كوزدىڭ قىزارۋىن قالاي كەتىرۋگە بولادى؟

استانا. قازاقپارات - كەيبىر قىز- كەلىنشەكتەر مەن ايەلدەردە اللەرگيا سەكىلدى بەلگىلى ءبىر جاعدايلاردا كوزدىڭ قىزارۋى پايدا بولادى.

بۇل ءتۇرلى فاكتورلارعا بايلانىستى. ماسەلەن، قاتتى شارشاۋ، كوزگە كۇننىڭ ءتۇسۋى، ساپاسىز كوز بوياۋلارى، كوزىلدىرىك، كومپيۋتەر، ءتىپتى، ۇيقىنىڭ ءوزى كوزدىڭ قىزارۋىنا الىپ كەلىپ جاتادى. ال، ودان قۇتىلۋ ءۇشىن نە ىستەۋ كەرەك؟ دارىگەرلەر بۇل جاعىمسىز دەنساۋلىق اقاۋىنان قۇتىلۋدىڭ 7 جولى بار ەكەنىن ايتادى. نازارلارىڭىزعا سول امال- تاسىلدەردى تۇگەلدەي ۇسىنامىز.

1. سەگىز ساعاتتىق ۇيقى. كورىكتى كورىنگىسى كەلەتىن ءاربىر ايەل كۇنىنە شامامەن 8 ساعات ۇيىقتاۋ كەرەك. كوز تولىققاندى دەمالماسا كۇنى بويى ايەلدىڭ كوڭىل- كۇيى دە بولمايدى.

2. توكسيندى گازداردىڭ كوزگە تۇسپەۋىنە ءجىتى نازار اۋدارىڭىز. بولمەنىڭ تەرەزەسىن كۇنىنە بىرنەشە رەت اشىپ، بولمەنى جاعىمسىز اۋادان تازارتىپ وتىرۋ قاجەت. ءتۇتىندى عيماراتتارعا كىرمەۋگە تىرىسىڭىز. ال، بوياۋلارمەن جۇمىس ىستەسەڭىز مىندەتتى تۇردە اشىق جەردە بولۋىڭىز كەرەك. ءتىپتى، اسحانادا تاماق ازىرلەگەن كەزدە دە اس مايىنىڭ ساپالاسىن پايدالانعان ءجون. ودان ءبولىنىپ شىعاتىن گاز كوزگە اجەپتەۋىر اسەر ەتەدى.

3. كوزدى كۇننەن قورعايتىن كوزىلدىرىكتى تەك جاز ايلارىندا تاعىپ قويماي، قىستىڭ كەزىندە دە كوزىڭىزدەن تاستاماۋعا تىرىسىڭىز. ويتكەنى، اق قارعا شاعىلىسقان كۇن كوزدىڭ جانارىنا كەرى اسەرىن تيگىزەدى. سونداي-اق، كۇز بەن كوكتەمنىڭ جەلدى كۇندەرى دە اتالعان كوزىلدىرىكتەر ءسىزدىڭ كوزىڭىزدى بوتەن زاتتاردان قورعايدى.

4. تەك ساپالى كوسمەتيكا پايدالانىڭىز. ەگەر كوز بەن قاس بوياۋلارى اعزاڭىزعا جاقپاسا ونى قايتا جاعۋدىڭ قاجەتى جوق. ال، ۇيقىعا جاتار كەزدە بەتتەگى وپا- دالاپتى تۇگەلدەي سۇرتپەي جاتۋعا مۇلدەم بولمايدى.

5. ەگەر كوزىڭىزگە لينزا تاعاتىن بولساڭىز مىندەتى تۇردە ونى دۇرىس پايدالانۋ جولدارىن ءبىلىڭىز. لينزانى ۋاقىتىندا شەشىپ، ۋاقىتىلى تازالاپ وتىرۋ كەرەك. سونداي- اق، لينزالاردىڭ دا پايدالانۋ مەرزىمى بولاتىنىن ۇمىتپاعانىڭىز ءجون.

6. كومپيۋتەرمەن جۇمىس ىستەگەن كەزدە ءاربىر 2 ساعات سايىن مىندەتتى تۇردە 10-15 مينۋتتىق ءۇزىلىس الىپ وتىرۋ قاجەت. دەمالىس كەزىندە كوزدى جۇمىپ، جۇمىستان وزگە دۇنيەلەردى ويلانۋعا تىرىسىڭىز. ال، كوزدەردىڭ جاتتىعۋىن جاساساڭىز تىپتەن جاقسى.

7. كونديتسيونەر نەمەسە جىلىتۋ قۇرالدارى بار بولمەلەردە اۋانىڭ قۇرامى بۇزىلادى. اتاپ ايتقاندا، ونداعى ىلعالدىلىق كەۋىپ، قۇرعاق اۋا كوزدىڭ تەز شارشاۋىنا الىپ كەلەدى. اۋامەن بىرگە كوزدىڭ ءوزى دە قۇرعاپ، جاس ءبولۋ مۇمكىندىگىنەن ايرىلادى. مۇنداي كەزدە ارنايى دارىلىك تامشىلاردى تامىزعان ابزال.

دانا ساعىنبەك قىزى