ماماندار ءۇي الۋ كەزەگىن تەز جىلجىتۋدىڭ ءتيىمدى ءادىسىن ۇسىندى

استانا. قازاقپارات - وتاندىق ماماندار تۇرعىن ءۇيدىڭ كەزەگىن جەدەلدەتۋدىڭ ءادىسىن ۇسىندى.

ول ءۇشىن ءار قازاقستاندىق اي سايىن 500 تەڭگەدەن قورعا قۇيىپ وتىرۋى ءتيىس.

بۇل تۋرالى «حابار» ارناسى حابارلايدى.

قىزىلوردالىق ءجۇزباي تاڭرىقبايەۆ 10 سوتىق جەردى كەزەكتە بەس جىل كۇتكەن. دىتتەگەنىنە جەتكەن ازامات ەندى جەكە تۇرعىن ءۇي قۇرىلىسىمەن اينالىسپاق. بولجاممەن ءبىر قاباتتى، ءۇش بولمەلى جەر ءۇي سالۋعا جارتى جىلداي ۋاقىتى كەتەدى. ال قۇرىلىسقا قاجەت قاراجات كولەمى 4-5 ميلليون تەڭگە ماڭايىندا. بۇنىڭ ءوزى ۇنەم. سەبەبى كوپقاباتتى ۇيدەن پاتەر الۋ ءۇشىن كەمىندە 15 ميلليون تەڭگە قاجەت. ال ونى قالتا كوتەرمەيدى.

«ءۇي سوعۋعا ارنالعان جەرگە قولىمىز جەتتى. بۇل جەر ءۇيدىڭ سوعۋ قۇنىنا ءوزىمىز ەسەپتەپ كورسەك، 4-5 ميلليون تەڭگە قاراجات كەتەدى ەكەن. ال يپوتەكاعا الاتىن ۇيلەر 15-16 ميلليونداي بولادى. سوندىقتان مىنا جەر ءۇي سوعۋ بىزگە ءتيىمدى بولىپ تۇر»، - دەيدى قىزىلوردا قالاسىنىڭ تۇرعىنى ءجۇزباي تاڭرىقبايەۆ.

شىنىمەن، جەكە باسپانا سالۋدان قاراعاندا، ساتىپ الۋ ناعىز ابىگەرلىك ءىس. تۇرعىن ءۇي تاۋقىمەتىن شەشۋ ءۇشىن ماماندار ءتۇرلى ۇسىنىستار ايتۋدا. سونىڭ ءبىرى - قۇرىلىس كومپانيالارىنىڭ ورتاق قوعامدىق قورىن قۇرۋ باستاماسى.

«قاراپايىم تىلمەن جەتكىزسەك، ءار قازاقستاندىق ازامات وسى قورعا اي سايىن بەس ءجۇز تەڭگە سالىپ وتىرسا، جينالعان قارجى مەردىگەرلەرگە ءبولىنىپ، باسپانا قارقىنى ءوسىپ، تۇرعىن ءۇي كەزەگى تەز جىلجيتىن ەدى»، - دەيدى ولار.

ازىرگە بۇل تەك ۇسىنىس قانا. مەملەكەتتىك تۇرعىن ءۇي باعدارلاماسى بويىنشا بەرىلەتىن ۇيلەر استانانىڭ سول جاق جاعالاۋىندا 2007 -جىلدان باستاپ سالىنعان. ودان بەرى 16 مىڭنان استام ادام باسپانامەن قامتاماسىز ەتىلدى. ولار - مەملەكەتتىك، بيۋدجەتتىك قىزمەتكەرلەر جانە جاس وتاۋ باعدارلاماسىنىڭ قاتىسۋشىلارى.

مىسالى، وتكەن جىلدىڭ وزىندە استانادا 4000 پاتەر بەرىلگەن. الايدا ىشكى ميگراتسياعا بايلانىستى بەرىلەتىن وتىنىشتەردىڭ سانى ودان دا كوپ. قازىر 42 مىڭعا جۋىق ادام تۇرعىن ۇيدەن ءالى دامەلى.