن ايەلدەرگە تيىسپەيدى، ال ەرلەرگە ساقتىقپەن قارايدى، ياعني ءتىسىن باتىرۋى مۇمكىن. گەنەتيكا بويىنشا ول كۇزەتكە ارنالعان»، - دەپ ويىمەن ءبولىستى قاراعاندىلىق الەكسەي سومارين.
اۆتور: رۋسلان عابباسوۆ
